ភ្នំពេញៈ អាជីវកម្មតម្បាញសូត្រ ហូល ផាមួង និងក្រមាខ្មែរដែលជាធម្មតាតែងមានទីផ្សារល្អខ្លាំងនៅពេលពិធីបុណ្យចូលឆ្នាំខ្មែរជិតចូលមកដល់នោះ នាពេលនេះកំពុងធ្លាក់ចុះយ៉ាងគំហុកដែលធ្វើឲ្យអ្នកក្នុងវិស័យនេះព្រួយបារម្ភយ៉ាងខ្លាំង។
ពិធីបុណ្យចូលឆ្នាំខ្មែរនឹងមកដល់នាសប្តាហ៍ក្រោយគឺចាប់ពីថ្ងៃទី ១៣ ដល់ថ្ងៃទី ១៦ ខែមេសា ដែលជារៀងរាល់ឆ្នាំនៅពេលចូលឆ្នាំថ្មីជិតចូលមកដល់ប្រជាជនខ្មែរតែងតែនាំគ្នាទិញ ហូល ផាមួង និងស៊ឹង ជាដើមយកទៅជូនឪពុកម្តាយ និងបងប្អូនសម្រាប់ប្រើប្រាស់ក្នុងពេលចូលឆ្នាំថ្មី តែឆ្នាំនេះគឺមិនមានសកម្មភាពបែបនេះទេ ព្រោះការបារម្ភពីការឆ្លងកូវីដ ១៩។
អ្នកស្រី ចេន សុភាព ស្ថាបនិក និងជាប្រធានសមាគមកីតម្បាញខ្មែរបានប្រាប់ភ្នំពេញប៉ុស្តិ៍កាលពីថ្ងៃចន្ទថា បច្ចុប្បន្ននេះអាជីវកម្មទាក់ទងនឹងការលក់ផលិតផលពីតម្បាញខ្មែរដែលមានដូចជា ក្រមា ផាមួង ស៊ឹង និងហូលជាដើម កំពុងធ្លាក់ចុះយ៉ាងខ្លាំង។ អ្នកស្រីលើកឡើងថាកាលពីមុននៅពេលដែលរដូវបុណ្យទាន និងពិធីរៀបអាពាហ៍ពិពាហ៍ជិតចូលមកដល់ទាំងអ្នកលក់ និងអ្នកត្បាញគឺមានភាពមមាញឹកខ្លាំង ប៉ុន្តែនៅឆ្នាំនេះសកម្មភាពទាំងអស់នោះមិនមានទៀតទេ។
អ្នកស្រីថ្លែងថា៖ «ការលក់នាអំឡុងមុនពេលចូលឆ្នាំខ្មែរនៅពេលនេះបើធៀបនឹងរយៈពេលដូចគ្នាឆ្នាំ ២០១៩ គឺធ្លាក់ចុះប្រមាណ ៨០ ភាគរយ»។
បើតាមអ្នកស្រី សុភាព កាលពីឆ្នាំមុននាអំឡុងមុនចូលឆ្នាំខ្មែរក្នុង ១ ខែ អ្នកស្រីអាចលក់ផលិតផលពីតម្បាញបានពី ៤០០-៥០០ សំពត់។
អ្នកស្រីបន្តថា៖ «តាមពិតទៅការលក់បានចាប់ផ្តើមធ្លាក់ចុះតាំងពីដើមឆ្នាំមកម្ល៉េះ ប៉ុន្តែវារឹតតែធ្ងន់បន្ថែមទៀតនាពេលជំងឺកូវីដ ១៩ រីករាលដាលកាន់តែខ្លាំងនាប៉ុន្មានសប្តាហ៍ចុងក្រោយនេះ»។
ដោយសារតម្រូវការប្រើប្រាស់មានការធ្លាក់ចុះខ្លាំង បច្ចុប្បន្នការផលិតក៏ត្រូវផ្អាកសកម្មភាពផងដែរ។ អ្នកស្រី សុភាព បាននិយាយថា៖ «ជាមួយនឹងការលក់ធ្លាក់ចុះនេះខ្ញុំក៏បានជំរុញឲ្យសមាជិកក្នុងសមាគមរបស់ខ្ញុំផ្អាកសកម្មភាពត្បាញជាង ៣ សប្តាហ៍មកហើយ»។
អ្នកស្រី សាន វណ្ណារី ម្ចាស់ហាង Silk House ដែលមានលក់វត្ថុអនុស្សាវរីយ៍ និងសម្លៀកបំពាក់ធ្វើពីសូត្រ ហូល និងផាមួងបានប្រាប់ថា វិបត្តិនៃការផ្ទុះជំងឺកូវីដ ១៩ បានធ្វើឲ្យអាជីវកម្មរបស់គាត់ធ្លាក់ដល់សូន្យ ព្រោះតែអតិថិជនភាគច្រើនរបស់គាត់គឺជាភ្ញៀវទេសចរបរទេស។ អ្នកស្រីថ្លែងថា៖ «នេះជាដំណាក់កាលលំបាកបំផុត ដោយមានផលិតផលជាច្រើននៅសល់ក្នុងស្តុក បើទោះបីខ្ញុំព្យាយាមបើកលក់តាមរយៈអនឡាញបន្ថែមក៏ដោយ»។
អ្នកស្រីបន្តថា បើវិបត្តិនេះអូសបន្លាយពេលយូរទៅមុខទៀតអ្នកស្រីនឹងត្រូវជួបប្រទះបញ្ហាកាន់តែធ្ងន់ធ្ងរ ហេតុនេះអ្នកស្រីស្នើឲ្យអាជ្ញាធរក៏ដូចជាស្ថាប័នហិរញ្ញវត្ថុនានាសូមជួយពិនិត្យលទ្ធភាពក្នុងការផ្តល់ប្រាក់កម្ចីឲ្យបានកាន់តែធំទូលាយបន្ថែមទៀតសម្រាប់អាជីវកម្មខ្នាតតូច និងមធ្យម។
ទោះយ៉ាងណាក្នុងដំណាក់កាលដ៏លំបាកនេះម្ចាស់អាជីវកម្មទាំង ២ ខាងលើសុទ្ធតែបានអះអាងថា ពួកគាត់កំពុងព្យាយាមដោះស្រាយបញ្ហាតាមរយៈការយកផលិតផលដែលមានមកដេរជាម៉ាស់ និងសម្ភារប្រើប្រាស់ក្នុងផ្ទះ ដែលមានគុណភាពល្អសម្រាប់ដាក់លក់ផងដែរ។ ការធ្វើបែបនេះគឺដើម្បីជួយទ្រទ្រង់ដល់ដំណើរការរបស់ក្រុមហ៊ុន ជាពិសេសដើម្បីចៀសវាងការកាត់បន្ថយបុគ្គលិក។
ម្ចាស់ហាងកាត់ដេរមួយក្នុងខណ្ឌសែនសុខលោក ចិន សុភា បាននិយាយថា មិនត្រឹមតែការលក់ផលិតផលសូត្រ ហូល និងផាមួងធ្លាក់ចុះទេ សូម្បីតែហាងរបស់លោកក៏មិនមានភ្ញៀវដែរ ខណៈក្នុងរយៈពេលដូចគ្នានេះកាលពីឆ្នាំមុន លោកមិនមានពេលកាត់ឲ្យភ្ញៀវឡើយ។ លោកបាននិយាយថា៖ «ពេលនេះកាលពីឆ្នាំមុន ខ្ញុំមិនទទួលភ្ញៀវទេ ព្រោះមិនមានពេលកាត់ឲ្យគេឡើយ»។
បើយោងតាមរបាយការណ៍យុទ្ធសាស្ត្រសូត្រជាតិឆ្នាំ ២០១៦-២០២០ ការផលិតសរសៃសូត្រនៅកម្ពុជាមានបរិមាណត្រឹមតែ ១ ភាគរយប៉ុណ្ណោះ នៃតម្រូវការប្រើប្រាស់សរុបក្នុងស្រុក ខណៈការនាំចូលមានបរិមាណរហូតដល់ ៩៩ ភាគរយ ដែលស្មើនឹងជាង ៤០០ តោន ក្នុង ១ ឆ្នាំ៕ LA