.jpg)
ពិធីចុះ MoU រវាង អម្រឹត ជាមួយក្រុមហ៊ុន Metfone និង VIVO កាលពីម្សិលមិញ។ រូបថត សហការី
ភ្នំពេញ: គ្រឹះស្ថានមីក្រូហិរញ្ញវត្ថុអម្រឹត ក្រុមហ៊ុនទូរស័ព្ទ Metfone និងក្រុមហ៊ុនផលិតទូរស័ព្ទដៃស្មាតហ្វូន VIVO បានចុះអនុស្សរណៈយោគយល់គ្នាកាលពីថ្ងៃចន្ទក្នុងគោលបំណងដើម្បីផ្តល់សេវាកម្មជាកញ្ចប់ដល់អតិថិជនរបស់ខ្លួនដែលជាការប្រឹងប្រែងពង្រីកទីផ្សារកម្ចីបន្ថែមទៀតនៅក្នុងអំឡុងពេលការរីករាលដាលជំងឺកូវីដ ១៩។
លោក តាន់ យូហៃ នាយកផ្នែកលក់នៃគ្រឹះស្ថានមីក្រូហិរញ្ញវត្ថុអម្រឹតបានថ្លែងក្នុងកម្មវិធីចុះ MoU ថារាល់អតិថិជនទាំងថ្មី និងចាស់ដែលខ្ចីប្រាក់ពីអម្រឹតចាប់ពី ៤ ០០០ ដល់ ៩ ៩៩៩ ដុល្លារនឹងទទួលបានទូរស័ព្ទស្មាតហ្វូន VIVO Y1s ១ គ្រឿងដោយឥតគិតថ្លៃ ហើយបើខ្ចីប្រាក់ពី ១០ ០០០ ដុល្លារដល់ ២០ ០០០ ដុល្លារនឹងទទួលបានទូរស័ព្ទស្មាតហ្វូន VIVO Y11 ដោយឥតគិតថ្លៃ ១ គ្រឿងភ្លាមៗដែលប្រូម៉ូសិននេះចាប់ពីថ្ងៃទី ១ ខែសីហារហូតដល់ថ្ងៃទី ៣១ ខែតុលា ឆ្នាំ ២០២០។
លោកថ្លែងថា៖ «យើងជឿថា នេះជាប្រូម៉ូសិនលើកដំបូងគេសម្រាប់វិស័យគ្រឹះស្ថានមីក្រូហិរញ្ញវត្ថុដែលផ្តល់ទូរស័ព្ទស្មានហ្វូនដោយឥតគិតថ្លៃ ១ គ្រឿងភ្លាមៗដល់អតិថិជនដែលត្រូវបានអនុម័តខ្ចីប្រាក់ពីគ្រឹះស្ថានមីក្រូហិរញ្ញវត្ថុរបស់យើង»។
លោកឲ្យដឹងថា អ្វីដែលពិសេសជាងនេះទៅទៀតគឺអម្រឹតបានចូលរួមលើកកម្ពស់ប្រតិបត្តិការដោយគ្មានសាច់ប្រាក់ (Cashless transaction) កាន់តែប្រសិទ្ធភាពខ្ពស់ដោយមិនត្រឹមតែផ្តល់ចំណេះដឹងដល់អតិថិជនប៉ុណ្ណោះទេ ប៉ុន្តែថែមទាំងផ្តល់បទពិសោធផ្នែករឹងក្នុងការប្រតិបត្តិការធនាគារចល័តផងដែរ។
លោកបញ្ជាក់ថា គ្រឹះស្ថានមីក្រូហិរញ្ញវត្ថុអម្រឹតនឹងផ្តល់ជូនទូរស័ព្ទស្មាតហ្វូន VIVO ចំនួន ២០ ០០០ គ្រឿងសម្រាប់យុទ្ធនាការនេះ។
លោក ចាង ថោវ ប្រធានផ្នែកទីផ្សារនៃក្រុមហ៊ុន VIVO ប្រចាំនៅកម្ពុជាបានថ្លែង៖ «ការសហការជាមួយគ្រឹះស្ថានមីក្រូហិរញ្ញវត្ថុអម្រឹតនេះ ដោយសារយើងមានគោលដៅរួមគ្នាក្នុងការលើកកម្ពស់ប្រតិបត្តិការដោយគ្មានសាច់ប្រាក់។ ចំពោះចក្ខុវិស័យរបស់ក្រុមហ៊ុន VIVO គឺដើម្បីក្លាយជាសាជីវកម្មសកលយូរអង្វែងដែលមានសុខភាពល្អជាងមុនដោយផ្តល់នូវផលិតផលដែលមានគុណភាព និងសេវាកម្មល្អ»។
លោក បួយ មិញ ប៊ិញ អគ្គនាយករងនៃក្រុមហ៊ុន Metfone បាននិយាយថា តាមរយៈ MoU នេះក្រុមហ៊ុន Metfone នឹងផ្តល់ស៊ីមកាតដោយឥតគិតថ្លៃដល់អតិថិជនទាំងអស់របស់អម្រឹត។ លោកថ្លែងថា៖ «ស៊ីមកាតនីមួយៗបន្ទាប់ពីដំណើរការអាចផ្ទុកទិន្នន័យបានចំនួន ១ ជីហ្គាបៃ ហើយហៅទូរស័ព្ទចេញដោយឥតគិតថ្លៃ ១០០ នាទីសម្រាប់ក្នុងប្រព័ន្ធក្នុងរយៈពេល ២ សប្តាហ៍»។
យោងតាមលោក មិញ ប៊ិញ បច្ចុប្បន្ន Metfone បានសាងសង់ហេដ្ឋារចនាសម្ព័ន្ធឈានមុខមួយដោយមានស្ថានីយចំនួន ១១ ០០០ និងខ្សែអុបទិកប្រវែង ២៣ ០០០ គីឡូម៉ែត្រ និងផ្តល់សេវាដល់ប្រជាជនខ្មែរជិត ៩ លាននាក់។
បច្ចុប្បន្នអម្រឹតមានប្រាក់បញ្ញើសន្សំជាង ៥០០ លានដុល្លារ និងមានទ្រព្យសកម្មប្រមាណ ១ ពាន់លានដុល្លារដោយមានអតិថិជនជាង ៥០ ម៉ឺននាក់ជាមួយនឹងសាខា ១៥៨៕ LA
