ភ្នំពេញៈ ក្រុមអង្គការសង្គមស៊ីវិលជាង ១០០ បានស្នើសុំជាថ្មីឲ្យរាជរដ្ឋាភិបាលដាក់ចេញវិធានការណែនាំដល់គ្រឹះស្ថានហិរញ្ញវត្ថុទាំងអស់នៅកម្ពុជា ផ្អាកការបង់ប្រាក់កម្ចី និង ការប្រាក់ យ៉ាងតិចចំនួន ៣ ខែដល់អ្នកខ្ចីក្នុងអំឡុងពេលរាតត្បាតជំងឺកូវីដ១៩។
សេចក្តីថ្លែងការណ៍រួមរបស់អង្គការសង្គមស៊ីវិល ចំនួន ១០៣ បានផ្សាយកាលពីថ្ងៃទី ៦ មេសា ឆ្នាំនេះ ឲ្យដឹងថា ការដាក់ចេញវិធានការនេះនឹងផ្ដល់លទ្ធភាពឱ្យអ្នកខ្ចីប្រាក់នូវឱកាសស្នាក់នៅផ្ទះ និង រក្សាសុវត្ថិភាពក្នុងអំឡុងពេលរីករាលដាលជំងឺកូវីដ ១៩ ដែលពួកគេមិនគួរត្រូវភ័យខ្លាចក្នុងការបាត់បង់ដីធ្លី ឬផ្ទះសម្បែង ប្រសិនបើពួកគេគ្មានលទ្ធភាពបង់ប្រាក់។
អង្គការសង្គមស៊ីវិលទាំងនោះ រួមមាន អង្គការ សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC) អង្គការសម្ព័ន្ធខ្មែរជំរឿននិងការពារសិទ្ធិមនុស្ស (LICADHO) និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) ជាដើម។
សេចក្តីថ្លែងការណ៍បញ្ជាក់ថា៖ «យើងខ្ញុំស្នើសុំយ៉ាងទទូចឱ្យរាជរដ្ឋាភិបាលជួយប្រជាពលរដ្ឋរាប់លាននាក់ដោយដាក់ចេញវិធានការណែនាំឱ្យវិស័យហិរញ្ញវត្ថុដែលរកប្រាក់ចំណេញ ដើម្បីជួយទទួលបន្ទុកសេដ្ឋកិច្ចខ្លះរបស់អ្នកខ្ចីប្រាក់។
សេចក្តីការណ៍នេះ ឲ្យដឹងទៀតថា ការរៀបចំឥណទានឡើងវិញក្នុងរយៈពេលជាង ១ ឆ្នាំកន្លងមក មិនបានពេញលេញសម្រាប់កម្ចីឥណទានខ្នាតតូចប្រមាណ ១០ ភាគរយដែលត្រូវបានរាយការណ៍ដោយវិស័យមីក្រូហិរញ្ញវត្ថុ គឺមិនគ្រប់គ្រាន់ ដើម្បីដោះស្រាយនឹងទំហំនៃវិបត្តិនេះទេ៕