.jpg)
លោស្រី អេង លីគួង ប្រធានសមាគមសហគ្រិនស្ត្រីកម្ពុជា។ ចេង សុខហ័ង
ភ្នំពេញៈ សមាគមសហគ្រិនស្ត្រីកម្ពុជាជាសមាគមដែលតំណាងស្រ្តីជាអ្នកដឹកនាំក្នុងវិស័យធុរកិច្ច។ គោលដៅរបស់សមាគមគឺ នាំយកនូវកត្តាប្រឈម ឬបញ្ហាទៅដល់រដ្ឋាភិបាល និងបណ្តាញព័ត៌មាន ដើម្បីជួយជំរុញនូវការរីកចម្រើនដល់វិស័យធុរកិច្ច ដែលពាក់ព័ន្ធនឹងស្ត្រី ព្រមទាំងផ្តល់នូវបណ្តាញអាជីវកម្ម សម្រាប់ម្ចាស់អាជីវកម្មស្រ្តីដែលមានឥទ្ធិពលជំរុញឲ្យមានការរីកចម្រើនយ៉ាងលឿន និងខ្លាំងក្លាដល់សេដ្ឋកិច្ច។
លោស្រី អេង លីគួង ជាប្រធានសមាគមសហគ្រិនស្រ្តី កម្ពុជា និងជាម្ចាស់គ្លីនិកធ្មេញ Mastercare បានផ្តល់បទសម្ភាសជាមួយអ្នកយកព័ត៌មានកាសែតភ្នំពេញប៉ុស្ដិ៍ ដើម្បីបង្ហាញពីដំណើរការរបស់សមាគម ស្ថានភាព អាជីវកម្មស្ត្រី និងការរីកចម្រើននៅក្នុងសេដ្ឋកិច្ច ។
តើលោកស្រីអាចបង្ហាញពីដំណើររបស់សមាគមសហគ្រិនស្រ្តីកម្ពុជាកន្លងមក និងបច្ចុប្បន្នភាពបានទេ?
ដូចជាយើងបានដឹងកន្លងមកហើយ សមាគមសហគ្រិនកម្ពុជាជាតំណាងស្ត្រីក្នុងភាពជាអ្នកដឹកនាំក្នុងវិស័យធុរកិច្ច ដែលបានបង្កើតឡើងនៅក្នុងឆ្នាំ ២០១១ ដោយមានការគាំទ្រដោយធនាគារពិភពលោក និងក្រសួងកិច្ចការនារី។
បេសកកម្ម និងទស្សនៈ របស់សមាគមរបស់យើង គឺគាំទ្រការកើនឡើងនូវម្ចាស់អាជីវកម្មដែលជាស្រ្តីនៅកម្ពុជា។ សហគ្រិនស្ត្រី និងបង្កើតជាប្រយោជន៍ដល់ការអភិវឌ្ឍសេដ្ឋកិច្ចនៅក្នុងប្រទេស កម្ពុជា។ បច្ចុប្បន្ននេះ យើងមានសមាជិកលើសពី ៥០០ សហគ្រិនស្ត្រីដែលបានចុះបញ្ជីជាមួយសមាគម ហើយចំនួននេះបានបន្តកើនឡើងជារៀងរាល់ខែ។
តើស្ថានភាពអាជីវកម្មគ្រប់គ្រងស្រ្តី មានដំណើរអភិវឌ្ឍយ៉ាងដូចម្តេចនាពេលបច្ចុប្បន្ន?
សហគ្រិនស្រ្តីបច្ចុប្បន្នមានការយល់ដឹងល្អប្រសើរជាងកាលពីមុន ការយល់ដឹងពីការទំនាក់ទំនងជាមួយបណ្តាញអាជីវកម្ម សង្គម និងការអភិវឌ្ឍអាជីវកម្មដើម្បីឈានទៅទីផ្សារមានលក្ខណៈល្អប្រសើរច្រើន។ បន្ទាប់ពីពួកគាត់បានចូលរួមជាមួយយើង ស្ត្រីជាសហគ្រិនអាចរៀនសូត្រពីបទពិសោធ និង ស្វែងយល់ពីអ្វីដែលថ្មីៗ ដើម្បីច្នៃប្រឌិត នូវអាជីវកម្មរបស់ពួកគាត់។
នៅទីនេះ គឺជាកន្លែងប្រមូលផ្តុំនូវបណ្តាញអាជីវកម្ម សមាជិករបស់យើងអាចរៀនសូត្រពីវាគ្មិន និងអ្នកជំនាញដែលអាចជំរុញភាពជឿជាក់ ភាពជាម្ចាស់ការ និងការចាប់ដៃគូ អាជីវកម្ម។
តើអី្វទៅជាកត្តាប្រឈមរបស់ស្រ្តី ហើយតើយើងត្រូវដោះស្រាយយ៉ាងណា?
យើងមើលឃើញថា សហគ្រិនស្រ្តីនៅទីក្រុងភ្នំពេញមានការច្នៃប្រឌិតខ្ពស់ និងបត់បែនបានច្រើន ប៉ុន្តែកត្តាប្រឈមនៅតែមាននៅតាមខេត្ត និងតំបន់ជាយក្រុង ដែលពួកគាត់មានការប្រឈមនឹងកាតព្វកិច្ចកិច្ចការផ្ទះ ចំណេះដឹងនៅមានកម្រិតហើយខ្វះការគាំទ្រពីក្រុមគ្រួសារ។ ទោះជាយ៉ាងណាក៏ដោយ យើងនៅតែបន្តការលើកកម្ពស់សហគ្រិនស្រ្តី យើងកំពុងតែធ្វើបទបង្ហាញពីសមាគមរបស់យើង នៅខេត្តមួយចំនួន ដូចជា ខេត្តសៀមរាប បាត់ដំបង មណ្ឌគិរី និង ខេត្តកំពង់ចាម។ យើងកំពុងរៀបចំផែនការដើម្បីឈានទៅសហគ្រិនស្ត្រីនៅជនបទ និងជួយរកដំណោះស្រាយបញ្ហារបស់គាត់។
តើសមាគមសហគ្រិនស្ត្រីយល់ឃើញយ៉ាងដូចម្តេច ចំពោះការតម្រូវឲ្យមានការចុះបញ្ជីរបស់រដ្ឋាភិបាល?
ផ្អែកទៅតាមការអង្កេតរបស់យើង សហគ្រិនស្រ្តីមានការស្ម័គ្រចិត្ត និងគាំទ្រតាមច្បាប់ ចំពោះការចុះបញ្ជីអាជីវកម្ម និងកាតព្វកិច្ចពន្ធ ប៉ុន្តែសហគ្រិនពីជំនាន់មុន ពួកគាត់នៅមានការស្ទាក់ស្ទើរចំពោះការចាប់ផ្តើម ពីព្រោះពុំមានទំនុកចិត្តខ្លាំង ខណៈពួកគាត់មានភាពស្មុគស្មាញ និងកាតព្វកិច្ចច្រើនចំពោះនីតិវិធី ដូចជាការតម្រូវឲ្យមានការចុះបញ្ជី ការបង់ពន្ធ។ ចំណុចប្រឈមរបស់ពួកគាត់គឺចំណេះដឹងនៅមានកម្រិតដើម្បីបំពេញពាក្យ និងនីតិវិធីផ្សេងៗទៀត។
ប៉ុន្តែចំពោះសហគ្រិនជំនាន់ថ្មីមានការយល់ដឹងច្រើនពីអត្ថប្រយោជន៍ ដែលបានបំពេញកាតព្វកិច្ចចំពោះនីតិវិធីច្បាប់។ ពួកគាត់ដឹងថា ការចុះបញ្ជីអាជីវកម្មនិងការបង់ពន្ធ និងធ្វើឲ្យផលិតផល និងសេវាកម្ម ទទួលស្គាល់ដោយស្តង់ដា និងគុណភាពដើម្បីប្រកួតប្រជែងនៅទីផ្សារ មិនតែប៉ុណ្ណោះ ពួកគាត់ក៏ទទួលបានអត្ថប្រយោជន៍បានច្រើនដូចជា ការយល់ដឹងពីការគ្រប់គ្រងអាជីវកម្ម គ្រប់គ្រងហិរញ្ញវត្ថុ និងការទទួលជំនួយហិរញ្ញវត្ថុពីស្ថាប័នផ្សេងៗ។
ទោះជាយ៉ាងណា ចំណុចទាំងនេះ ក៏ទាមទារឲ្យមានការគាំទ្រពីរដ្ឋាភិបាល និងវិស័យឯកជនដើម្បីជួយផ្តល់នូវវគ្គបណ្តុះបណ្តាលដែលអាចជួយសម្រួលដល់គាត់ពីការយល់ដឹងឯកសារទៅតាមនីតិវិធី និងលើកកម្ពស់ការយល់ដឹងពីអត្ថប្រយោជន៍ដែលជំរុញឲ្យសហគ្រិនស្រ្តីមានទំនុកចិត្ត៕
