The Phnom Penh Post Search

Search form




Logo of Phnom Penh Post newspaper Phnom Penh Post - អតីត​រោងចក្រ​ទឹកក្រូច ប៉ិបស៊ី យក​មក​ធ្វើ​រោងចក្រ​ទឹក​ស្អាត

អតីត​រោងចក្រ​ទឹកក្រូច ប៉ិបស៊ី យក​មក​ធ្វើ​រោងចក្រ​ទឹក​ស្អាត

អតីត​រោងចក្រ​ទឹកក្រូច ប៉ិបស៊ី យក​មក​ធ្វើ​រោងចក្រ​ទឹក​ស្អាត

បាត់ដំបងៈ អតីត​រោងចក្រ​ទឹក​ក្រូច ប៉ិបស៊ី (Pepsi) នៅ​ខេត្ត បាត់ដំបង ដែល​ត្រូវ​បាន​បោះបង់​ចោល​ជា​យូរ​មក​ហើយ​ត្រូវ​បាន​វាយ​កម្ទេច​ចោល​ដើម្បី​សាងសង់​រោងចក្រ​ផលិត​ទឹក​ស្អាត។

លោក ឯក សុនចាន់ រដ្ឋ​លេខាធិការ​ក្រសួង ឧស្សាហកម្ម រ៉ែ និង​ថាមពល​បាន​និយាយ​ថា ទីភ្នាក់ងារ​សហ​ប្រតិបត្តិការ​អន្តរជាតិ​ជប៉ុន (JICA) ជា​អ្នក​ផ្ដល់​មូលនិធិ​ដល់​គម្រោង​នេះ។ លោក​ថ្លែង​ថា៖ «យើង​ទទួល​បាន​ជំនួយ​ឥត​សំណង​ពី​រដ្ឋាភិបាល​ជប៉ុន​តាម​រយៈ JICA ដើម្បី​កសាង​រោងចក្រ​ផលិត​ទឹក​ស្អាត​ដោយ​សារ​តែ​យើង​ចង់​មាន​ប្រព័ន្ធ​ទឹក​ស្អាត​មួយ​នៅ​ខេត្ត បាត់ដំបង»។ លោក​បន្ត​ថា៖ «ខ្ញុំ​គិត​ថា​ពេល​បច្ចុប្បន្ន JICA កំពុង​ស្វែង​រក​អ្នក​ចុះ​កិច្ច​សន្យា​ដើម្បី​ធ្វើការ​លើ​គម្រោង​នេះ»។

លោក ម៉ក់ ស៊ីនណារ៉ា អនុ​ប្រធាន​មន្ទីរ​ទេសចរណ៍​ខេត្ត បាត់ដំបង បាន​អះអាង​ថា គម្រោង​វាយកម្ទេច​ចោល​នេះ​ទំនង​ជា​បាន​ចាប់​ផ្ដើម​នៅ​ដើម​ខែ​នេះ។

កាល​ពី​ថ្ងៃទី ១៩ ខែ មិថុនា លោក គាត ឈន់ រដ្ឋ​មន្រ្តី​ក្រសួង សេដ្ឋកិច្ច និង​ហិរញ្ញវត្ថុ​បាន​ចុះ​ហត្ថលេខា​លើ​កិច្ច​ព្រម​ព្រៀង​មួយ​ជាមួយ​លោក Izaki Hiroshi តំណាង​ប្រធាន JICA នៅ​កម្ពុជា​សម្រាប់​គម្រោង​ប្រព័ន្ធ​ផ្គត់​ផ្គង់​ទឹក​ស្អាត​មាន​តម្លៃ ៣៣,៥ លាន​ដុល្លារ​នៅ​ខេត្ត កំពង់ចាម និង ខេត្ត បាត់ដំបង។

JICA បាន​ឲ្យ​ដឹង​ថា មាន​ប្រជាជន​ប្រមាណ ៣០ ភាគរយ​ប៉ុណ្ណោះ​ក្នុង​តំបន់​នោះ​មាន​ទឹក​ស្អាត ប្រើ​ប្រាស់​ព្រោះ​រោងចក្រ​ដែល​មាន​ស្រាប់​មិន​មាន​សមត្ថភាព​ផលិត បាន​គ្រប់​គ្រាន់។

នៅ​ទសវត្សរ៍​ឆ្នាំ ១៩៦០ រោងចក្រ​ទឹកក្រូច ប៉ិបស៊ី ត្រូវ​បាន​ដំណើរការ​ក្នុង​សម័យ​សង្គម រាស្ដ្រ​និយម​ក្រោម​ការ​ដឹក​នាំ​របស់​សម្តេច នរោត្តម សីហនុ។

ដំណើរការ​នៅ​រោងចក្រ​នេះ​ត្រូវ​បាន​បញ្ឈប់​នៅ​ក្នុង​សម័យ​ខ្មែរ​ក្រហម​ឡើង​កាន់​អំណាច​ពី​ឆ្នាំ ១៩៧៥ ហើយ​វា​នៅ​តែ​ទុក​ចោល​ក្នុង​រយៈ​ពេល​យូរ​បន្ទាប់​ពី​របប​នោះ​មក​ដែល​ទាក់​ទាញ​ភ្ញៀវ​ទេសចរ​ម្ដងម្កាល​ផង​ដែរ។

នៅ​កម្ពុជា បច្ចុប្បន្ន​ទឹកក្រូច ប៉ិបស៊ី ត្រូវ​បាន​ផលិត​ជា​ផ្លូវ​ការ​ដោយ​ក្រុមហ៊ុន​ផលិត​ភេសជ្ជៈ ខេមប្រូ ដែល​ជា​ក្រុមហ៊ុន​ផលិត​ស្រាបៀរ អង្គរ៕ PB

អត្ថបទគួរចាប់អារម្មណ៍