ភ្នំពេញ: ក្រុមហ៊ុនអាកាសចរណ៍អន្តរជាតិ JC គ្រោងនឹងដំណើរការការហោះហើរថ្មីរវាងទីក្រុងសៀមរាប ទៅទីក្រុងយ៉ាំងហ្គោន និង Mandalay ប្រទេស មីយ៉ាន់ម៉ា។ នេះបើតាមនាយកប្រតិបត្តិ និងប្រធានក្រុមអ្នកបើកបរយន្តហោះលោក Anupama Pathirana។
លោក Anupama Pathirana បានប្រាប់សារព័ត៌មានមីយ៉ាន់ម៉ា The Eleven ថា៖ «យើងមានគម្រោងដំណើរការការហោះហើរថ្មីរវាងខេត្តសៀមរាបទៅទីក្រុងយ៉ាំងហ្គោន និង Mandalay»។
ក្រុមហ៊ុនអាកាសចរណ៍នេះទើបតែបានបើកជើងហោះហើរត្រង់ភ្នំពេញ យ៉ាំងហ្គោនកាលពីថ្ងៃទី ១៧ សីហា តាមយន្តហោះប្រភេទ Airbus A320 ដែលអាចផ្ទុកអ្នកដំណើរចំនួន ១៨០ នាក់ និងហោះហើរ ៣ ជើងក្នុងមួយសប្តាហ៍។ បច្ចុប្បន្នក្រុមហ៊ុននេះក៏បានហោះហើរពីភ្នំពេញទៅទីក្រុង Mandalay តាមរយៈទីក្រុងម៉ាកាវ។
លោកបន្តថា៖ «យើងបានផ្តល់សេវាកម្មដល់អ្នកដំណើរប្រមាណ ១ លាននាក់ជារៀងរាល់ឆ្នាំ និងមានគម្រោងធ្វើការពង្រីកក្រុមយន្តហោះ និងការហោះហើរទៀងទាត់។ សេវាកម្មរបស់យើងគ្របដណ្តប់ជាង ៥០ ភាគរយ នៃទីផ្សារនៅតំបន់អាស៊ីអាគ្នេយ៍ និងអាស៊ីខាងត្បូង។ យើងសង្ឃឹមថានឹងដំណើរការហោះហើរជាង ៥០ ជើង ដែលមានយន្តហោះចំនួន ២០ គ្រឿង នៅមុនឆ្នាំ ២០២០»។
លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានស្វាគមន៍ចំពោះគម្រោងរបស់ក្រុមហ៊ុន JC ប៉ុន្តែលោកមើលឃើញថា ផ្លូវហោះហើរនេះហាក់មានទីផ្សារមិនសូវល្អនោះទេ។
លោកថ្លែងថា៖ «ខ្ញុំអត់ដឹងថា ក្រុមហ៊ុន JC សិក្សាទីផ្សារយ៉ាងម៉េចគ្រាន់តែផ្លូវនេះកត្តាទីផ្សារមិនសូវល្អនោះទេដោយសារទំនោរ និងការទាក់ទាញការធ្វើទេសចរណ៍កាវិនិយោគ និងការធ្វើពាណិជ្ជកម្មនៅមានកម្រិតនៅឡើយ»។
ទោះបីយ៉ាងនេះក្តីលោករំពឹងថាគម្រោងហោះហើរនេះនឹងជួយជំរុញភ្ញៀវទេសចរមីយ៉ាន់ម៉ាមកទស្សនាប្រទេសកម្ពុជា។ លោកថ្លែងថា៖ «ខ្ញុំមើលឃើញថាមានផលចំណេញខ្លះក្នុងវិស័យទេសចរណ៍ប្រសិនបើគាត់នាំភ្ញៀវទេសចរមកច្រើន យើងនឹងកើនភ្ញៀវទេសចរ និងការចាយវាយរបស់ភ្ញៀវទេសចរ»។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជានិយាយថា គម្រោងហោះហើរនេះនឹងជួយជំរុញកំណើនភ្ញៀវទេសចរមកប្រទេសកម្ពុជាតាមរយៈក្រុមហ៊ុនអាកាសចរណ៍ JC នេះ។ លោកបន្ថែមថាជើងហោះហើរក៏ជួយសម្រួលដល់ការដឹកទំនិញផងដែរ។
លោកថ្លែងថា៖ «នេះជាគោលដៅហោះហើរទាក់ទាញមួយ ព្រោះយើងចង់បានភ្ញៀវមកពីប្រទេសទី ៣ ទៅលេងភូមា ហើយមកលេងស្រុកខ្មែរយើងវិញទាំងនៅក្រុងភ្នំពេញ និងក្រុងអង្គរសៀមរាប»។
លោក ហូ វណ្ឌី សង្កេតថាភ្ញៀវអឺរ៉ុបក៏និយមទៅលេងប្រទេសមីយ៉ាន់ម៉ាដែរ ហើយការដែលមានជើងហោះហើរជាមួយកម្ពុជានេះក៏នឹងភ្ញៀវទាំងនោះមកទស្សនាកម្ពុជាផងដែរ។ លោកបានបន្តថា៖ «នៅភូមាមានសហគមន៍អឺរ៉ុបទៅលេងដែលជាឱកាសមួយតភ្ជាប់ពីភូមាមកកម្ពុជាតាមក្រុមហ៊ុនអាកាសចរណ៍ JC»។
ប៉ុន្តែសម្រាប់លោក ចាន់សិរីវុត្ថា ផ្លូវហោះហើរដែលមានភាពទាក់ទាញភ្ញៀវទេសចរគឺផ្លូវហោះហើរពីប្រទេស ថៃ ចិន និងសិង្ហបុរី៕LA