.jpg)
សកម្មភាពបុគ្គលិករបស់អម្រឹតជួបជាមួយអតិថិជននៅមូលដ្ឋាន។ រូបថត សហការី
ភ្នំពេញៈ ក្រុមអ្នកខ្ចីប្រាក់ប្រមាណ ១២០ ០០០ នាក់ ដែលទទួលរងផលប៉ះពាល់ពីការរីករាលដាលនៃជំងឺកូវីដ ១៩ របស់គ្រឹះស្ថានមីក្រូហិរញ្ញវត្ថុអម្រឹតបានទទួលរយៈពេលអនុគ្រោះពី ៣ ដល់ ៦ ខែលើការរៀបចំឥណទានឡើងវិញ ខណៈអម្រឹតក្លាយជាគ្រឹះស្ថានមីក្រូហិរញ្ញវត្ថុទី ១ ដែលប្រកាសជាសាធារណៈពីការផ្ដល់ការសម្របសម្រួលដល់អតិថិជនខ្លួន។
សេចក្ដីប្រកាសព័ត៌មានពីគ្រឹះស្ថានអម្រឹតបានឲ្យដឹងថា អតិថិជនឥណទានភាគច្រើនខ្ចីប្រាក់ជាក្រុម ហើយជាអ្នករស់នៅជនបទដោយខ្ចីប្រាក់ក្នុងទំហំតូចៗ និងជារឿយៗពឹងផ្អែកលើប្រាក់ចំណូលពីសមាជិកគ្រួសារដែលធ្វើការងារក្នុងរោងចក្រកាត់ដេរ ដែលត្រូវបានបិទទ្វារដោយសារការរីករាលដាលជំងឺកូវីដ ១៩។
អម្រឹតបានឲ្យដឹងថា ដោយសារឥណទានក្រុមធានាទាំងអស់នេះស្ថិតក្នុងចំណោមឥណទានងាយរងគ្រោះបំផុតព្រោះតែការពិបាកផ្នែកសេដ្ឋកិច្ចក្នុងស្ថានការណ៍បច្ចុប្បន្ន ហេតុនេះបើអតិថិជនកម្ចីតូចៗប្រភេទនេះស្នើសុំពន្យារការសងអម្រឹតនឹងផ្តល់ការពន្យារពេលសងទាំងការប្រាក់ និងប្រាក់ដើមតែម្តងសម្រាប់រយៈពេល ៣ ខែ។
លោក ដុស ឌីន អគ្គនាយកគ្រឹះស្ថានមីក្រូហិរញ្ញវត្ថុអម្រឹតបានឲ្យដឹងថា ជំហរហិរញ្ញវត្ថុដ៏ល្អរបស់អម្រឹតអាចឲ្យគ្រឹះស្ថានហិរញ្ញវត្ថុនេះផ្ដល់ការគាំទ្រដល់អតិថិជនរបស់ខ្លួន ដែលនេះជាផ្នែកមួយដ៏សំខាន់នៃបេសកកម្មអាជីវកម្មអម្រឹត។ ទោះបីជាបញ្ហាប្រឈមដែលបង្កឡើងដោយកូវីដ ១៩ បានប៉ះពាល់ដល់អតិថិជនជាច្រើនរបស់អម្រឹតក៏ដោយ ក៏មានអតិថិជនមួយចំនួនទៀតនៅតែកំពុងប្រតិបត្តិការអាជីវកម្មរបស់ពួកគេប្រកបដោយជោគជ័យដដែល។
លោកថ្លែងថា៖ «អម្រឹតសង្ឃឹមថា ការអនុវត្តពេលវេលាអនុគ្រោះនេះនឹងគាំទ្រដល់អតិថិជនរបស់យើង និងគ្រួសារតាមរយៈស្ថានការណ៍សេដ្ឋកិច្ចដ៏ពិបាកដែលបណ្ដាលមកពីវិបត្តិកូវីដ ១៩ ទូទាំងពិភពលោក»។ លោកបន្ថែមថា រយៈពេលអនុគ្រោះស្រដៀងគ្នានេះមានរយៈពេលចាប់ពី ៣ ខែ ដល់ ៦ ខែនឹងត្រូវផ្ដល់ដល់អតិថិជនខ្ចីប្រាក់លក្ខណៈបុគ្គលម្ដង ១ ករណីៗ។
សេចក្ដីប្រកាសនេះធ្វើឡើងរយៈពេលប៉ុន្មានថ្ងៃ បន្ទាប់ពីសមាគមមីក្រូហិរញ្ញវត្ថុកម្ពុជា (CMA) ចេញសេចក្ដីប្រកាសព័ត៌មានរួមមួយថា សមាជិករបស់ខ្លួននឹងខិតខំប្រឹងប្រែងឲ្យអស់ពីសមត្ថភាពក្នុងការឆ្លើយតប និងដើម្បីគាំទ្រអតិថិជនដែលកំពុងប្រឈមការពិបាកក្នុងអំឡុងនេះ ហើយវាក៏ជាការឆ្លើយតបទៅតាមការណែនាំពីធនាគារជាតិនៃកម្ពុជា (NBC) កាលពីថ្ងៃទី ២៧ ខែមីនា ដែលបានចេញសារាចរណែនាំដល់ធនាគារ និងគ្រឹះស្ថានហិរញ្ញវត្ថុទាំងអស់ស្ដីពីការរៀបចំឥណទានឡើងវិញ សម្រាប់កម្ចីនៅក្នុងវិស័យអាទិភាព ៤ គឺទេសចរណ៍ កាត់ដេរ សំណង់ ដឹកជញ្ជូន និងឡូជីស្ទិក។
លោក ដុស ឌីន បានឲ្យដឹងទៀតថា អម្រឹតនឹងយកចិត្តទុកដាក់ជាពិសេសដល់ក្រុមអ្នកខ្ចីប្រាក់ជាបុគ្គលក្នុងវិស័យដែលបានកំណត់ដោយធនាគារជាតិនៃកម្ពុជារួមមាន ទេសចរណ៍ កាត់ដេរ សំណង់ និងដឹកជញ្ជូន និងផ្នែកខ្លះនៃវិស័យកសិកម្មផងដែរ។
រហូតមកដល់ពេលនេះ អម្រឹតបម្រើអតិថិជនជាង ៥០០ ០០០ នាក់ ដែលចាប់ពីកសិករមានប្រាក់ចំណូលទាបដល់សហគ្រាសធុនតូច និងមធ្យមសម្រាប់ទាំងការផ្ដល់កម្ចី និងប្រាក់បញ្ញើ។ គ្រឹះស្ថានហិរញ្ញវត្ថុមួយនេះមានទ្រព្យសកម្មជាង ១ ០០០ លានដុល្លារ និងប្រាក់បញ្ញើជាង ៥០០ លានដុល្លារអាមេរិក៕ LA
