ភ្នំពេញៈ អង្គការវេទិកាស្រូវអង្ករប្រកបដោយស្ថិរភាព (SRP) អំពាវនាវឲ្យមានភាពជាដៃគូឯកជនសាធារណៈដើម្បីធានាការផ្គត់ផ្គង់អង្ករពិភពលោកប្រកបដោយស្ថិរភាព ខណៈវិស័យនេះកំពុងប្រឈមផលប៉ះពាល់ជាច្រើនដោយសារការប្រែប្រួលអាកាសធាតុ។
នៅក្នុងមហាសន្និបាតប្រចាំឆ្នាំលើកទី ៨ នៃវេទិកាអង្ករប្រកបដោយស្ថិរភាព ដែលបានរៀបចំឡើងនៅខេត្តសៀមរាប នៅសប្ដាហ៍នេះ ក្រុមប្រតិភូ ១៥០ នាក់ មកពីសមាជិកភាពពិភពលោករបស់ SRP ក្នុងប្រទេស ២៤ ជុំវិញពិភពលោក បានពិភាក្សាភាពជាដៃគូភាគីពាក់ព័ន្ធជាច្រើន ដើម្បីផ្លាស់ប្តូរវិស័យអង្ករពិភពលោក។
ពួកគេអំពាវនាវឲ្យរដ្ឋាភិបាល ក្រុមហ៊ុនលក់រាយ និងយីហោនានា ចាំបាច់ត្រូវធ្វើការងាររួមគ្នាជាមួយក្រុមអ្នកវិទ្យាសាស្ដ្រ គ្រឹះស្ថានហិរញ្ញវត្ថុ និងដៃគូអភិវឌ្ឍន៍ ដើម្បីលើកកម្ពស់ការអនុវត្តវៃឆ្លាតទៅលើអាកាសធាតុក្នុងចំណោមកសិករស្រូវអង្ករខ្នាតតូច។
SRP បានឲ្យដឹងថា៖ «ភាគីពាក់ព័ន្ធនានាអាចធ្វើការរួមចំណែកដ៏ធំក្នុងការបង្កើនការអនុវត្តផលិតកម្មឆ្លាតវៃផ្អែកលើអាកាសធាតុ តាមរយៈវិធីសាស្ដ្រសម្របសម្រួលមួយ នឹងធានាការជំរុញគោលនយោបាយ និងបរិយាកាសទីផ្សារ ការចាត់វិធានការចាំបាច់ ដូចជាឧបករណ៍ហិរញ្ញវត្ថុ និងឧបករណ៍ទីផ្សារ កាត់បន្ថយពន្ធនាំចូល និងបង្កើតការលើកទឹកចិត្តទីផ្សារថ្មី។
អង្គការនេះឲ្យដឹងថា៖ «វិធានការបន្ទាន់ ចាំបាច់ត្រូវកែលម្អស្ថិរភាពនៃការផ្គត់ផ្គង់អង្កររបស់ពិភពលោកក្នុងគ្រាមានផលប៉ះពាល់ខ្លាំងដោយសារការប្រែប្រួលអាកាសធាតុ និងការខ្វះទឹកដល់កសិករដាំដុះស្រូវមានដើមទុនបន្តិចបន្តួច ១៤៤ លាននាក់របស់ពិភពលោក»។
ព្រឹត្តិការណ៍នេះសហការរៀបចំឡើងដោយ SRP អង្គការអភិរក្សសត្វព្រៃកម្ពុជា និងក្រុមហ៊ុន IFC ដោយមានការចូលរួមធ្វើជាអធិបតីដោយលោក វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ។
លោកស្រី Kundhavi Kadiresan ជំនួយការអគ្គនាយក និងតំណាងតំបន់អាស៊ីប៉ាស៊ីហ្វិក របស់អង្គការស្បៀងអាហារ និងកសិកម្ម (FAO) របស់អង្គការសហប្រជាជាតិ បានឲ្យដឹងថា ស្ដង់ដារនេះនឹងស្វែងរកការបង្កើតទីផ្សារសម្រាប់ស្រូវអង្ករប្រកបដោយស្ថិរភាព ឆ្លើយតបនឹងតម្រូវការរកប្រាក់ចំណូលសម្រាប់កសិករ និងក្រុមហ៊ុន និងការផលិតស្រូវអង្ករមានរសជាតិកាន់តែប្រសើរ សម្រាប់អតិថិជន ខណៈកាត់បន្ថយផលប៉ះពាល់លើបរិស្ថាន។
លោកស្រីបានថ្លែងនៅក្នុងសុន្ទរកថាដ៏សំខាន់របស់លោកស្រី នៅក្នុងមហាសន្និបាតរបស់ SRP ថា៖ «SRP យកចិត្តទុកដាក់ខ្លាំងអំពីការផ្ដល់មធ្យោបាយក្នុងការផលិតស្រូវអង្ករកាន់តែប្រសើរ គឺកាន់តែប្រសើរសម្រាប់កសិករ កាន់តែប្រសើរសម្រាប់បរិស្ថាន និងកាន់តែប្រសើរសម្រាប់កសិពាណិជ្ជកម្ម»។ លោកស្រីបន្តថា៖ «មានការងារច្រើនណាស់ដែលយើងត្រូវធ្វើ។ បើវាពិតជាការងារស្រួល វានឹងត្រូវបានធ្វើឲ្យហើយត្រឹមពេលនេះ»។
តាមការទទួលយកស្ដង់ដារសម្រាប់ការដាំដុះស្រូវប្រកបដោយស្ថិរភាពរបស់ SRP កសិករដាំដុះស្រូវអាចកាត់បន្ថយការប្រើប្រាស់ទឹក និងសារធាតុគីមី របស់ពួកគេ បង្កើនប្រាក់ចំណូល និងការពារបរិស្ថាន។
សម្រាប់ប្រទេស កម្ពុជា កាលពីឆ្នាំ ២០១៨ ក្រុមហ៊ុន IFC ក្រុមហ៊ុន Mars Food and Battambang Rice Investment Co. Ltd បានដំណើរការភាពជាដៃគូ ដើម្បីលើកកម្ពស់ការអភិវឌ្ឍប្រកបដោយស្ថិរភាពនៃឧស្សាហកម្មស្រូវអង្កររបស់ប្រទេស កម្ពុជា។នេះបើតាម SRP។
SRP បានឲ្យដឹងថា ការកែលម្អការផលិតស្រូវអង្ករ និងការលើកកម្ពស់ទំនាក់ទំនងជាមួយចង្វាក់តម្លៃអង្ករពិភពលោក នឹងជួយវិស័យកសិកម្មរបស់កម្ពុជា ពង្រីកលទ្ធភាពចូលទីផ្សារ បង្កើនតម្លៃនាំចេញ និងកែលម្អជីវភាពរស់នៅរបស់កសិករ។ SRP បានបញ្ជាក់ថា៖ «ក្នុងរយៈពេល ៣ ឆ្នាំក្រោយកសិករមានដើមទុនតូចប្រហែល ៩ ០០០ គ្រួសារ នឹងទទួលប្រយោជន៍ពីការងាកទៅរកការអនុវត្តការធ្វើកសិកម្មប្រកបដោយស្ថិរភាព បច្ចេកវិទ្យាកសិកម្មវៃឆ្លាត និងការបណ្ដុះបណ្ដាលការយល់ដឹងផ្នែកហិរញ្ញវត្ថុ»។
ដោយបានដាក់ចេញលើកដំបូងកាលពីខែតុលាឆ្នាំ ២០១៥ SRP បានស្វែងរកក្នុងការកាត់បន្ថយផលប៉ះពាល់នៃការដាំដុះស្រូវដល់បរិស្ថាន។
នៅក្នុងការប៉ាន់ប្រមាណរបស់អង្គការសហប្រជាជាតិ ការផលិតស្រូវបានប្រើប្រាស់ទឹកស្រោចស្រព ៤០ ភាគរយរបស់ពិភពលោក ហើយវាលស្រែនៅទូទាំងពិភពលោកបំភាយឧស្ម័នមេតាន ១០ ភាគរយ៕LA