The Phnom Penh Post Search

Search form




Logo of Phnom Penh Post newspaper Phnom Penh Post - អតិផរណា​ឆមាស​ទី១​ស្ថិត​នៅ​ ៤,២%

អតិផរណា​ឆមាស​ទី១​ស្ថិត​នៅ​ ៤,២%

អាជីវកម្មលក់​ត្រី សាច់ និងគ្រឿងទេសនៅផ្សារធំថ្មី ​​។ រូបថត ហុង មិនា
អាជីវកម្មលក់​ត្រី សាច់ និងគ្រឿងទេសនៅផ្សារធំថ្មី។ ហុង មិនា

អតិផរណា​ឆមាស​ទី១​ស្ថិត​នៅ​ ៤,២%

ភ្នំពេញៈ អត្រាអតិផរ​ណា​របស់​កម្ពុជា​មាន​ ៤,២ ​ភាគរយ​នៅ​ឆមាស​ទី១​ ឆ្នាំនេះ​បើ​ធៀប​រយៈពេល​ដូច​គ្នា​កាល​ពី​ឆ្នាំ​មុន។

ធនាគារកណ្ដាល ​និង​សេដ្ឋវិទូ​អះអាង​កំណើន​ដ៏​តិច​នេះ​ដោយសារ​តែ​ស្ថិរភាព​រូបិយប័ណ្ណ​ក្នុង​ស្រុក​ធៀប​នឹង​​ប្រាក់​ដុល្លារ​អាមេរិក​ តម្លៃ​​ប្រេង​ពិភព​លោក​មាន​ការ​ប្រែ​ប្រួល​តិច​តួច​ដែល​ជា​កត្តា​សំខាន់​ក្នុង​ការ​ជំរុញ​​ឲ្យ​តម្លៃ​ម្ហូប​អាហារ​កើន​ឡើង ​ហើយ​ថា​កំណើន​ឥណទាន​ថ្មី​ៗ​នេះ​​មិន​ប៉ះ​ពាល់​ដល់​តម្លៃ​ទេ​។

លោក​ ជា​ ចាន់​តូ​ ទេសាភិបាលធនាគារ​ជាតិ​នៃ​កម្ពុជា​ បាន​ថ្លែង​កាល​ពី​ដើម​ខែ​សីហា​ថា ​ធនាគារ​កណ្ដាល​តែង​តែ​រក្សា​ការ​ឃ្លាំ​មើល​លើ​ការ​ប្រែប្រួល​តម្លៃ​រូបិយ​ប័ណ្ណ​ប្រាក់​រៀល​ធៀប​នឹង​តម្លៃ​ប្រាក់​ដុល្លារ​អាមេរិក​ ដើម្បី​ធ្វើ​ឲ្យ​វា​មាន​ស្ថិរភាព​រក្សា​ស្ថិរភាព​តម្លៃ​ និង​ធ្វើ​ការ​គ្រប់​គ្រង​អត្រា​អតិផរណា​ឲ្យ​មាន​កម្រិត​ទាប​។

លោក​ ជា​ ចាន់​តូ ​លើក​ឡើង​ថា៖ «នៅក្នុង​ឆមាស​ទី១​នេះ តម្លៃ​ប្រាក់​រៀល​បន្ត​​មាន​ស្ថិរភាព​ល្អ​ប្រសើរ​ដោយ​ប្រែ​ប្រួល​​ក្នុង​រង្វង់​ ៤ ០០០ ​រៀល​ក្នុង​មួយ​ដុល្លារ​អាមេរិក។ ​ជារួម អតិផរណា​ត្រូវ​បាន​រក្សា​ក្នុង​កម្រិត​ទាប​ដែល​ជា​កម្រិត​អាច​គ្រប់​គ្រង​បាន​»​។

លោក ​Hiroshi ​SUZUKI ​ប្រធាន​សេដ្ឋ​វិទូ​នៅ​វិទ្យា​ស្ថាន​ស្រាវ​ជ្រាវ​​កម្ពុជា​បាន​ថ្លែង​ថា​ អត្រា​អតិផរណា​ដែល​មាន​ចំនួន​តិច​ជាង​​ ៥ ​ភាគរយ​បញ្ជាក់​ពី​ដំណើរ​ការ​ដ៏​ល្អ​របស់​ម៉ាក្រូ​សេដ្ឋកិច្ច​​។

លោក​បន្តថា៖«អត្រាអតិផរណា​មាន​ស្ថិរភាព​គឺជា​មូលដ្ឋាន​គ្រឹះ​នៃ​ការ​គ្រប់​គ្រង​ម៉ាក្រូ​សេដ្ឋកិច្ច»។ ​ប៉ុន្តែ​លោក​បាន​​ព្រមាន​ថា​ សម្រាប់​ករណី​​កម្ពុជា​ កត្តា​ខាង​ក្រៅ​ ដូចជា​តម្លៃ​​ប្រេង​អន្តរជាតិ​ អត្រា​ប្តូរប្រាក់​រវាង​រូបិយ​ប័ណ្ណ​ប្រទេស​ជិត​ខាង​ និង​ប្រាក់​ដុល្លារ​អាមេរិក​ មាន​ផល​ប៉ះពាល់​​ខ្លាំង​​លើ​អត្រា​អតិផរណា​។

លោក​បញ្ជាក់​ថា​៖ «​ដូច្នេះ​ការ​ពង្រឹង​គោល​​នយោ​បាយ​បន្ធូរ​បន្ថយ​ចំពោះ​វិបត្តិ​ហិរញ្ញវត្ថុ​ដូច​ជា ​គំនិត​ផ្តួច​ផ្តើម​ឈាងម៉ៃ​ (CMIM) ​ជា​គោល​នយោបាយ​សំខាន់​បំ​ផុត​ស​ម្រាប់​កំណើន​​យ៉ាង​រហ័ស​ និងមាន​ស្ថិរភាព​របស់​វិស័យ​ហិរញ្ញ​វត្ថុ​កម្ពុជា​»។

របាយ​ការណ៍​របស់​ធនាគារ​ជាតិ​នៃ​កម្ពុជា​​បាន​បង្ហាញ​ផង​ដែរ​ថាការ​ផ្តល់​កម្ចី​នៅ​កម្ពុជា​បាន​កើន​ឡើង ២៨ ​ភាគរយ​ក្នុង​អំឡុង​ឆមាស​ទី​១​ ខណៈ​ដែល​ទុន​បម្រុង​បរទេស​របស់​ខ្លួន​បាន​កើន​ឡើង ២០​ភាគ​រយ​ដល់​​ ៤,៩ ​ពាន់​លាន​ដុល្លារ​អាមេរិក​​ធៀប​នឹង​អំឡុង​ឆមាស​ទី១ ឆ្នាំ​មុន​ ដែល​អាច​មាន​លទ្ធភាព​ធានា​រ៉ាប់រង​លើ​ការ​នាំចូល​ទំនិញ​រយៈ​ពេល​​៤ខែ​។

លោក​ ជា ​ចាន់​តូ ​បន្ថែម​ថា៖ «នោះ​គឺ​ជា​កម្រិត​ខ្ពស់​ល្មម​សម្រាប់​បណ្ដា​ប្រទេស​កំពុង​អភិវឌ្ឍន៍​។ ​ការ​គ្រប់​គ្រង​ទុន​បម្រុង​បរ​ទេស​ត្រូវ​បាន​អនុ​វត្ត​យ៉ាង​ប្រុង​ប្រយ័ត្ន​គោរព​តាម​មូល​ដ្ឋាន​សេដ្ឋកិច្ច​ជាតិ​យ៉ាង​តឹង​រ៉ឺង»។

លោក Suzuki ​លើក​ឡើង​ថា៖ «សេដ្ឋ​កិច្ច​កម្ពុជា​ពឹង​លើ​ប្រាក់​ដុល្លារ​ខ្លាំង បើក​ចំហ និង​សេរី។ ផល​ប៉ះពាល់​កំណើន​ឥណទាន​ចំពោះ​សេដ្ឋកិច្ច​ទាំង​មូល​ ពិសេស​ចំពោះ​អត្រា​អតិផរណា​គឺ​ត្រូវ​បាន​កម្រិត​​ជាង​អត្រា​អតិផរ​ណា​របស់​បណ្ដា​ប្រទេស​ផ្សេង​ទៀត​»៕PB

អត្ថបទគួរចាប់អារម្មណ៍