.jpg)
បុរសម្នាក់លីអង្កររៀបចំអោយភ្ញៀវ ក្នុងហាងលក់អង្ករមួយកន្លែងក្នុងរាជធានីភ្នំពេញ។ ហុង មិនា
ភ្នំពេញៈ កម្ពុជាបានត្រៀមអង្ករប្រមាណ ៣០ ០០០ តោន ដើម្បីនាំចេញទៅប្រទេសទីម័រខាងកើត នាពេលដ៏ឆាប់ៗខាងមុខនេះ ដែលជាការបើកទីផ្សារថ្មីមួយទៀតសម្រាប់វិស័យស្រូវអង្ករកម្ពុជា។ កាលពីថ្ងៃទី ១៧ ខែមេសា កន្លងក្នុងជំនួបជាមួយក្រុមហ៊ុន ហ្គ្រីត្រេដនៃក្រសួងពាណិជ្ជកម្ម និងសហព័ន្ធស្រូវអង្ករកម្ពុជា ឯកអគ្គរដ្ឋទូតសាធារណរដ្ឋទីម័រខាងកើត ប្រចាំកម្ពុជាលោក Ermenegildo Kupa Lopes បានលើកសំណើសុំនាំចេញអង្ករពីកម្ពុជាទៅប្រទេសទីម័រ ដើម្បីបំពេញតម្រូវការទីផ្សារក្នុងប្រទេស។
ក្នុងជំនួបជាមួយលោក Ermenegildo Kupa Lopes ឯកអគ្គរដ្ឋទូតសាធារណរដ្ឋទីម័រខាងកើតនៅទីស្តីការក្រសួងពាណិជ្ជកម្មកាលពីថ្ងៃអង្គារ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានលើកឡើងថា បច្ចុប្បន្នកម្ពុជាបានត្រៀមអង្កររួចរាល់ហើយសម្រាប់ផ្គត់ផ្គង់ទីផ្សារប្រទេសទីម័រខាងកើត។
លោកបានថ្លែងថា៖ «កម្ពុជាបានរៀបចំត្រៀមអង្ករចំនួន ៣០ ០០០ តោន រួចជាស្រេចសម្រាប់នាំទៅប្រទេសទីម័រខាងកើត ហើយសូមស្នើសុំឲ្យភាគីទីម័រខាងកើតពិនិត្យលទ្ធភាព និងផ្ដល់ដំណឹងជូនដល់កម្ពុជាវិញផង»។
ជាមួយគ្នានេះលោកក៏បានជំរុញ និងលើកទឹកចិត្តវិស័យឯកជនប្រទេសទីម័រខាងកើតឲ្យចូលមកបើករោងម៉ាស៊ីនកិនស្រូវនៅកម្ពុជា ដើម្បីនាំចេញអង្ករទៅទីម័រខាងកើតវិញ។
លោក Ermenegildo Kupa Lopes បាននិយាយថា ប្រទេសទីម័រពិតជាមានបំណងនាំយកអង្ករពីកម្ពុជាទៅកាន់ប្រទេសខ្លួន ហើយទីម័រខាងកើតក៏មានកសិផលមួយចំនួនដែលអាចនាំមកទីផ្សារកម្ពុជាវិញផងដែរ។ លោកប្រាប់ទៀតថា ចំណែកនៅក្នុងវិស័យប្រេងឥន្ធនៈ ប្រទេសទីម័រអាចនឹងផ្ដល់ឱកាសការងារចំនួន ៣ ០០០ កន្លែងជូនដល់ប្រជាជនកម្ពុជា។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា សព្វថ្ងៃកម្ពុជាមានអង្ករស្តុកគ្រប់គ្រាន់ ដើម្បីឆ្លើយតបនឹងតម្រូវការអង្ករនាំចេញទៅប្រទេសទីម័រខាងកើត។ អង្ករដែលទីម័រចង់បានពីកម្ពុជាគឺជាប្រភេទអង្ករស។
លោកបន្តថា ទីម័រខាងកើតជាប្រទេសដែលមានសក្តានុពលសម្រាប់ការធ្វើពាណិជ្ជកម្មតាមរយៈរដ្ឋាភិបាល និងរដ្ឋាភិបាល។ លោកថ្លែងថា៖ «ជាមួយនឹងការខិតខំរបស់រដ្ឋាភិបាលកម្ពុជា យើងសង្ឃឹមថា ទីម័រខាងកើតនឹងក្លាយជាទីផ្សារថ្មី និងរឹងមាំរបស់ទីផ្សារនាំចេញអង្ករកម្ពុជា»។
តាមលោក សារ៉ន ប្រទេសទីម័រខាងកើតមិនធ្លាប់ទិញអង្ករពីកម្ពុជាទេ ខណៈកន្លងមកប្រទេសនេះតែងតែនាំចូលអង្ករពីប្រទេសវៀតណាម។
ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជាលោក ហ៊ុន ឡាក់ ធ្លាប់បានប្រាប់ភ្នំពេញប៉ុស្តិ៍កាលពីខែមេសាថា ទីម័រខាងកើតបានស្នើសុំទិញអង្ករពីកម្ពុជាដើម្បីទប់ស្កាត់ការខ្វះខាតស្បៀងដោយសារជំងឺកូវីដ១៩។ លោកប្រាប់ទៀតថា ទោះបីយ៉ាងណា ទីម័រមិនទាន់បានបញ្ជាក់ពីបរិមាណអង្ករដែលត្រូវការនោះទេ។
លោកបញ្ជាក់ថា៖ «កម្ពុជាបានស្នើសុំឲ្យភាគីទីម័របញ្ជូនលិខិតជាផ្លូវការតាមរយៈក្រសួងការបរទេសកម្ពុជាដោយបញ្ជាក់ពីបរិមាណរយៈពេលនៃការផ្គត់ផ្គង់ និងលក្ខខណ្ឌផ្សេងទៀតរួមមាន ការវេចខ្ចប់ ការដឹកជញ្ជូន និងប្រភេទអង្ករ ជាដើម»។
របាយការណ៍នាំចេញអង្ករបង្ហាញថា ក្នុងរយៈពេល ៥ ខែដើមឆ្នាំ ២០២០ កម្ពុជាបាននាំចេញអង្ករទៅទីផ្សារអន្តរជាតិចំនួន ៣៥៦ ០៩៧ តោនកើនឡើង ៤២,៣៤ ភាគរយបើធៀបនឹងរយៈពេលដូចគ្នាឆ្នាំ ២០១៩ ដែលមានចំនួន ២៥០ ១៧២ តោន។ រីឯទឹកប្រាក់ដែលទទួលបាននៅក្នុងរយៈពេលខាងលើនេះមានចំនួន ២៤១ លានដុល្លារ៕ LA
