The Phnom Penh Post Search

Search form




Logo of Phnom Penh Post newspaper Phnom Penh Post - អតីត​បុគ្គលិក អឹមហ្វូន ទទួល​បាន​សំណង​លើក​ទីពីរ

អតីត​បុគ្គលិក អឹមហ្វូន ទទួល​បាន​សំណង​លើក​ទីពីរ

អតីត​បុគ្គលិក អឹមហ្វូន ទទួល​បាន​សំណង​លើក​ទីពីរ

131112_12
អ្នកធ្វើដំណើរជិៈម៉ូតូកាត់មុខអតីតការិយាល័យក្រុមហ៊ុនអឹមហ្វូន ផ្លូវមុនីវង្ស ម៉ៃ វីរៈ

ភ្នំពេញៈ អឹមហ្វូន ជា​ក្រុមហ៊ុន​ទូរគមនាគមន៍​ក្ស័យធន​នៅ​កម្ពុជា កាល​ពី​ថ្ងៃ​ចន្ទ​បាន​បង់​ប្រាក់ ៣០ ភាគរយ​បន្ថែម​ទៀត​នៃ​ចំនួន​សរុប ៤,៤ លាន​ដុល្លារ​ឲ្យ​អតីត​បុគ្គលិក​ជាង១ ០០០ នាក់។

ការ​បង់​ប្រាក់​នេះ​ជា​លើក​ទី​ពីរ​បន្ទាប់​ពី​ការ​ធ្វើ​កូដកម្ម​ជាច្រើន ដង​របស់​អតីត​បុគ្គលិក​ក្នុង​ការ​ទាម​ទារ​ប្រាក់​អតីតភាព​ការងារ​របស់​ខ្លួន ក្រោយ​ពី​ក្រុមហ៊ុន​នេះ​ក្ស័យធន។

លោក ខាន់ សេរីវុទ្ធី អ្នក​ប្រឹក្សា​ផ្នែក​ច្បាប់​ជាន់​ខ្ពស់​របស់​លោក អ៊ុក រី អភិបាល​បណ្ដោះ​អាសន្ន​របស់​ក្រុមហ៊ុន អឹមហ្វូន បាន​ប្រាប់ ភ្នំពេញ ប៉ុស្ដិ៍ កាល​ពី​ថ្ងៃ​ចន្ទ​ថា អតីត​បុគ្គលិក​របស់​ក្រុមហ៊ុន អឹមហ្វូន ទាំងអស់​កំពុង​នាំ​គ្នា​មក​ទទួល​ប្រាក់​សំណង​ជា​លើក​ទី​ពីរ។ លោក​បន្ត​ថា៖ «កាល​ពី​ម្សិលមិញ​យើង​ផ្ដល់​ប្រាក់ ៣០ ភាគរយ​បន្ថែម​ទៀត​ឲ្យ​ពួក​គេ​ជាង ១ ០០០ នាក់ ព្រោះ​យើង​បាន​សន្យា​ហើយ​ថា ពួកគេ​មាន​អាទិភាព​មុន​គេ​នៅ​ពេល​ណា​ដែល​ទ្រព្យ​សកម្ម​បាន​លក់។ នេះ​គឺជា​លើក​ទី​ពីរ​ចាប់​តាំង​ពី​យើង​បាន​សង​ដល់​ពួក​គេ​បាន​ចំនួន ១០ ភាគរយ​នៅ​មុន​ពេល​បោះឆ្នោត»។

លោក​បាន​និយាយ​ថា ប្រាក់​នេះ​ទទួល​បាន​ពី​ការ​លក់​ទ្រព្យ​សកម្ម​ដែល​ជា​បណ្ដាញ​សំខាន់ៗ របស់ អឹមហ្វូន ឲ្យ​ក្រុមហ៊ុន Khmer Unity Network Communicate Co.Ltd កាន់​កាប់​ដោយ​វិនិយោគិន​ជនជាតិ ចិន។ ប៉ុន្តែ​លោក​មិន​បាន​ប្រាប់ ពី​តម្លៃ​បាន​ពី​ការ​លក់​នោះ​ទេ។ លោក​បន្ត​ថា៖ «ស្ថិត​ក្រោម​កិច្ច​សន្យា​នេះ ពួកគេ​នឹង​សង​យើង​តាម​ដំណាក់កាល​។ នេះ​មាន​ន័យ​ថា ការ​សង​របស់​យើង​ឲ្យ​ម្ចាស់​បំណុល​នឹង​ធ្វើ​តាម​ដំណាក់កាល​នេះ​ផង​ដែរ»។

លោក​បន្ត​ថា៖ «លុយ​នៅ​សល់​យើង​នឹង​សង​ឲ្យ​ម្ចាស់​បំណុល​របស់​យើង»។ លោក​លើក​ឡើង​ថា ពេល​នេះ​ក្រុមហ៊ុន​ចិន​បាន​ពន្យារ​ពេល​ការ​បង់​ប្រាក់​ជាច្រើន​ដង។ លោក​បន្ត​ថា៖ «យើង​បាន​ជូន​ដំណឹង​ដល់​ពួក​គេ​ជាច្រើន​ដង​រួច​ហើយ ប៉ុន្តែ​ពេល​នេះ​ពួកគេ​ឆ្លើយ​តប។ យើង​សង្ឃឹម​ថា ពួកគេ​នឹង​បង់​ប្រាក់​ឲ្យ​យើង​ក្នុង​ពេល​ឆាប់ៗ​នេះ»។

លោក គួយ ធុនណា មេធាវី​របស់​ក្រុមហ៊ុន Huwie បាន​និយាយ​ថា រហូត​មក​ដល់​ពេល​នេះ​លោក​មិន​ទាន់​ទទួល​បាន​ការ​សង​ប្រាក់​ពី​ក្រុមហ៊ុន អឹមហ្វូន នៅ​ឡើយ​ទេ។

លោក ប៉ាង វុទ្ធី អ្នក​តំណាង​អតីត​បុគ្គលិក​របស់​ក្រុមហ៊ុន អឹមហ្វូន បាន​អះអាង​ពី​ការ​សង​ប្រាក់​លើក​ទីពីរ កាល​ពី​ម្សិលមិញ​ថា៖ «យើង​ពិត​ជា​មាន​ការ​ពេញ​ចិត្ត​ជាមួយ​នឹង​លោក​អភិបាល​បណ្ដោះ​អាសន្ន​ដែល​រក្សា​ពាក្យ​សន្យា​របស់​ខ្លួន​ទោះ​បី​ជា​ការ​សង​ប្រាក់​នេះ​មាន​ពេល​យឺត​បន្តិច​ក៏​ដោយ។ យើង​ទទួល​ស្គាល់​ឆន្ទៈ​របស់​ពួក​គេ​ក្នុង​ការ​សង​ប្រាក់​ដល់​ពួក​យើង»។

លោក ខាន់ សេរីវុទ្ធី បាន​និយាយ​ថា លោក​នឹង​ដាក់​ពាក្យ​បណ្ដឹង​ទៅ​តុលាការ​ភ្នំពេញ​ប្រឆាំង​ក្រុមហ៊ុន​ផ្សេង​ទៀត​ដែល​បាន​ជំពាក់​ប្រាក់​ក្រុមហ៊ុន អឹមហ្វូន ដើម្បី​រក​ប្រាក់​បន្ថែម​ក្នុង​ការ​សង​ដល់​អតីត​បុគ្គលិក​ទាំង​អស់​នោះ។

លោក​បាន​បន្ត​ថា ក្រុមហ៊ុន មិត្តហ្វូន កាន់​កាប់​ដោយ​វិនិយោគិន​ជនជាតិ វៀតណាម បាន ជំពាក់​ប្រាក់​ជាង ៥០០ ០០០ ដុល្លារ វ៉ីង ជំពាក់​ប្រហែល ១៤០ ០០០ ដុល្លារ ក្រុមហ៊ុន Royal Telecommunication International ជិត ៥០ ០០០ ដុល្លារ និង​ក្រុមហ៊ុន EZCOMជិត ១០០ ០០០ ដុល្លារ។ លោក​បន្ត​ថា ថ្មីៗ​នេះ​ក្រុមហ៊ុន អឹមហ្វូន បាន​ទទួល​ប្រាក់​ប្រហែល ១០០ ០០០ ដុល្លារ ពី​ក្រុមហ៊ុន Mobitel។

បច្ចុប្បន្ន​ក្រុមហ៊ុន អឹមហ្វូន បាន​ជំពាក់​បំណុល​ក្រុមហ៊ុន​បច្ចេកវិទ្យា​ទូរគមនាគមន៍ Huawei កាន់​កាប់​ដោយ​វិនិយោគិន​ជនជាតិ​ចិន​ជាង ៦៥ លាន​ដុល្លារ​និង​ក្រុមហ៊ុន Altect ប្រហែល ៥ លាន​ដុល្លារ​។ ទ្រព្យ​សកម្ម​របស់​ក្រុមហ៊ុន អឹមហ្វូន ដែល​ត្រូវ​បាន​ប៉ាន់​ប្រមាណ​ថា មាន​ចំនួន ១០៥ លាន​ដុល្លារ​គឺ​គ្រាន់​តែ​តម្លៃ​ក្នុង​បញ្ជី​ប៉ុណ្ណោះ ប៉ុន្តែ​តម្លៃ​ទីផ្សារ​ពិត​ប្រាកដ​អាច​មាន​ច្រើន​បំផុត​ពី ៣០ លាន​ដុល្លារ ដល់ ៤០ លាន​ដុល្លារ៕ PB

អត្ថបទគួរចាប់អារម្មណ៍