ភ្នំពេញៈ រដ្ឋាភិបាលបានអនុម័តសេចក្តីព្រាងច្បាប់នៃការចៀសវាងការយកពន្ធត្រួតគ្នា (DTA) ជាមួយប្រទេសកូរ៉េខាងត្បូង និងម៉ាឡេស៊ី ខណៈដែលច្បាប់នេះនឹងបើកផ្លូវឲ្យប្រទេសនេះធ្វើកិច្ចព្រមព្រៀងពាណិជ្ជកម្មសេរី ដើម្បីបង្កើនពាណិជ្ជកម្ម និងការវិនិយោគទៅវិញទៅមក។
សេចក្ដីព្រាងច្បាប់ដែលត្រូវបានអនុម័តក្នុងអំឡុងពេលកិច្ចប្រជុំគណៈរដ្ឋមន្ត្រីកាលពីថ្ងៃសុក្រកន្លងទៅដឹកនាំដោយលោកនាយករដ្ឋមន្ដ្រី ហ៊ុន សែន នឹងស្នើទៅសភាជាតិអនុម័តក្នុងពេលឆាប់ៗនេះ។
លោក Anthony Galliano អគ្គនាយកក្រុមហ៊ុន Cambodia Investment Management បានប្រាប់ភ្នំពេញប៉ុស្ដិ៍នៅពេលថ្មីៗនេះថា DTA លុបចោល និងទប់ស្កាត់ការយកពន្ធត្រួតគ្នា លើកកម្ពស់ការវិនិយោគទ្វេភាគីមានភាពច្បាស់លាស់ និងតម្លាភាពជំរុញពាណិជ្ជកម្ម ពិភពលោក ហើយសំខាន់ជាងនេះទៅទៀតសម្រាប់ប្រទេសកម្ពុជាគឺទាក់ទាញការវិនិយោគបរទេស។
DTA ក៏ផ្ដល់យន្តការដើម្បីផ្លាស់ប្តូរព័ត៌មានរវាងអាជ្ញាធរពន្ធដារ និងជួយទប់ស្កាត់ការចៀសវាងការយកពន្ធត្រួតគ្នា និងការបង្ការគេចវេះពន្ធ។
លោកថ្លែងថា កិច្ចព្រមព្រៀង DTA ជាទូទៅផ្ដល់អត្ថប្រយោជន៍ដល់បណ្ដាប្រទេសកំពុងអភិវឌ្ឍន៍ដូចជាប្រទេសកម្ពុជា ខណៈដែលកិច្ចព្រមព្រៀងទាំងនេះជាធម្មតាបណ្ដាលឲ្យមានកំណើនលំហូរមូលធនចេញពីប្រទេសអភិវឌ្ឍន៍ទៅប្រទេសកំពុងអភិវឌ្ឍន៍។
លោកបានថ្លែងថា៖ «ការផ្តួចផ្តើមរបស់កម្ពុជាដើម្បីចរចា កិច្ចព្រមព្រៀងពាណិជ្ជកម្មសេរីជាមួយប្រទេសចិន សាធារណរដ្ឋកូរ៉េ និងសហភាពសេដ្ឋកិច្ចអាស៊ីអឺរ៉ុបគឺទាន់ពេលវេលា និងមានលក្ខណៈយុទ្ធសាស្ត្រ ឆ្លើយតបទៅនឹងការវិវឌ្ឍថ្មីៗដែលប៉ះពាល់ដល់សេដ្ឋកិច្ច ជាពិសេសនោះគឺការផ្អាកផ្នែកខ្លះនៃប្រព័ន្ធអនុគ្រោះពន្ធ និង កូវីដ១៩»។
កាលពីចុងខែវិច្ឆិកាឆ្នាំមុន ប្រទេសកម្ពុជា និងកូរ៉េខាងត្បូងចុះហត្ថលេខាលើកិច្ចព្រមព្រៀងសិក្សាលទ្ធភាពរួមមួយស្ដីពីកិច្ចព្រមព្រៀងពាណិជ្ជកម្មសេរីដែលអាចកើតឡើងក្នុងគោលបំណងដើម្បីពង្រីកទំហំវិនិយោគទ្វេភាគីរវាងប្រទេសទាំង ២។
កិច្ចព្រមព្រៀងនេះត្រូវបានចុះហត្ថលេខាដោយលោក ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្មកម្ពុជា និងលោក Yoo Myunghee រដ្ឋមន្ដ្រីក្រសួងពាណិជ្ជកម្មកូរ៉េខាងត្បូងក្នុងអំឡុងកិច្ចប្រជុំកំពូលរំឭករបស់អាស៊ាន និងសាធារណរដ្ឋកូរ៉េរយៈពេល ២ ថ្ងៃដែលបានចាប់ផ្ដើមកាលពីថ្ងៃចន្ទនៅប៊ូសាន ជាទីក្រុងកំពង់ផែកូរ៉េ-ខាងត្បូង។
កាលពីឆ្នាំ ២០១៨ ទំហំពាណិជ្ជកម្មរវាងប្រទេសទាំង ២ បានកើនឡើងគួរឲ្យកត់សម្គាល់ដល់ប្រហែល ៧៥៦ លានដុល្លារកើនឡើង ១៤ ,៦៩ ភាគរយធៀបនឹងឆ្នាំ ២០១៧។ នេះបើយោងតាមទិន្នន័យបានពីក្រសួងពាណិជ្ជកម្ម។
សភាជាតិធ្លាប់បានផ្តល់សច្ចាប័នលើ DTA ដែលបានជាមួយប្រទេសសិង្ហបុរី ចិន ប្រ៊ុយណេ ថៃ វៀតណាម និងឥណ្ឌូនេស៊ី និងបានចុះហត្ថលេខាលើកិច្ចព្រមព្រៀងមួយជាមួយទីក្រុងហុងកុង៕LA