.jpg)
អ្នកជំនាញកំពុងតបណ្ដាញអគ្គិសនីនៅលើបង្គោលថ្មីតាមផ្លូវ ២០០៤ រាជធានីភ្នំពេញ នាពេលកន្លងមក។ ហេង ជីវ័ន
ភ្នំពេញ៖ អនុស្ថានីយថ្មីមួយក្នុងខេត្តរតនគិរី ទើបត្រូវបានដាក់ឲ្យដំណើរជាផ្លូវការកាលពីសប្តាហ៍មុនដោយតភ្ជាប់មកបណ្តាញជាតិតាមខ្សែបញ្ជូនតង់ស្យុងខ្ពស់ ២៣០ គីឡូវ៉ុល ពីទំនប់វារីអគ្គិសនីសេសានក្រោម ២ ស្ថិតក្នុងខេត្តស្ទឹងត្រែង។
ទំនប់វារីអគ្គិសនីសេសានក្រោម ២ មានកម្លាំង ៤០០ មេហ្គាវ៉ាត់ គឺជាវារីអគ្គិសនីធំបំផុតនៅកម្ពុជា ដោយមានតម្លៃជាង ៧៨១ លានដុល្លារ និងត្រូវបានសម្ពោធឲ្យដំណើរការដោយលោកនាយករដ្ឋមន្ត្រី ហ៊ុន សែន កាលពីខែកញ្ញា ឆ្នាំ ២០១៧។
មន្ត្រីអគ្គិសនីកម្ពុជាប្រចាំនៅខេត្តរតនគិរី សុំមិនបញ្ចេញឈ្មោះបានប្រាប់ភ្នំពេញប៉ុស្តិ៍ថា អនុស្ថានីយថ្មីនេះ មានទំហំ ៥០ មេហ្គាវ៉ាត់ ដែលបានទាញថាមពលពីទំនប់វារីអគ្គិសនីសេសានក្រោម ២ ស្ថិតនៅក្នុងខេត្តស្ទឹងត្រែងតាមខ្សែបញ្ជូនតង់ស្យុងខ្ពស់ដែលមានប្រវែង ១០២ គីឡូម៉ែត្រ។ លោកបន្តថា អនុស្ថានីយនេះនឹងជួយបង្កើនសមត្ថភាពផ្គង់ផ្គង់ថាមពលអគ្គិសនីនៅទូទាំងខេត្ត ខណៈតម្រូវការប្រើប្រាស់ថាមពលនៅក្នុងខេត្តមានពី ២០ ទៅ ២៥ មេហ្គាវ៉ាត់ ក្នុងរដូវប្រាំង និង ១២ មេហ្គាវ៉ាត់ក្នុងរដូវវស្សា។
លោកថ្លែងថា៖ «អនុស្ថានីយនេះនឹងទាញភ្លើងមកចែកចាយនៅទូទំាងខេត្ត ហើយពួកខ្ញុំកំពុងសង់បណ្តាញខ្នែងបញ្ជូនអគ្គិសនីបន្ថែមទៀត ដើម្បីពង្រីកលទ្ធភាពផ្តល់អគ្គិសនីឲ្យដល់ទីជនបទដាច់ស្រយាល»។
លោកបន្តថា៖ «ទោះបីសព្វថ្ងៃគេមិនទាន់ចែកចាយថាមពលអគ្គិសនីអស់ តែគេគ្រោងទុកសម្រាប់រយៈពេល ៥ ឆ្នាំ ទៅមុខទៀត ទំហំ ៥០ មេហ្គាវ៉ាត់ អាចបំពេញតម្រូវការប្រើប្រាស់គ្រប់គ្រាន់»។
លោក នាង សំអាត នាយករដ្ឋបាលសាលាខេត្តរតនគិរី បានប្រាប់ភ្នំពេញ ប៉ុស្តិ៍ កាលពីថ្ងៃអាទិត្យថា អនុស្ថានីយនេះនឹងផ្តល់ប្រយោជន៍ដល់ប្រជាជន ២០៦ ០០០ នាក់ ក្នុងខេត្តនេះ។ លោកបន្តថា៖ «អនុស្ថានីយនេះនឹងជួយសម្រួលដល់ការប្រកបរបររកស៊ីរបស់ប្រជាជនដែលជាម្ចាស់អាជីវកម្ម និងសិប្បកម្ម និងជួយទាក់ទាញការអភិវឌ្ឍខេត្តបន្ថែមទៀត»។
លោក កែវ រតនៈ អគ្គនាយកអគ្គិសនីកម្ពុជា កន្លងមកបានប្រាប់ថា អគ្គិសនីកម្ពុជាកំពុងធ្វើកិច្ចការជាច្រើន ដើម្បីស្វែងរកថាមពលថ្មីបន្ថែមទៀតឲ្យបាន ១ ០០០ មេហ្គាវ៉ាត់ នៅមុនដំណាច់ឆ្នាំ ២០២០ ដែលទាញប្រភពថាមពលពីការសាងសង់រោងចក្រថាមពលធ្យូងថ្ម ពន្លឺព្រះអាទិត្យ និងការទិញប្រភពដែលមានតម្លៃទាប៕
