ភ្នំពេញៈ ក្រុមហ៊ុនអាកាសចរណ៍ជាច្រើនត្រូវបានគេរំពឹងថានឹងដាក់ពាក្យសុំវិញ្ញាបនបត្រហោះហើរ (AOC) នៅឆ្នាំក្រោយ។ នេះបើយោងតាមមន្ដ្រីជាន់ខ្ពស់នៅរដ្ឋលេខាធិការដ្ឋានអាកាសចរស៊ីវិល (SSCA)។
លោក កែវ ស៊ីវន ប្រធានផ្នែកការហោះហើរនៃអាកាសចរស៊ីវិលបានប្រាប់ភ្នំពេញប៉ុស្ដិ៍កាលពីម្សិលមិញថា យ៉ាងហោចណាស់មានក្រុមហ៊ុនអាកាសចរណ៍ច្រើនជាង៣ត្រូវរំពឹងថានឹងដាក់ពាក្យស្នើសុំ AOC នៅដើមឆ្នាំក្រោយ។
លោកលើកឡើងថា៖ « SSCA បានទទួលការយល់ព្រមពីរដ្ឋាភិបាលក្នុងការចេញ AOC ដល់ក្រុមហ៊ុនអាកាសចរណ៍យ៉ាងហោចណាស់៣។ ខ្ញុំរំពឹងថាយ៉ាងហោចណាស់ក្រុមហ៊ុនអាកាសចរណ៍មួយនឹងដាក់ពាក្យស្នើសុំ AOC របស់ខ្លួននៅដើមឆ្នាំក្រោយ ហើយពីរទៀតនឹងស្នើសុំតាមក្រោយ»។
លោកបានបន្តថា ក្រុមហ៊ុនអាកាសចរណ៍ផ្ដោតលើជើងហោះហើរអន្តរជាតិជាជាងជើងហោះហើរក្នុងស្រុក ដោយសារតែទីផ្សារមានសក្ដានុពល ប៉ុន្តែមិនបានបង្ហាញទិសដៅពិតប្រាកដនៅក្នុងផែនការពីក្រុមហ៊ុនអាកាសចរណ៍ទាំងនេះទេ។
លោកបានលើកឡើងថា៖ «វានឹងត្រូវការយ៉ាងហោចណាស់ ៤ ខែក្នុងការបញ្ចប់ការវាយតម្លៃអំពីក្រុមហ៊ុនអាកាសចរណ៍ដើម្បីឆ្លើយតបនឹងតម្រូវការរបស់ SSCA»។
លោកបានបន្ថែមថា ជាមួយក្រុមហ៊ុនអាកាសចរណ៍៥ត្រូវបានផ្ដល់ AOC រួចហើយ នៅទីផ្សារអាកាសចរណ៍កម្ពុជានៅតែមានកន្លែងសម្រាប់ក្រុមហ៊ុនអាកាសចរណ៍ជាច្រើនទៀតបើសេដ្ឋកិច្ចប្រទេសនេះបន្តកើនឡើង។
យោងតាមលោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដា្ឋនអាកាសចរស៊ីវិល វិនិយោគិនក្រុមហ៊ុនអាកាសចរណ៍មកពីប្រទេស ចិន និងកោះតៃវ៉ាន់។
លោកថា៖ «ក្រុមហ៊ុនអាកាសចរណ៍ដែលត្រូវរំពឹងថានឹងចូលមកគឺជា ក្រុមហ៊ុនអាកាសចរណ៍ធុនតូច និងមធ្យម។ ក្រុមហ៊ុនទាំងនេះយ៉ាងហោចណាស់មានយន្តហោះពីរគ្រឿង»។
ចំនួននេះឆ្លុះបញ្ចាំងពីការកើនឡើងចំណាប់អារម្មណ៍មកលើទីផ្សារអាកាសចរណ៍របស់កម្ពុជាមកពីវិនិយោគិនជនជាតិចិន។
លោកបានបញ្ជាក់ថា៖ «ទីផ្សារអាកាសចរណ៍នៅក្នុងប្រទេសចិនគឺធំ។ ការកើនឡើងក្រុមហ៊ុនអាកាសចរណ៍ទំនងជាមានលទ្ធផលច្រើនដោយសារមានសហប្រតិបត្តិការរវាងប្រទេសកម្ពុជា និងចិនលើទំនាក់ទំនងសេដ្ឋកិច្ចជាពិសេសនៅក្នុងវិស័យទេសចរណ៍»។
លោក អាង គឹមអៀង ប្រធានសមាគមភ្នាក់ងារទេសចរណ៍កម្ពុជា បានថ្លែងថា ជើងហោះហើរកាន់តែច្រើននឹងផ្ដល់អត្ថប្រយោជន៍ដល់ឧស្សាហកម្មទេសចរណ៍កម្ពុជាកាន់តែច្រើន។
លោកបន្តថា៖ «យើងនៅមិនមានជើងហោះហើរភ្ជាប់កម្ពុជាជាមួយបណ្ដាប្រទេសទាំងអស់ក្នុងតំបន់នៅឡើយទេ។ ទោះបីជា ខ្ញុំសង្ឃឹមថានឹងមើលឃើញជើងហោះហើរចម្ងាយវែងកាន់តែច្រើន ប៉ុន្តែជើងហោះហើរកាន់តែច្រើនទៅកាន់បណ្ដាប្រទេសក្នុងតំបន់ក៏ត្រូវការសម្រាប់កម្ពុជាដើម្បីចាប់យកភ្ញៀវទេសចរកាន់តែច្រើនផងដែរ»៕PB
