ភ្នំពេញៈ ក្រុមហ៊ុនដឹកជញ្ជូនម្ហូបអាហារបានអះអាងថា ទំនោរក្នុងការកាត់បន្ថយការដើរហើរមិនចាំបាច់ចំពេលនៃការរីករាលដាលជំងឺកូវីដ ១៩ បានធ្វើឲ្យការកុម្ម៉ង់ម្ហូបអាហារដែលដឹកជញ្ជូនទៅដល់កន្លែងទទួលបានការពេញនិយម។
លោកស្រី ហឿន សុដាឡែន ប្រធានទីផ្សារនៃក្រុមហ៊ុន Muuve ដែលមានអ្នកចុះឈ្មោះក្នុងកម្មវិធីលើទូរស័ព្ទដៃស្មាតហ្វូតចំនួន ៩៥ ០០០ នាក់ បានប្រាប់ភ្នំពេញប៉ុស្តិ៍តាមរយៈសារអេឡិចត្រូនិកថា តម្រូវការដឹកជញ្ជូនម្ហូបអាហាររបស់ក្រុមហ៊ុនលោកស្រីមានការកើនឡើងជាលំដាប់ចាប់តាំងពីមានការរាតត្បាតជំងឺកូវីដ ១៩។
លោកស្រីថ្លែងថា៖ «អំឡុងពេល ៣ ខែ នៃការរាតត្បាតជំងឺកូវីដ ១៩ ចំនួនអ្នកកុម្ម៉ង់តាមកម្មវិធី Muuve បានកើនឡើង ១៣០ ភាគរយ បើធៀបទៅនឹងរយៈពេលធម្មតា»។
លោកស្រីបន្តថាបច្ចុប្បន្ននេះ Muuve បានសហការជាមួយដៃគូភោជនីយដ្ឋាន ៨០ ភាគរយ នៅទីក្រុងភ្នំពេញចាប់ពីអាហារដ្ឋានតាមដងផ្លូវ រហូតដល់អាហារដ្ឋានធំៗ។
លោកស្រីបញ្ជាក់ថា៖ «យើងផ្តល់ជូនតែសេវាកម្មដឹកជញ្ជូនម្ហូបអាហារមួយមុខគត់ ក៏ប៉ុន្តែយើងក៏គ្រោងនឹងពង្រីកសេវាកម្មផ្សេងៗទៀតក្នុងរយៈពេលខ្លីខាងមុខ ដើម្បីផ្តល់ជូនអតិថិជនរបស់យើង»។
លោកស្រីអះអាងថា កម្មវិធី Muuve បានធ្វើការកត់សម្គាល់ចំណូលចូលចិត្តរបស់អតិថិជនទៅតាមចំណាប់អារម្មណ៍របស់ពួកគេ។ មុខទំនិញដែលត្រូវបានគេកុម្ម៉ងច្រើនជាងគេគឺអាហារតាមដងផ្លូវ ហ្វាសហ្វូត និងតែទឹកដោះគោ។
លោកស្រីបញ្ជាក់ថា៖ «ក្នុងកិច្ចប្រឹងប្រែងដើម្បីឆ្លើយតបនឹងការផ្ទុះជំងឺនេះ យើងបានធ្វើការអប់រំដល់អ្នកដឹកជញ្ជូននៅក្នុងការអនុវត្តគម្លាតចម្ងាយ និងអនាម័យចាប់ពីការវេចខ្ចប់ម្ហូបអាហារជូនអតិថិជន»។
Nham24 គឺជាកម្មវិធីក្នុងទូរស័ព្ទដៃស្មាតហ្វូនសម្រាប់ឲ្យអតិថិជនបញ្ជាទិញអាហារ និងទំនិញពីផ្សារទំនើប។
លោក សោម តុម សហស្ថាបនិកនៃ Nham 24 បានប្រាប់ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា ការកុម្ម៉ង់ម្ហូបអាហារ និងទំនិញតាម Nham 24 កំពុងពេញនិយម និងមមាញឹកខ្លាំងចាប់តាំងពីការផ្ទុះជំងឺកូវីដ ១៩។
លោកថ្លែងថា៖ «យើងឃើញមានការកុម្ម៉ង់ម្ហូបអាហារ និងទំនិញដែលដឹកជញ្ជូនដល់កន្លែងកំពុងមានការកើនឡើងជារៀងរាល់ថ្ងៃ ដោយសារការភ័យខ្លាចឆ្លងជំងឺកូវីដ១៩»។
លោក តុម បន្ថែមថាដោយមើលពីកំណើនតម្រូវការបញ្ជាទំនិញបច្ចុប្បន្ន Nham 24 បានពង្រីកដៃគូជាមួយភោជនីយដ្ឋាន និងហាងទំនិញជាង ២ ០០០ ទីតាំង នៅរាជធានីភ្នំពេញ និងខេត្តសៀមរាបហើយលោកគ្រោងនឹងពង្រីកទៅកាន់ខេត្ត ៣ ទៀតគឺខេត្តកំពង់ចាម កំពត និងបាត់ដំបង។
លោកបន្តថា៖ «ការពេញនិយមរបស់ប្រជាជនកម្ពុជាក្នុងការប្រើប្រាស់ទូរស័ព្ទស្មាតហ្វូនក៏បានជំរុញឲ្យអ្នកទីក្រុងប្រើសេវាកម្មបញ្ជាទិញទំនិញ និងម្ហូបអាហារតាម App មានការពេញនិយមផងដែរ»។
ចុងភៅ សេង ហុកហេង បានបង្កើតទំព័រហ្វេសប៊ុកឈ្មោះ www.facebook.com/hengmartdotcom? ឬ គេហទំព័រ www.hengmart.com សម្រាប់ទទួលការបញ្ជាទិញម្ហូបអាហារ ព្រមទាំងទិញគ្រឿងទេសនៅទីក្រុងភ្នំពេញ។
លោក ទូច រដ្ឋា នាយកគ្រប់គ្រងទូទៅចុងភៅ សេង ហុកហេង បានប្រាប់ភ្នំពេញ ប៉ុស្តិ៍ថា ក្រោយពីមានការរឹតត្បិតក្នុងការជួបជុំក្នុងពិធីជប់លាងតូចធំ ដោយសារការរីករាលដាលជំងឺកូវីដ១៩ ជាសកល ក្រុមហ៊ុនរបស់លោកបានសម្រេចបង្កើតទំព័រហ្វេសប៊ុកនេះដើម្បីបង្កលក្ខណៈងាយស្រួលដល់អតិថិជនក្នុងការកុម្ម៉ង់ម្ហូបអាហារតាមប្រព័ន្ធអនឡាញពីក្រុមហ៊ុនរបស់លោក។
លោកបន្តថា បច្ចុប្បន្នក្រុមហ៊ុនលោកទទួលបានការបញ្ជាទិញ និងកុម្ម៉ង់ម្ហូបអាហារជាមធ្យម ១៥០ កញ្ចប់ក្នុង ១ ថ្ងៃ ហើយលោករំពឹងថាចំនួននេះនឹងកើនដល់ ៣០០ កញ្ចប់ ក្នុង ១ ថ្ងៃនៅពេលខាងមុខ។
លោកមានជំនឿថា ការកើនឡើងនេះដោយសារចុងភៅ សេង ហុកហេង បាននិងកំពុងផ្តល់នូវម្ហូបអាហារដែលមានសុវត្ថិភាព អនាម័យ សេវាកម្មល្អ និងតម្លៃសមរម្យជាងគេ។
លោកថ្លែងថា៖ «ការកុម្ម៉ង់ទិញម្ហូបអាហារមានការកើនឡើងពី ១ ថ្ងៃទៅ ១ ថ្ងៃ ស្របពេលដែលនិន្នាការរបស់ប្រជាជនកំពុងពេញនិយមប្រើប្រាស់បណ្តាញសង្គមនានាដែលលក់ទំនិញលើអនឡាញកាន់តែទទួលបានការចាប់អារម្មណ៍ច្រើន»។
របាយការណ៍របស់និយតករទូរគមនាគមន៍កម្ពុជាបានឲ្យដឹងថា ការប្រើប្រាស់អ៊ីនធឺណិតចល័តលើទូរស័ព្ទចល័តមាន ១៦,១២ លាននាក់ ដើម្បីទទួលបានមាតិកាអនឡាញកាលពីឆ្នាំមុនកើនឡើង ១៨, ៤៧ ភាគរយ បើធៀបនឹងឆ្នាំ ២០១៨។
ទិន្នន័យបានឲ្យដឹងទៀតថា ចំនួនគណនី Facebook ដែលចុះឈ្មោះបានកើនឡើង ២៩ ភាគរយ ដល់ ៨,៨ លានគណនីកាលពីឆ្នាំមុន៕ LA