The Phnom Penh Post Search

Search form

Logo of Phnom Penh Post newspaper Phnom Penh Post - អត្រា​អតិផរណា ស្ទុះ​ងើប​តិច​តួច​កាល​ពី​ខែ​វិច្ឆិកា




អត្រា​អតិផរណា ស្ទុះ​ងើប​តិច​តួច​កាល​ពី​ខែ​វិច្ឆិកា

អត្រា​អតិផរណា ស្ទុះ​ងើប​តិច​តួច​កាល​ពី​ខែ​វិច្ឆិកា

130102_12
អ្នកលក់បន្លែ កំពុងអង្គុយរង់ចាំអតិថិជននៅផ្សារចាស់ រាជធានីភ្នំពេញ ម៉ៃ វីរៈ

ភ្នំពេញៈ អត្រា​អតិ​ផរណា​របស់​កម្ពុជា​បាន​កើន​ឡើង​តិច​តួច​កាល​ពី​ខែ​វិច្ឆិកា​គឺ​១,៦​ភាគ​រយ​បើ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន​។ មន្ត្រី​បាន​និយាយ​ថា អត្រា​អតិផរណា​កំពុង​ងើប​ឡើង​ទៅ​តាម​កំណើន​សេដ្ឋកិច្ច​ជាតិ​ដែល​បាន​ស្ទុះ​ងើប​ឡើង​ចន្លោះ​ពី៦​ទៅ​៧​ភាគ​រយ​កាល​ពី​ឆ្នាំ​មុន។

ទិន្នន័យ​ពី​វិទ្យាស្ថាន​ជាតិ​ស្ថិតិ (NIS) បាន​បង្ហាញ​ថា កំណើន​សន្ទុះ​តម្លៃ​ទំនិញ​ចំនួន​១,៦​ភាគរយ​នេះ គឺ​កើត​ឡើង​ដោយ​សារ​តែ​មាន​ការ​កើន​ឡើង​នូវ​តម្លៃ​ស្បៀង​អាហារ​និង​តម្លៃ​ទំនិញ​ផ្សេងៗ។ ទិន្នន័យ​ដដែល​បាន​បង្ហាញ​ថា តម្លៃ​ភេសជ្ជៈ​បាន​កើន​ឡើង​១,២​ភាគ​រយ អង្ករ​កើន​ឡើង​២​ភាគ​រយ​សាច់​ស្រស់​១៥,២​ភាគ​រយ​ត្រី​សាច់​និង​គ្រឿង​សមុទ្រ​កើន​ឡើង​១,៥​ភាគ​រយ​ផ្លែ​ឈើ​កើន​ឡើង​៥​ភាគរយ បន្លែ​កើន​ឡើង ៥,២​ភាគរយ សម្លៀក​បំពាក់​និង​ស្បែក​ជើង កើន​៣,១​ភាគ​រយ​តម្លៃ​ជួល​ផ្ទះ​ទឹក ឧស្ម័ន​និង​ប្រេង​ផ្សេង​ទៀត​កើន​ឡើង​២,៥​ភាគរយ​។ តម្លៃ​ឧស្ម័ន​បាន​កើន​ឡើង​៣,៧​ភាគ​រយ​ប្រេង​សាំង​កើន​ប្រហែល​៥​ភាគ​រយ​។ល។

លោក ខិន សុង អគ្គ​នាយក​រង​នៃ​វិទ្យាស្ថាន NIS មាន​ប្រសាសន៍​ថា​អត្រា​នេះ​កំពុង​ឆ្លុះ​បញ្ចាំង​ពី​ស្ថិរភាព​តម្លៃ​ដោយ​សារ​តែ​ភាព​ប្រសើរ​ឡើង​នៃ​សេដ្ឋកិច្ច​។ លោក​បាន​បន្ថែម​ថា៖ «ឆ្នាំ​នេះ​អត្រា​តម្លៃ​មាន​ភាព​ល្អ​ប្រសើរ​ខ្លាំង​ណាស់​។ វា​កាន់​តែ​មាន​ស្ថិរភាព​ខ្លាំង​ឡើងៗ ដោយ​សារ​យើង​អាច​គ្រប់​គ្រង​តម្លៃ​ស្បៀង​អាហារ​បាន»។

លោក​អគ្គ​នាយក​រង​រូប​នេះ បាន​ថ្លែង​បន្ត​ថា កាល​ពី​ឆ្នាំ​មុន រដ្ឋាភិបាល​កម្ពុជា បាន​ហាម​ឃាត់​ការ​ធ្វើ​អាជីវកម្ម​ឡូត៍​នេសាទ​ដោយ​បើក​ចំហ​ឲ្យ​ប្រជា​ពលរដ្ឋ​ដើម្បី​ឲ្យ​ពួកយើង​អាច​មាន​សាច់​និង​ត្រី​ច្រើន​នៅ​លើ​ទីផ្សារ​ហើយ​ប្រាក់​ចំណូល​បាន​មក​ពី​ការ​លក់​ក៏​កើន​ឡើង​ផង​ដែរ​ដូច្នេះ​តម្លៃ​អាច​ថេរ​ដែល​មិន​ធ្វើ​ឲ្យ​អតិផរណា​កើន​ឡើង​។

លោក​បាន​លើក​ឡើង​បន្ថែម​ថា៖

«​ក្នុង​ពេល​ដូច​គ្នា​នេះ​ដែរ​បើ​សិន​យើង​ក្រឡេក​ទៅ​មើល​បណ្ដា​ប្រទេស​ដែល​យើង​នាំ​ចូល​ទំនិញ​របស់​គេ​វិញ​ដូច​ជា​ប្រទេស​ចិន​អត្រា​អតិផរណា​របស់​គេ​គឺ​នៅ​ទាប​ខ្លាំង​ណាស់​ដែល​ធ្វើ​ឲ្យ​យើង​ទទួល​បាន​ផល​ប្រយោជន៍​ពី​ការ​នាំ​ចូល​នោះ​ផង​ដែរ»។

លោក ចាន់ សុផល ប្រធាន​សមាគម​សេដ្ឋកិច្ច​កម្ពុជា​(CEA)​បាន​មាន​ប្រសាសន៍​ថា​ទន្ទឹម​នឹង​នេះ​ដែរ​សេដ្ឋកិច្ច​ប្រទេស​កម្ពុជា​កំពុង​កើន​ឡើង​។ ទំហំ​ផលិត​ផល​កំពុង​ស្ទុះ​ងើប​ហើយ​កំណើន​យឺត​របស់​អត្រា​អតិផរណា អាច​ផ្ដល់​ផល​ប៉ះ​ពាល់​ទាំង​អវិជ្ជមាន​និង​វិជ្ជមាន​ដល់​សេដ្ឋកិច្ច​។

លោក​ប្រធាន​សមាគម​សេដ្ឋកិច្ច​កម្ពុជា​រូប​នេះ បាន​មាន​ប្រសាសន៍​ថា៖ «​ដោយ​ឡែក​ការ​ឡើង​ចុះ​អត្រា​អតិផរណា​នៅ​ក្នុង​ប្រទេស​យើង​គឺ​ផ្អែក​ជា​សំខាន់​ទៅ​លើ​កត្តា​តាម​រដូវ​កាល​។ ប៉ុន្តែ​កំណើន​អតិផរណា​ទាប​បំផុត​អាច​ជា​ការ​ល្អ​ប្រសើរ​សម្រាប់​សេដ្ឋកិច្ច​ទាំង​មូល​តែ​វា​មិន​ល្អ​សម្រាប់​ក្រុមហ៊ុន​ផលិតកម្ម​និង​ប្រជា​កសិករ​ទេ​»។

ទិន្នន័យ​របស់​វិទ្យាស្ថាន NIS បាន​បង្ហាញ​ថា បើ​ប្រៀប​ធៀប​នឹង​ខែ​តុលា​ឆ្នាំ​២០១២ ប្រទេស​កម្ពុជា​បាន​ជួប​នូវ​បរិត្តផរណា​០,២​ភាគ​រយ​កាល​ពី​ខែ​វិច្ឆិកា​។​នេះ​គឺជា​ការ​ទទួល​រង​បរិត្តផរណា​លើក​ទី​បួន​កាល​ពី​ឆ្នាំ​មុន។

មូលនិធិ​រូបិយវត្ថុ​អន្តរជាតិ​IMF​បាន​ព្យាករ​ថា កំណើន​សេដ្ឋកិច្ច​របស់​ប្រទេស​កម្ពុជា​នឹង​កើន​ឡើង​៦,៥​ភាគរយ​នៅ​ក្នុង​ឆ្នាំ​២០១២​ហើយ​អត្រា​អតិផរណា​នឹង​ស្ទុះ​ងើប​ជា​មធ្យម​ប្រហែល​៣,៥​ភាគរយ ខណៈ​ដែល​រដ្ឋាភិបាល​កម្ពុជា​បាន​ព្យាករ​ថា​កំណើន​សេដ្ឋកិច្ច​នឹង​កើន​ឡើង​៧​ភាគ​រយ​ហើយ​អត្រា​អតិផរណា​មាន​កម្រិត​ក្រោម​៥​ភាគ​រយ៕ PN

អត្ថបទគួរចាប់អារម្មណ៍