.jpg)
កូនក្រពើនៅក្នុងកសិដ្ឋានចិញ្ចឹមក្រពើមួយនៅខេត្តកណ្តាលក្នុងអំឡុងឆ្នាំ ២០០៩។ ហេង ជីវ័ន
សៀមរាបៈ តម្លៃកូនក្រពើកាន់តែបង្ហាញសញ្ញាអវិជ្ជមានដែលធ្វើឲ្យអ្នកចិញ្ចឹមមួយចំនួនក្នុងខេត្តសៀមរាបចង់បញ្ឈប់អាជីវកម្មតែម្តង ព្រោះមិនអាចស៊ូទ្រាំនឹងការខាតបង់បាន។
ម្ចាស់កសិដ្ឋានចិញ្ចឹមក្រពើមួយកន្លែងនៅខេត្តសៀមរាបលោក ចក់ វណ្ណៈ ដែលបច្ចុប្បន្នមាននៅសល់ក្រពើមេប្រហែល ២០០ ក្បាល បាននិយាយថា តម្លៃក្រពើបានធ្លាក់ចុះយ៉ាងខ្លាំង ខណៈសកម្មភាពនៃការទិញលក់ស្ទើរតែមិនមានសោះតែម្តងក្នុងខេត្តសៀមរាប។
លោកបន្តថា ការធ្លាក់ចុះនៅពេលនេះបានធ្វើឲ្យលោកត្រូវខាតបង់ប្រាក់ជាច្រើន ពិសេសការចំណាយទៅលើការទិញត្រីចំណី។ លោកបានថ្លែងថា៖ «បច្ចុប្បន្នក្រពើមិនមានទីផ្សារសោះតែម្តង ដោយសូម្បីតែសាច់ក្រពើស្រស់ក៏មិនសូវមានអ្នកទិញដែរ»។
លោកបន្តថា កូនក្រពើដែលពេលកើតដំបូងក្នុងអំឡុងខែមេសាមានតម្លៃចន្លោះពី ៨ ទៅជាង ១០ ដុល្លារនោះពេលនេះកូនក្រពើដែលប្រវែងប្រហែល ៥០ សង់ទីម៉ែត្រ (អាយុ ៥-៦ ខែ) មានតម្លៃប្រហែល ៥ ដុល្លារប៉ុណ្ណោះ និងមិនមានអ្នកទិញទៀតផង។ កាលពីឆ្នាំមុន កូនក្រពើ ១ ក្បាល មានតម្លៃជាមធ្យមក្នុងរង្វង់ពី ១៣ ទៅ ១៨ ដុល្លារ។
លោកបន្ថែមថា ថ្មីៗមានព័ត៌មានមួយថា មានអ្នកចិញ្ចឹមខ្លះបានកាប់ក្រពើយកស្បែកលក់ និងយកសាច់ទៅឲ្យក្រពើស៊ីវិញទៀតផង។
ក្រពើមេ ដែលកាលពីមុនមានតម្លៃប្រហែល ៦០០ ដុល្លារ ពេលនេះតម្លៃ ២០០ ដុល្លារ ហើយមិនមានអ្នកទិញទៀតផង គឺថោកដូចត្រី។ នេះបើតាមលោក ចក់ វណ្ណៈ។ លោកបន្តថា ស្ថានភាពបែបនេះបានធ្វើឲ្យអ្នកចិញ្ចឹមមួយចំនួនបង្ខំចិត្តលក់ក្រពើទាំងអស់តែម្តង។ លោកអះអាងថា៖ «តម្លៃនេះគឺខាតទាំងស្រុង តែបើមិនលក់នឹងខាតកាន់តែខ្លាំង ព្រោះកូនក្រពើកាន់តែធំ ការចំណាយលើចំណីនឹងកាន់តែច្រើន»។
បច្ចុប្បន្នត្រីចំណីក្រពើដែលនាំចូលមកពីប្រទេស ថៃ មានតម្លៃពី ២ ០០០-២ ៣០០ រៀល ក្នុង ១ គីឡូក្រាម។
សមាជិកសមាគមអ្នកចិញ្ចឹមក្រពើខេត្តសៀមរាបម្នាក់ឈ្មោះ ហាក់ បាននិយាយថា ដោយសារទីផ្សារក្រពើកម្ពុជាមានតែទៅតាមច្រកប្រទេសវៀតណាមនោះ ដូច្នេះតម្លៃវាអាស្រ័យតែលើកអ្នកបញ្ជាទិញតែប៉ុណ្ណោះ។ លោកបន្តថា តម្លៃក្រពើបានធ្លាក់ចុះចំនួន ២ ឆ្នាំមកហើយ គ្រាន់តែឆ្នាំនេះវាបានធ្លាក់ចុះខ្លាំងជាងឆ្នាំមុន។ លោកលើកឡើងថា៖ «ច្រកគឺមានតែវៀតណាម បើគេមិនទិញយើងនឹងត្រូវស្លាប់»។
ទោះយ៉ាងណាលោកបញ្ជាក់ថា លោកនឹងរង់ចាំមើលតម្រូវការ និងតម្លៃនៅឆ្នាំ ២០២០ មុនសិនមុនធ្វើការសម្រេចចិត្តបន្ត ឬបោះបង់។
យោងតាមទិន្នន័យរបស់ក្រសួងកសិកម្មមានកសិដ្ឋានចិញ្ចឹមក្រពើប្រហែល ៧០០ កន្លែងនៅទូទាំងប្រទេសកម្ពុជា ហើយក្នុងនោះមានកសិដ្ឋានចិញ្ចឹមក្រពើចំនួន ៤៤៥ កន្លែងត្រូវបានចុះបញ្ជីនៅក្រសួងកសិកម្ម។
យោងសេចក្តីរាយការណ៍របស់ភ្នំពេញប៉ុស្តិ៍កន្លងមកមានកសិដ្ឋានចិញ្ចឹមក្រពើសរុប ២២ ត្រូវបានទទួលស្គាល់ដោយអនុសញ្ញាអន្តរជាតិដែលជាអនុសញ្ញា (Cites) ដើម្បីការនាំចេញស្បែកក្រពើដោយស្របច្បាប់ទៅទីផ្សារអន្តរជាតិ៕ LA
