.jpg)
លោក ឈា ឆាយហេង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុនហ្គោលដេន អេហ្វអិកស៍លីង ឃែភីថល។
អត្រាអ្នកគ្មានការងារធ្វើនៅក្នុងប្រទេសអូស្ត្រាលីបានធ្លាក់មកត្រឹម ៦,៨ ភាគរយ ស្របពេលដែលតួលេខថ្មីរបស់ការិយាល័យស្ថិតិនៃប្រទេសអូស្ត្រាលីបានបញ្ជាក់ថា ប្រជាជនប្រមាណ ១១១ ០០០ នាក់ ទទួលបានការងារធ្វើ ឬបន្តកាតព្វកិច្ចនៅកន្លែងការងារចាស់របស់ខ្លួនវិញនៅក្នុងខែសីហា កន្លងទៅនេះ។ ទោះបីជាទិន្នន័យនេះគឺជាព័ត៌មានដ៏ល្អមួយសម្រាប់ប្រទេសអូស្ត្រាលីទាំងមូល ប្រជាជនប្រមាណ ៤២ ០០០ នាក់ នៅក្នុងរដ្ឋ Victoria បានបាត់បង់ការងារដែលបណ្ដាលមកពីការរាតត្បាតនៃជំងឺកូវីដ ១៩។
យោងទៅតាមការព្យាកររបស់សាកលវិទ្យាល័យ Melbourne អត្រាអ្នកគ្មានការងារធ្វើនៅក្នុងប្រទេសអូស្ត្រាលីអាចកើនដល់ ១១,៧ ភាគរយ ប្រសិនបើរដ្ឋាភិបាលមិនបានអនុវត្តកម្មវិធីហិរញ្ញវត្ថុ ដូចជា កម្មវិធី JobKeeper ជាដើម នោះទេ។
សេដ្ឋកិច្ចរបស់ប្រទេសអូស្ត្រាលីកំពុងស្ថិតក្នុងវិបត្តិ បន្ទាប់ពីទិន្នន័យរបស់ការិយាល័យស្ថិតិនៃប្រទេសអូស្ត្រាលីបានបង្ហាញថា ផលិតផលក្នុងស្រុកសរុបចាប់ពីខែមេសាដល់ខែមិថុនាបានធ្លាក់ចុះ ៧ ភាគរយ ដែលជាការធ្លាក់ចុះខ្លាំងបំផុតគិតចាប់ពីឆ្នាំ ១៩៥៩ កន្លងមក។
បើគិតត្រឹមម៉ោង ០៨:៣៦ ព្រឹកនៃថ្ងៃទី ២២ ខែ កញ្ញា ឆ្នាំ ២០២០ ប្រាក់ដុល្លារអូស្ត្រាលីមានតម្លៃ ០,៧២ ១០០ បើធៀបនឹងប្រាក់ដុល្លារអាមេរិក។
បើផ្អែកទៅលើការវិភាគបែបបច្ចេកទេស (តាមរយៈសូចនាករ និងក្រាហ្វនៃការប្រែប្រួលតម្លៃនៅលើកម្មវិធីជួញដូរ Metatrader 4) វិញ គូរូបិយប័ណ្ណដុល្លារអូស្ត្រាលីធៀបដុល្លារអាមេរិកមានចំណុចរបាំងដ៏រឹងមាំមួយ ដែលស្ថិតក្នុងតម្លៃ ០,៧៥ ៩០០ មានចំណុចទម្រទី១ ដែលស្ថិតនៅក្បែរតម្លៃ ០,៧២ ០០០ និងមានចំណុចទម្រទី២ ដែលស្ថិតនៅក្នុងតម្លៃ ០,៧០ ៩០០។
ដោយយោងទៅតាមចំណុចសំខាន់ៗខាងលើ វិនិយោគិនគួរជួញដូរគូរូបិយប័ណ្ណដុល្លារអូស្ត្រាលីធៀបដុល្លារអាមេរិកនៅក្នុងតម្លៃចន្លោះពី ០,៧០ ៩០០ ទៅ ០,៧៥ ១០០ (០,៧៥ ១០០ ជាចំណុចនៃតម្លៃដែលរក្សាបាននូវភាពរឹងមាំចាប់តាំងពីខែមិថុនា ឆ្នាំ ២០១៨) មក ហើយអាចទិញ ឬលក់គូរូបិយប័ណ្ណនេះនៅតម្លៃក្បែរចំណុចទម្រ និងចំណុចរបាំង ដោយសារនាពេលបច្ចុប្បន្ន ទីផ្សារនៃគូរូបិយប័ណ្ណនេះគឺជាទីផ្សារមួយដែលមានគម្លាតនៃការប្រែប្រួលតម្លៃជាក់លាក់។ វិនិយោគិនក៏គួរជួញដូរដោយកំណត់មុខងារគ្រប់គ្រងហានិភ័យផងដែរ ដើម្បីកាត់បន្ថយហានិភ័យនានាពីការវិនិយោគ៕
