.jpg)
យន្តហោះដែលហោះរំលងពីលើដំបូងផ្ទះប្រជាពលរដ្ឋនៅក្បែងអាកាសយានដ្ឋានអន្តរជាតិភ្នំពេញ។ ភ្នំពេញ ប៉ុស្តិ៍
ភ្នំពេញៈ ក្រុមហ៊ុនអាកាសចរណ៍ថ្មីពីរបន្ថែមទៀត គ្រោងនឹងបើកដំណើរការសេវាហោះហើរក្នុងទីផ្សារអាកាសចរណ៍កម្ពុជានៅចុងឆ្នាំនេះ ខណៈក្រុមហ៊ុន ៤ ផ្សេងទៀតកំពុងស្ថិតក្នុងដំណាក់កាល សុំវិញ្ញាបនបត្រហោះហើរ( AOC) ។ នេះបើយោងតាមលោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល។
លោក ស៊ិន ចាន់សិរីវុត្ថា ថ្លែងថា ក្រុមហ៊ុនអាកាសចរណ៍ MJ airline និង ដំរីអង្គរអ៊ែរឡាញ ទទួលបានយល់ព្រមពីរដ្ឋាភិបាលសម្រាប់ការចូលនៅក្នុងឧស្សាហកម្មអាកាសចរណ៍កម្ពុជា បន្ទាប់ពីបានដាក់ពាក្យសុំ AOC ដែលតាមការគ្រោងទុក ក្រុមហ៊ុននេះគ្រោងនឹងប្រតិបត្តិការនៅចុងឆ្នាំនេះ ខណៈក្រុមហ៊ុនអាកាសចរណ៍៤ ផ្សេងទៀតកំពុងស្ថិតលើដំណើរការសុំ AOC ផងដែរ។
លោកបន្តថា ក្រុមហ៊ុនអាកាសចរណ៍ MJ airline និង ដំរីអង្គរអ៊ែរឡាញ គឺជាការវិនិយោគរួមជាមួយវិនិយោគិនកម្ពុជា និងចិន ។
ក្រុមហ៊ុនអាកាសចរណ៍នេះនឹងពឹងផ្អែកលើទីផ្សារប្រទេសចិនដ៏សំខាន់។
លោកថ្លែងថា៖ «តាមការគ្រោងទុក ក្រុមហ៊ុន MJ airline នឹងប្រតិបត្តិការនៅចុងឆ្នាំនេះ ហើយក្រុមហ៊ុនអាកាសចរណ៍ ដំរីអង្គរអ៊ែរឡាញ នឹងប្រតិបត្តិការនៅដើមឆ្នាំក្រោយ»។
លោកបន្តថា៖ «ក្រុមហ៊ុនអាកាសចរណ៍ទាំងពីរនេះ នឹងទាក់ទាញការមកដល់ភ្ញៀវទេសចរជនជាតិចិនមកកម្ពុជា» ។ លោកបន្ថែមថា ក្រុមហ៊ុនអាកាសចរណ៍ទាំងពីរគឺជាក្រុមហ៊ុនហោះហើរទៀតទាត់។
លោកបញ្ជាក់ថា បច្ចុប្បន្នមានក្រុមហ៊ុនអាកាសចរណ៍ក្នុងស្រុកចំនួន៧កំពុងប្រតិបត្តិការ ។ លោកបន្តថា៖ «តាមចំនួននៃការចូលមករបស់ក្រុមហ៊ុនអាកាសចរណ៍ វាច្រើនបន្តិចក្នុងការដោះស្រាយសម្រាប់ទីផ្សារអាកាសចរណ៍ ប៉ុន្តែវាល្អដែល យើងមានការប្រកួតប្រជែងដ៏ល្អ និងផ្ដល់ជម្រើសកាន់តែច្រើនសម្រាប់អតិថិជន»។
រដ្ឋមន្ត្រី ក្រសួងទេសចរណ៍កាលពីចុងសប្តាហ៍មុនក៏បានអះអាងថា ក្នុងរយៈពេល ៣ ខែ ខាងមុខទៀតនឹងការហោះហើរត្រង់ពីឥណ្ឌូនេស៊ីមកប្រទេសកម្ពុជា ប៉ុន្តែ លោកមិនបានបញ្ជាក់ពីកាលបរិច្ឆេទច្បាស់លាស់ទេ។ ដំណឹងនៃការហោះហើរត្រង់រវាងកម្ពុជា និងឥណ្ឌូនេស៊ីត្រូវបានគេលើកឡើងជាច្រើនដងមកហើយ៕LA
