ក្រុងប៉េកាំងៈ ទិន្នន័យផ្លូវការបានបង្ហាញកាលពីថ្ងៃព្រហស្បតិ៍ថា អតិរេកពាណិជ្ជកម្មរបស់ប្រទេស ចិន ជាមួយសហរដ្ឋអាមេរិកបានថយចុះកាលពីខែមករា បើទោះជាការនាំចូលរបស់អាមេរិកបានបន្តធ្លាក់ចុះក្តី ខណៈដែលក្រុមមន្ត្រីមកពីប្រទេសមហាអំណាចសេដ្ឋកិច្ចពិភពលោកទាំង ២ កំពុងពិភាក្សាគ្នាអំពីពាណិជ្ជកម្មក្នុងទីក្រុងប៉េកាំង។
ទិន្នន័យរបស់រដ្ឋបាលគយបានបង្ហាញថា ការនាំចេញរបស់ប្រទេស ចិន នៅទូទាំងតំបន់ប៉ាស៊ីហ្វិកបានធ្លាក់ចុះជាង ២ ភាគរយក្នុងខែមករា ធៀបនឹងរយៈពេលដូចគ្នាកាលពីឆ្នាំមុន បន្ទាប់ពីបានធ្លាក់ចុះកាលពីខែធ្នូ។
ប៉ុន្តែអតិរេកពាណិជ្ជកម្មចិនជាមួយសហរដ្ឋអាមេរិកសម្រាប់ខែមករានេះមានចំនួន ២៧,៣ ពាន់លានដុល្លារ។ កាលពីឆ្នាំមុន អតិរេកនេះបានកើនឡើងដល់កម្រិតខ្ពស់បំផុត ៣២៣,២ ពាន់លានដុល្លារ។
អតិរេកពាណិជ្ជកម្មនេះ គឺជាប្រភពកំហឹងដ៏ធំមួយនៅក្នុងរដ្ឋាភិបាលរបស់លោកប្រធានាធីបតី ដូណាល់ ត្រាំ ដែលបានដកហូតពន្ធលើទំនិញចិនតម្លៃរាប់រយពាន់លានដុល្លារកាលពីឆ្នាំមុន និងបានគំរាមដកហូតពន្ធបន្ថែមទៀត។
ក្រុមមន្ត្រីមកពីប្រទេសទាំង ២ កំពុងចរចាគ្នានៅទីក្រុងប៉េកាំង ក្នុងគោលបំណងដោះស្រាយជម្លោះពាណិជ្ជកម្មរបស់ប្រទេសទាំង ២។
លោក ត្រាំ កាលពីខែធ្នូ បានពន្យារពេលផែនការដំឡើងពន្ធលើទំនិញចិនដែលតម្លៃ ២០០ ពាន់លានដុល្លាររហូតដល់ថ្ងៃទី ១ ខែមីនា ដើម្បីអនុញ្ញាតឲ្យមានពេលវេលាបន្ថែមទៀតសម្រាប់ការចរចា។ នៅសប្តាហ៍នេះ លោកបានបង្ហាញថា លោកបើកចំហបន្ថែមទៀតឲ្យមានការពន្យារពេលបទឈប់បាញ់ផ្នែកពាណិជ្ជកម្មដោយអាស្រ័យលើការចរចានៅក្នុងទីក្រុងប៉េកាំងនៅសប្តាហ៍នេះ។
ការនាំចេញរបស់ចិនទៅកាន់គ្រប់ប្រទេសនៅលើពិភពលោក លើកលែងសហរដ្ឋអាមេរិក បានកើនឡើង ០,១ ភាគរយនៅខែមករាធៀបនឹងឆ្នាំ ២០១៨៕ AFP/KC