ក្នុងពិធីអបអរសាទខួប ៥ ឆ្នាំនៃការដាក់ឲ្យដំណើរការផលិតកម្មរបស់ក្រុមហ៊ុនភ្នំពេញ ព្រីខាស ផ្លេន (Phnom Penh Precast Plants) កាលពីថ្ងៃទី ១៩ ខែកុម្ភៈ ឆ្នាំ ២០១៩ កន្លងទៅនេះលោកឧកញ៉ា ជឹង ធានសេង ដែលជានាយកក្រុមហ៊ុនបានថ្លែងប្រាប់ភ្ញៀវកិត្តិយសជាតិ និងអន្តរជាតិថាក្រុមហ៊ុនបានចាប់ផ្ដើមដំណើរការអាជីវកម្មរបស់ខ្លួននៅក្នុងឆ្នាំ ២០១៤ ក្រោមការបោះទុនរួមគ្នារបស់វិនិយោគិនក្នុងស្រុកដោយចាប់ផ្ដើមពីការផលិតបង្គោលភ្លើងគ្រប់ប្រភេទ និងគ្រប់ប្រវែងដែលរហូតមកដល់ពេលនេះបង្គោលភ្លើងរបស់ក្រុមហ៊ុនភ្នំពេញ ព្រីខាសផ្លេន ត្រូវបានដំឡើងនៅទូទាំងរាជធានីខេត្ត-ក្រុងនៃព្រះរាជាណាចក្រកម្ពុជា។
លោកឧកញ៉ាបានសង្កត់ធ្ងន់ថា៖ «ដោយមើលឃើញពីសភាពការណ៍នយោបាយល្អប្រសើរក្នុងពេលបច្ចុប្បន្ន និងអនាគតព្រមទាំងឈរលើស្មារតីគិតគូរពីការចូលរួមអភិវឌ្ឍន៍ប្រទេសជាមួយរាជរដ្ឋាភិបាលក្នុងការស្ដារឡើងវិញនូវហេដ្ឋារចនាសម្ព័ន្ធទូទាំងព្រះរាជាណាចក្រកម្ពុជាដែលត្រូវបានបំផ្លាញដោយសង្គ្រាមក្នុងពេលកន្លងទៅក្រុមហ៊ុនបានសម្រេចដាក់បញ្ចូលផលិតកម្មលូបេតុងស្តង់ដាតាមបច្ចេកវិទ្យាប្រទេសអាល្លឺម៉ង់ទៅក្នុងខ្សែសង្វាក់ផលិតកម្មក្នុងដើមត្រីមាសទី ៤ ឆ្នាំ ២០១៤ »។
អ្វីដែលកាន់តែពិសេសទៀតនោះដោយផ្អែកលើគុណភាពតាមស្តង់ដាអន្តរជាតិ និងបច្ចេកវិទ្យាខ្ពស់ក្នុងផលិតកម្មនេះគណៈកម្មាធិការវាយតម្លៃគុណភាពអន្តរជាតិបានសម្រេចផ្តល់វិញ្ញាបនបត្រកម្រិត ISO 9001:2015 ដល់ក្រុមហ៊ុន ភ្នំពេញ ព្រីខាស ផ្លេន (Phnom Penh Precast Plants)។
ការទទួលស្គាល់គុណភាពពីគណៈកម្មាធិការវាយតម្លៃគុណភាពកម្រិតពិភពលោកនេះគឺជាការបង្កើនទំនុកចិត្តបន្ថែមទៀតដល់អតិថិជនដែលគាំទ្រផលិតផលក្រុមហ៊ុន ភ្នំពេញ ព្រីខាស ផ្លេន (Phnom Penh Precast Plants) ។
លោកឧកញ៉ាបានបន្ថែមថា៖ «ក្រុមហ៊ុនយើងប្ដេជ្ញាថែរក្សាគុណភាពគ្រប់ផលិតផលរបស់យើងឲ្យកាន់តែល្អប្រសើរ។
ការគាំទ្រផលិតផលក្រុមហ៊ុន ភ្នំពេញ ព្រីខាស ផ្លេន (Phnom Penh Precast Plants) គឺជាការគាំទ្រស្នាដៃកូនខ្មែរ»៕