.jpg)
ភ្ញៀវទេសចរបរទេសកំពុងសួរអ្នករត់រ៉ឺម៉កកង់ ៣ អំពីទិសដៅនៅក្នុងទីក្រុងភ្នំពេញកន្លងមក។ ហេង ជីវ័ន
ភ្នំពេញៈ សេវាកម្មវិធីហៅតាក់ស៊ីជិះតាមអនឡាញ បច្ចុប្បន្នកាន់តែមានភាពពេញនិយមនៅក្នុងទីក្រុងភ្នំពេញដែលពឹងផ្អែកលើមធ្យោបាយធ្វើដំណើរផ្ទាល់ខ្លួនជាជាងសេវាសាធារណៈ។
សេវានេះកំពុងបង្ហាញពីការរីកចម្រើនគួរឲ្យកត់សម្គាល់គិតចាប់តាំងពីដើមឆ្នាំនេះនៅទីក្រុងភ្នំពេញដូចជា កម្មវិធី PassApp កម្មវិធី Grab និងកម្មវិធី ExNet ដែលភាគច្រើនអាចរកបាននៅរ៉ឺម៉កម៉ូតូកង់ ៣ ឬ តុកតុក។
ប៉ុន្តែជាមួយកំណើននៃការប្រកួតប្រជែងសេវានេះមួយចំនួនត្រូវបានគេឃើញថាខ្វះគុណភាព ខណៈមានការត្អូញតែ្អរដោយអតិថិជនថា អ្នកបើកបរភាគច្រើនមិនសូវយល់ដឹងច្បាប់ចរាចរណ៍ និងខ្វះភាពស្មោះត្រង់។
លោក ទុំ បុត្រ ប្រជាពលរដ្ឋរស់នៅទីក្រុងភ្នំពេញដែលតែងតែប្រើប្រាស់កម្មវិធី PassApp សម្រាប់ការធ្វើដំណើររបស់លោកនៅក្នុងទីក្រុងភ្នំពេញបានបង្ហាញយោបល់ផ្សេងគ្នាអំពីសេវានេះ។ លោកថ្លែងថា៖ «ខ្ញុំតែងតែប្រើប្រាស់កម្មវិធីអនឡាញ ដើម្បីហៅតាក់ស៊ីជិះវាពិតជាល្អ និងងាយស្រួលសម្រាប់ខ្ញុំ ហើយមិនត្រូវការការចរចាតម្លៃនោះទេ»។
លោក ទុំ បុត្រ បានថ្លែងថាវត្តមានរបស់កម្មវិធីហៅតាក់ស៊ីជិះនៅក្នុងទីក្រុង នៅពេលនេះកំពុងផ្លាស់ប្តូរជាបណ្ដើរៗនូវរបៀបនៃការរស់នៅប្រចាំថ្ងៃរបស់ប្រជាជន។
ប៉ុន្តែលោកថ្លែងថា ខណៈអ្នកបើកបរពឹងទាំងស្រុងលើផែនទី កំហុសភាគច្រើនកើតឡើង។ លោកបញ្ជាក់ថា៖ «អ្នកបើកបរភាគច្រើន ពឹងផ្អែកខ្លាំងលើផែនទី ដែលពួកគេមិនដឹងទីតាំង ឬមិនអាចមើលផែនទីបាន ដូច្នេះវាត្រូវការពេលវេលាច្រើនដើម្បីមកដឹកខ្ញុំ»។
កង្វះការបណ្ដុះបណ្ដាលបានធ្វើឲ្យអ្នកបើកបរភាគច្រើនមានបញ្ហាជាមួយនឹងការយល់ដឹងច្បាប់ចរាចរណ៍ និងភាពស្មោះត្រង់ចំពោះអតិថិជន។
លោក ទុំ បុត្រ បានថ្លែងថា៖ «ពួកគេភាគច្រើនមិនគោរពភ្លើងសញ្ញាចរាចរណ៍ មិត្តភក្ដិរបស់ខ្ញុំមួយចំនួនប្រាប់ខ្ញុំថា អ្នកបើកបរមួយចំនួនឈ្លើយ និងព្យាយាមទារប្រាក់ច្រើន ប្រសិនបើពួកគេដឹងថា អតិថិជនមិនសូវចេះប្រើកម្មវិធីនេះ»។
ជាមួយកំណើនកម្មវិធីហៅតាក់ស៊ីជិះក្នុងស្រុកកម្មវិធីហៅតាក់ស៊ីជិះក្នុងតំបន់ ដូចជា Grab ដែលបានចូលទីផ្សារប្រទេសកម្ពុជាកាលពីឆ្នាំមុនកំពុងពង្រីកសេវានេះ។
ក្រៅពីផ្តល់សេវាតាក់ស៊ី Grab បានដំណើរការជាផ្លូវការសេវាម៉ូតូឌុបរបស់ខ្លួន និងសេវារ៉ឺម៉កម៉ូតូនៅភ្នំពេញ និងសៀមរាបកាលពីដើមឆ្នាំនេះ។
លោក Oliver ជាអតិថិជនផ្សេងទៀតបានត្អូញត្អែរអំពីប្រព័ន្ធអនឡាញដែលកំហុសបានកើតឡើងជារឿយៗហើយអ្នកបើកបរមួយចំនួនមិនចេះមើលផែនទីនោះទេ។ លោកថ្លែងថា៖ «ភាគច្រើនល្អសម្រាប់ខ្ញុំ ប៉ុន្តែជួនកាលអ្នកបើកបរមិនចេះមើលផែនទី GPS ឬបានធ្វើដំណើរខុសទិសដៅ»។
អ្នកបើកបរកម្មវិធី Passapp ភាគច្រើនជាអ្នកបើកបររ៉ឺម៉កម៉ូតូបានប្រាប់ភ្នំពេញប៉ុស្ដិ៍ថា ពួកគេប្រឈមបញ្ហាជាមួយផែនទី ខណៈមានកង្វះការបណ្ដុះបណ្ដាល។
លោក មុំ ឡាឌី ដែលជាសមាជិកកម្មវិធី PassApp រយៈពេលជិត ៤ ខែមកហើយបានថ្លែងថាក្រៅពីទទួលបានអតិថិជនតាមរយៈកម្មវិធីអនឡាញ ក្រុមហ៊ុនមិនបានផ្ដល់ការបណ្ដុះបណ្ដាលណាមួយអំពីច្បាប់ចរាចរណ៍ ឬការបើកបរដោយសុវត្ថិភាពនោះទេ។
លោកថ្លែងថា៖ «ខ្ញុំគ្រាន់តែទៅចុះឈ្មោះបុគ្គលិកគ្រាន់តែណែនាំខ្ញុំអំពីរបៀបប្រើប្រាស់កម្មវិធីអនឡាញ និងត្រួតពិនិត្យផែនទីប៉ុណ្ណោះ ពួកគេមិនបានផ្ដល់ការបណ្ដុះបណ្ដាលអំពីសេវាប្រកបដោយគុណភាព ឬច្បាប់ចរាចរណ៍នោះទេ»។
នៅពេលសួរថា តើលោកយល់ដឹងល្អអំពីច្បាប់ចរាចរណ៍ដែរឬទេលោក មុំ ឡាឌី ទទួលស្គាល់ថាអ្នកបើកបរមួយចំនួនរំលោភច្បាប់នេះ។ លោកបញ្ជាក់ថា៖ «ខ្ញុំគិតថាក្រុមហ៊ុនគួរតែយកចិត្តទុកដាក់អំពីគុណភាពជាជាងបង្កើនសមាជិក ដោយសារតែអ្នកបើកបរមួយចំនួនមិនគោរពច្បាប់ចរាចរណ៍ ហើយរំលោភភ្លើងសញ្ញាចរាចរណ៍ទៀតផង»។
លោក សំ ចាន់នី ជាអ្នកបើកបរផ្សេងទៀតបានត្អូញត្អែរអំពីកំហុសបច្ចេកទេសដែលកើតឡើងភាគច្រើនជាមួយកម្មវិធីនេះ។ លោកបន្តថា៖ «វាពិបាកក្នុងការធ្វើតាមផែនទី ផែនទីបង្ហាញខ្ញុំខុសទិសដៅ ដូច្នេះខ្ញុំមិនអាចទៅដឹកអតិថិជនទាន់ពេលនោះទេ»។
ភ្នំពេញប៉ុស្ដិ៍បានព្យាយាមទាក់ទងដើម្បីស្វែងរកការអត្ថាធិប្បាយពី
ក្រុមហ៊ុន PassApp ពាក់ព័ន្ធនឹងការត្អូញត្អែរនេះជាច្រើនលើក ប៉ុន្តែមិនទទួលបានចម្លើយរហូតដល់កាសែតចេញផ្សាយនៅថ្ងៃនេះ។
លោក វ៉ា ស៊ឹមសូរិយា អ្នកនាំពាក្យក្រសួងសាធារណការ និងដឹកជញ្ជូនបានថ្លែងថា ផ្អែកលើកិច្ចព្រមព្រៀងសម្រាប់ប្រតិបត្តិការអាជីវកម្មនៅក្នុងវិស័យដឹកជញ្ជូនសាធារណៈរវាងក្រុមហ៊ុន និងក្រសួង ក្រុមហ៊ុនមានកាតព្វកិច្ចធានាសេវាមានគុណភាពដល់សាធារណជន។
លោកបញ្ជាក់ថា៖ «យើងនឹងពិនិត្យមើលសេវាគុណភាពជាសាធារណៈ និងនិយាយជាមួយក្រុមហ៊ុនលើករណីនេះ»។
លោកបន្តថា៖ «ការផ្ដល់វគ្គបណ្ដុះបណ្ដាលចរាចរណ៍ជាកាតព្វកិច្ចក្រុមហ៊ុន ប៉ុន្តែបើក្រុមហ៊ុនខ្វះធនធាន ក្រសួងអាចផ្ដល់គ្រូបណ្ដុះបណ្ដាលបាន»។
លោកស្រី ផុន ផល្លីន អ្នកគ្រប់គ្រងផ្នែករដ្ឋបាលនៃកម្មវិធីហៅតាក់ស៊ីជិះក្នុងស្រុក «តោះ តោះ» ថ្លែងថាបញ្ហាប្រឈមតែងតែកើតមាន ជាពិសេសកំហុសផែនទី ឬកម្មវិធីអនឡាញ។ លោកស្រីថ្លែងថា៖ «ទោះបីជាអ្នកបើកអាជីវកម្មយូរហើយក៏ដោយ ក៏កំហុសមានជារឿយៗ ប៉ុន្តែយើងគឺជាក្រុមហ៊ុនផ្ដល់សេវាដឹកជញ្ជូន យើងតែងតែព្យាយាមក្នុងការស្វែងយល់ និងធ្វើវាឲ្យកាន់តែប្រសើរ»។
លោកស្រីបន្ថែមថា៖ «ប៉ុន្តែយើងព្យាយាមជំរុញដល់អ្នកបើកបរផ្អែកលើឥរិយាបថល្អ»។
ទោះបីយ៉ាងនេះក្តីអ្នកស្រី ឈុន រតនា អ្នកប្រើប្រាស់សេវាហៅតាក់ស៊ីជិះតាមអនឡាញម្នាក់នៅភ្នំពេញ បង្ហាញចិត្តសប្បាយរីករាយជាមួយនឹងសេវាកម្មវិធីហៅតាក់ស៊ីជិះនៅទីក្រុងនេះ។ អ្នកស្រីបន្តថា៖ «ខ្ញុំចូលចិត្តជិះរ៉ឺម៉កម៉ូតូ តាមរយៈកម្មវិធីហៅតាមអនឡាញ ព្រោះខ្ញុំមិនមានការបារម្ភអំពីការចរចាតម្លៃ ហើយវាមានតម្លៃទាបជាងរ៉ឺម៉កម៉ូតូធម្មតា»៕LA
