.jpg)
កម្មករនៅចម្ការកៅស៊ូឧស្សាហកម្ម ១ នៅខេត្តរតនគិរី។ ហេង ជីវ័ន
ភ្នំពេញៈ អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ និងអង្គការមូលនិធិសកលសម្រាប់ធម្មជាតិកម្ពុជា (WWF-Cambodia) បានចុះអនុស្សរណៈយោគយល់គ្នាដើម្បីចាប់ផ្តើមកិច្ចសហប្រតិបត្តិការជាលើកដំបូងក្នុងការកសាងភាពជាដៃគូពហុភាគីសម្រាប់ការលើកកម្ពស់ខ្សែចង្វាក់ផ្គត់ផ្គង់កៅស៊ូធម្មជាតិប្រកបដោយនិរន្តរភាព។
លោក សេង ទៀក នាយកអង្គការ WWF ប្រចាំកម្ពុជា និងលោក ប៉ុល សុផា អគ្គនាយកនៃអគ្គនាយកដ្ឋានកៅស៊ូបានចុះហត្ថលេខាលើអនុស្សរណៈយោគយល់គ្នា (MoU) ពីថ្ងៃទី ១២ ខែ មករា ឆ្នាំ ២០២១។
សេចក្តីប្រកាសព័ត៌មានរបស់អង្គការនេះបានលើកឡើងថា MoU នេះគឺជាឆន្ទៈរួមគ្នាក្នុងការគាំទ្រសកម្មភាពជាដៃគូពហុភាគីដែលគ្រប់ភាគីពាក់ព័ន្ធអាចចែករំលែកចំណេះដឹង និងព័ត៌មានស្តីពីផលិតកម្មកៅស៊ូប្រកបដោយនិរន្តរភាព ហើយអាចចូលរួមចំណែកទៅក្នុងគោលនយោបាយជំរុញខ្សែចង្វាក់ផ្គត់ផ្គង់កៅស៊ូធម្មជាតិ។
សេចក្តីប្រកាសព័ត៌មានបន្តថា MoU នេះក៏នឹងផ្តល់ឱកាសក្នុងការកសាងសមត្ថភាពក្នុងការអនុវត្តផលិតកម្មកៅស៊ូធម្មជាតិប្រកបដោយនិរន្តរភាពដើម្បីលើកកម្ពស់ការចូលរួមចំណែករបស់កសិករកៅស៊ូគ្រួសារក្នុងកិច្ចការពារធនធានធម្មជាតិក្នុងសហគមន៍របស់ពួកគេ។
អង្គការនេះបានឱ្យដឹងថា កិច្ចសហការគ្នានេះ ស្ថិតក្រោមជំនួយថវិការបស់ក្រសួងកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (BMZ) នៃប្រទេសអាល្លឺម៉ង់តាមរយៈអង្គការ Welthungerhilfe។ កិច្ចសហប្រតិបត្តិការភាពជាដៃគូពហុភាគីនេះកំពុងត្រូវបានអនុវត្តក្នុងប្រទេសមួយចំនួនក្នុងតំបន់អាស៊ីអាគ្នេយ៍ រួមទាំងប្រទេសថៃ និងភូមា។
នៅប្រទេសកម្ពុជា កិច្ចសហប្រតិបត្តិការនេះមានរយៈពេល ៣ ឆ្នាំ ត្រូវបានជំរុញការចូលរួម និងសហការពីភាគីពាក់ព័ន្ធសំខាន់ៗ រួមមាន រាជរដ្ឋាភិបាល វិស័យឯកជន អង្គការសង្គមស៊ីវិល និងកសិករកៅស៊ូគ្រួសារក្នុងខេត្តមណ្ឌលគិរីក្នុងការជំរុញផលិតកម្មកៅស៊ូធម្មជាតិ និងរួមចំណែកដល់ការលើកកម្ពស់ជីវភាពកសិករកៅស៊ូគ្រួសារ ជនជាតិដើមភាគតិច និងកម្មករក្នុងចម្ការកៅស៊ូ ជាដើម។
លោក សេង ទៀក បានឱ្យដឹងថា ការលើកកម្ពស់ផលិតកម្មកៅស៊ូគ្រួសារឱ្យមាននិរន្តរភាព និងការទទួលខុសត្រូវតាមរយៈការអនុវត្តការគ្រប់គ្រងបច្ចេកទេសបានត្រឹមត្រូវនៅក្នុងប្រទេស កម្ពុជាមិនត្រឹមតែជួយបង្កើតការងារ និងចំណូលសម្រាប់សហគមន៍មូលដ្ឋានប៉ុណ្ណោះទេ វាថែមទាំងជួយកាត់បន្ថយសម្ពាធលើធនធានធម្មជាតិ តាមរយៈការប្រើប្រាស់ដីដាំកៅស៊ូដែលមានស្រាប់ឱ្យអស់សុពលភាព និងទប់ស្កាត់ការទន្ទ្រានដីព្រៃខុសច្បាប់។
លោក សេង ទៀក បញ្ជាក់ថា៖ «ការចុះអនុស្សរណៈយោគយល់គ្នានេះបានបើកទំព័រថ្មីមួយទៀតសម្រាប់អង្គការ WWF កម្ពុជាលើកិច្ចខិតខំប្រឹងប្រែងធ្វើការងារក្នុងភាពជាដៃគូជាមួយស្ថាប័នជំនាញរបស់រាជរដ្ឋាភិបាល»។
បច្ចុប្បន្ននេះកសិករកៅស៊ូគ្រួសារ ១០០ គ្រួសារ ដែលរស់នៅជុំវិញសហគមន៍តំបន់ការពារចំនួន ៥ នៅជិតដែនជម្រកសត្វព្រៃស្រែពកបានចូលរួមក្នុងគម្រោងនេះក្រោមការគាំទ្រដោយអង្គការ WWF ហើយគម្រោងនេះនឹងបន្តជំរុញការចូលរួមរបស់កសិករកៅស៊ូគ្រួសាររហូតដល់ ៣០០ គ្រួសារត្រឹមឆ្នាំ ២០២២។
លោក ប៉ុល សុផា ថ្លែងថា៖ «ការកសាងសមត្ថភាព និងបណ្តុះបណ្តាលបច្ចេកទេសដល់កសិករដាំកៅស៊ូ និងមន្ត្រីជំនាញផ្នែកកៅស៊ូ រួមទាំងការចូលរួមយ៉ាងសកម្មពីគ្រប់ភាគីពាក់ព័ន្ធនឹងធ្វើឱ្យវិស័យកៅស៊ូនៅកម្ពុជាកាន់តែរីកចម្រើនទៅមុខប្រកបដោយចីរភាព»។
សេចក្តីប្រកាសព័ត៌មាននេះបានឱ្យដឹងទៀតថា ដើម្បីជាជំនួយស្មារតីក្នុងការអនុវត្តផលិតកម្មកៅស៊ូប្រកបដោយនិរន្តរភាព អគ្គនាយកដ្ឋានកៅស៊ូ មន្ទីរកសិកម្ម រុក្ខាប្រមាញ់ និង នេសាទ អង្គការ WWF និងវិទ្យាស្ថានស្រាវជ្រាវកៅស៊ូកម្ពុជា (CRRI) បានសហការបោះពុម្ពផ្សាយសៀវភៅណែនាំបច្ចេកទេសសម្រាប់ការអនុវត្តកសិកម្មល្អ (GAP) នៃការប្រមូលជ័រកៅស៊ូ និងបានរៀបចំសិក្ខាសាលាបណ្តុះបណ្តាល ព្រមទាំងបង្ហាញការអនុវត្ត ដើម្បីទទួលបានបទពិសោធបច្ចេកទេសដោយផ្ទាល់នៅតាមចម្ការកៅស៊ូគ្រួសារមួយចំនួនទៅដល់កសិករដាំដុះកៅស៊ូគ្រួសារ និងមន្ត្រីជំនាញផ្នែកកៅស៊ូរបស់រាជរដ្ឋាភិបាលសរុបចំនួន ៦០ នាក់មកពីខេត្តចំនួន ២០ នៃប្រទេសកម្ពុជា។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្ពុជានាំចេញកៅស៊ូក្នុងបរិមាណសរុប ៣៤០ ០០០ តោន ដែលមានតម្លៃសរុប ៤៥៩ លានដុល្លារនៅក្នុងឆ្នាំ ២០២០។
លោករដ្ឋមន្ត្រីបានបញ្ចេញតួលេខកៅស៊ូកាលពីដើមខែមករា ដែលបង្ហាញឱ្យឃើញថា គិតត្រឹមដំណាច់ឆ្នាំ ២០២០ កម្ពុជាមានផ្ទៃដីដាំដុះកៅស៊ូសរុប ៤០១ ៩១៤ ហិកតា ដោយក្នុងនោះកៅស៊ូឧស្សាហកម្មមានចំនួន ២៤០ ៨១១ ហិកតា ដែលស្មើនឹងប្រមាណ ៦០ ភាគរយនៃផ្ទៃដីកៅស៊ូសរុប និងចំណែកក្រៅពីនោះជាចំនួនកៅស៊ូគ្រួសារ៕ LA
