ភ្នំពេញៈ គ្រឹះស្ថានមីក្រូហិរញ្ញវត្ថុ អម្រឹត បានចាប់ដៃគូជាមួយក្រុមហ៊ុនធានារ៉ាប់រង AIA ដើម្បីបង្ហាញពីសេវាធានារ៉ាប់រងដល់អតិថិជនរបស់ខ្លួន បន្ទាប់ពីទទួលបានការយល់ព្រមពីធនាគារជាតិនៃកម្ពុជា និងក្រសួងសេដ្ឋកិច្ច និងហិរញ្ញវត្ថុ។ នេះបើយោងតាមសេចក្តីប្រកាសរបស់ក្រសួងសេដ្ឋកិច្ចនៅថ្ងៃចន្ទនេះ។
តាមសេចក្ដីប្រកាសព័ត៌មានរួមរវាង អម្រឹត និង AIA (Cambodia) គ្រឹះស្ថានអម្រឹតនឹងចាប់ផ្ដើមការផ្ដល់ដល់អតិថិជនរបស់ខ្លួនជាង៤០ម៉ឺននាក់ នូវលទ្ធភាពទទួលបានសេវាធានារ៉ាប់រងអាយុជីវិត និងធានារ៉ាប់រងជំងឺសំខាន់ៗរបស់ក្រុមហ៊ុន AIA ។
លោក ជា ផល្លារិន អគ្គនាយក អម្រឹត បានថ្លែងនៅក្នុងសេចក្ដីប្រកាសព័ត៌មាននេះថា៖ «នៅពេលនេះយើងអាចលើកកម្ពស់សន្ដិសុខហិរញ្ញវត្ថុបន្ថែមទៀតសម្រាប់អតិថិជនរបស់យើងតាមរយៈដំណោះស្រាយការធានារ៉ាប់រងអាយុជីវិតរបស់ក្រុមហ៊ុន AIA Cambodia»។
ក្រុមហ៊ុនធានារ៉ាប់រងអាយុជីវិតបានចូលមកកម្ពុជាលើកដំបូង កាលពីឆ្នាំ២០១២ ហើយវិស័យនេះត្រូវបានមើលឃើញកំណើនរឹងមាំ ចាប់តាំងពីពេលនោះ។
កាលពីខែមុន ក្រុមហ៊ុន Nikkei Asian Review បានរាយការណ៍ថា Dai-icihi Life Holdings ជាក្រុមហ៊ុនធានារ៉ាប់រងរបស់ប្រទេសជប៉ុនកំពុងរៀបចំផែនការ ដើម្បីពង្រីកមកប្រទេសកម្ពុជា ជាមួយនឹងបុគ្គលិកជាង១០០ នាក់នៅឆ្នាំនេះ៕LA
