ភ្នំពេញៈ ក្រសួងពាណិជ្ជកម្មកម្ពុជាដឹកនាំកិច្ចប្រជុំអន្តរក្រសួងដែលបានអនុម័តជាផ្លូវការនូវយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក (E-Commerce Strategy) ដែលជាការបើកផ្លូវក្នុងការជំរុញការធ្វើអាជីវកម្មឌីជីថលនៅកម្ពុជា ស្របតាមទិសដៅរបស់រដ្ឋាភិបាលក្នុងការហក់ផ្លោះទៅកាន់បរិបទបដិវត្តន៍ឧស្សាហកម្ម ៤.០ ឬសេដ្ឋកិច្ចឌីជីថលក្នុងការបង្កើតប្រភពកំណើនថ្មី។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានដឹកនាំកិច្ចប្រជុំអន្តរក្រសួងក្នុងសប្តាហ៍មុន ដោយបានអនុម័តនូវយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក (E-Commerce Strategy) ដោយមានការចូលរួមពីតំណាងក្រសួងពាក់ព័ន្ធនានា។
លោករដ្ឋមន្ត្រីបាននិយាយថា ក្នុងបរិបទបដិវត្តន៍ឧស្សាហកម្ម ៤.០ ផែនការ យុទ្ធសាស្ត្របច្ចេកវិទ្យាឌីជីថលនេះជាគន្លឹះដ៏សំខាន់ក្នុងការជំរុញភាពប្រកួតប្រជែងរបស់សហគ្រាសពាណិជ្ជកម្ម និង ដំណើរការអាជីវកម្មដែលរួមចំណែកដល់ការលើកកម្ពស់ផលិតភាព បង្កើន ការនាំចេញ បង្កើតការងារ និងជំរុញកំណើនសេដ្ឋកិច្ចជាតិ។
លោកថ្លែងថា៖ «ដោយមើលឃើញចក្ខុវិស័យវែងឆ្ងាយក្នុងការចាប់យកកាលានុវត្តភាពបដិវត្តន៍ឧស្សាហកម្ម ៤.០ រាជរដ្ឋាភិបាលកម្ពុជានីតិកាលទី ៦ នៃរដ្ឋសភាបានរំលេចអំពី “ការរៀបចំខ្លួនសម្រាប់ការរីកចម្រើននៃសេដ្ឋកិច្ចឌីជីថល និងឆ្លើយតបទៅនឹងបដិវត្តន៍ឧស្សាហកម្ម ៤.០” នៃយុទ្ធសាស្ត្រចតុកោណដំណាក់កាលទី ៤»។
លោកបន្ថែមថា៖ «ការអភិវឌ្ឍបច្ចេកវិទ្យាឌីជីថលក៏ជាការឆ្លើយតបនឹងគោលនយោបាយអភិវឌ្ឍន៍ឧស្សាហកម្មកម្ពុជាក្នុងការធ្វើពិពិធកម្មសេដ្ឋកិច្ច តាមរយៈការលើកកម្ពស់សមត្ថភាពរបស់សហគ្រាសធុនតូច និងមធ្យមក្នុងស្រុកឲ្យផ្សារភ្ជាប់ទៅនឹងខ្សែចង្វាក់តម្លៃតំបន់ និងសកលលោកផងដែរ»។
កាលពីខែវិច្ឆិកា ឆ្នាំ ២០១៩ កម្ពុជាបានដាក់ឲ្យប្រើប្រាស់ច្បាប់ពាណិជ្ជកម្មតាមប្រព័ន្ធអេឡិចត្រូនិកដែលជាកិច្ចខិតខំប្រឹងប្រែងមួយដើម្បីរួមចំណែកដល់ការអភិវឌ្ឍឆាប់រហ័សនៃការជួញដូរពាណិជ្ជកម្មតាមប្រព័ន្ធអេឡិចត្រូនិក និងការទិញអីវ៉ាន់តាមអនឡាញ។
បើយោងតាមលោក ប៉ាន សូរស័ក្តិ យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកត្រូវបានរៀបចំឡើងក្នុងពេលវេលាដ៏ត្រឹមត្រូវស្របពេលដែលកម្ពុជាមានច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក។
លោករដ្ឋមន្ត្រីបន្តថា៖ «ការអនុវត្តប្រកបដោយប្រសិទ្ធភាពនៃយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកនឹងពង្រឹង រឹតតែខ្លាំងឡើងនូវការអភិវឌ្ឍវិស័យពាណិជ្ជកម្មអេឡិចត្រូនិក ដោយហេតុថា ឯកសារយុទ្ធសាស្ត្រនេះបានផ្តល់គំរូអាជីវកម្មថ្មីមួយប្រកបដោយប្រសិទ្ធភាព និងភាពប្រកួតប្រជែងខ្ពស់ ដែលសមស្របនឹងបរិបទសេដ្ឋកិច្ចឌីជីថល និងលក្ខខណ្ឌតម្រូវការទីផ្សារក្នុងស្ថានភាពជំងឺកូវីដ១៩ និងក្រោយជំងឺកូវីដ១៩»។
កាលពីថ្ងៃទី ១០ ខែឧសភា លោក ប៉ាន សូរស័ក្ដ ក៏បានស្នើលោក Yao Yuya អគ្គនាយកក្រុមហ៊ុន Huawie Cambodia ដែលជាក្រុមហ៊ុនបច្ចេកវិទ្យាឈានមុខគេរបស់ប្រទេសចិន ជួយបង្កើនពាណិជ្ជកម្មអេឡិចត្រូនិក និងការជួញដូរអនឡាញនេះ៕LA