.jpg)
អាជីវករលក់សម្លៀកបំពាក់ និងវត្ថុអនុស្សាវរីយ៍នៅកន្លែងមួយក្នុងក្រុងសៀមរាបនាពេលកន្លងមក។ រូបថត ភ្នំពេញ ប៉ុស្តិ៍
សៀមរាបៈ អាជីវកម្មពឹងផ្អែកលើវិស័យទេសចរណ៍ក្នុងក្រុងសៀមរាបកំពុងជម្នះនឹងការខាតបង់ ឬបិទទ្វារ ខណៈភ្ញៀវទេសចរបរទេសបានបង្ហាញពីសញ្ញាធ្លាក់ចុះជាបន្តបន្ទាប់ចាប់ពីដើមឆ្នាំ ២០១៩ មក។
របាយការណ៍ក្រសួងទេសចរណ៍បានឲ្យដឹងថា ក្នុងរយៈពេល ៨ ខែ ឆ្នាំ ២០១៩ នេះខេត្តសៀមរាបទទួលបានភ្ញៀវទេសចរអន្តរជាតិ ១,៥៥ លាននាក់ ធ្លាក់ចុះ ១១,១ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។ សម្រាប់ទូទាំងប្រទេសកម្ពុជារយៈពេល ៨ ខែ ទទួលបានភ្ញៀវទេសចរសរុប ៤,៣៦ លាននាក់ កើនឡើង ១០,៤ ភាគរយ បើធៀបរយៈពេលដូចគ្នាឆ្នាំ ២០១៨។
លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរពីម្សិលមិញបានប្រាប់ភ្នំពេញប៉ុស្តិ៍ថា វិស័យភ្ញៀវទេសចរនៅខេត្តសៀមរាបក្នុងឆ្នាំ ២០១៩ នេះមិនមានភាពល្អប្រសើរដូចឆ្នាំមុនទេ ដោយចំនួនភ្ញៀវអន្តរជាតិអាចនឹងធ្លាក់ចុះចន្លោះពី ១៥-២០ ភាគរយបើធៀបនឹងរយៈពេលដូចគ្នាក្នុងឆ្នាំមុន។ ការធ្លាក់ចុះភ្ញៀវអន្តរជាតិកំពុងធ្វើឲ្យម្ចាស់អាជីវកម្មជាច្រើនប្រឈមនឹងការខាតបង់ ឬបិទអាជីវកម្ម។
លោកបានបន្តថា ការធ្លាក់ចុះចំនួនភ្ញៀវទេសចរបរទេសចូលមកទស្សនាខេត្តសៀមរាបអាចបណ្តាលមកពីកត្តាមួយចំនួនដូចជា អាកាសធាតុក្តៅខ្លាំង សណ្តាប់ធ្នាប់ ព្រមទាំងគោលនយោបាយរបស់រដ្ឋាភិបាលដែលលើកទឹកចិត្តខ្លាំងសម្រាប់ភ្ញៀវទេសចរចិន។
នៅក្នុងចំណោមភ្ញៀវទេសចរបរទេស ៤,៣៦ លាននាក់ ដែលកម្ពុជាទទួលបានក្នុងរយៈពេល ៨ ខែ ឆ្នាំ ២០១៩ គឺមានភ្ញៀវចិន ១,៧ លាននាក់ កើនឡើង ៣៣,១ ភាគរយ។
លោកថ្លែងថា៖ «ពេលនេះការងារផ្នែកមគ្គុទ្ទេសក៍កំពុងស្ងប់ស្ងាត់នៅខេត្តសៀមរាប»។
បុគ្គលិកម្នាក់សុំមិនបញ្ចេញឈ្មោះ បម្រើការងារក្នុងសណ្ឋាគារ Lucky Angkor ដែលមាន ១១៥ បន្ទប់បាននិយាយថា សណ្ឋាគារបានបាត់ភ្ញៀវពី ៣០-៤០ ភាគរយ បើធៀបរយៈពេលដូចគ្នាកាលពីឆ្នាំមុន។
បុគ្គលិករូបនេះបាននិយាយថា៖ «ឆ្នាំនេះមិនសូវមានភ្ញៀវចូលមកស្នាក់នៅទេ ដោយបច្ចុប្បន្ន Lucky Angkor Hotel and Spa មានភ្ញៀវស្នាក់នៅជាមធ្យមត្រឹមតែ ២០ បន្ទប់ ប៉ុណ្ណោះក្នុង ១ យប់ ខណៈតម្លៃនៅដដែលធៀបនឹងឆ្នាំមុន»។
អ្នកស្រី ជា សុភ័ក្ត្រ អាជីវករលក់វត្ថុអនុស្សាវរីយ៍នៅផ្សាររាត្រី ផាប់ស្ទ្រីត បាននិយាយថា ដោយសារចំនួនភ្ញៀវទេសចរបរទេសធ្លាក់ចុះច្រើន អ្នកស្រីមិនសូវបានទៅលក់ជាប់លាប់ដូចពេលមុនទេ។ ម្យ៉ាងទៀតពេលនេះមិនត្រឹមតែភ្ញៀវបរទេសធា្លក់ចុះប៉ុណ្ណោះទេ ភ្ញៀវក្នុងស្រុកក៏ធ្លាក់ចុះដែរ។
អ្នកស្រីបន្តថា បើមិនសូវមានភ្ញៀវ អ្នកស្រីក៏អាចនឹងងាកទៅចាប់មុខរបរផ្សេងៗផងដែរនាពេលឆាប់ៗនេះ។
អ្នកស្រីអះអាងថា៖ «ផ្សាររាត្រីដែលកាលពីមុនមានអ្នកលក់ និងអ្នកទិញច្រើនដូចគ្នានោះ ពេលនេះមិនដូចមុនទេ គឺបាត់ភ្ញៀវច្រើន ខណៈកន្លែងលក់ក៏មានបិទទ្វារច្រើនដែរ»។
លោក ចាន់ សុធា អាជីវករដូរលុយមួយកន្លែងនៅជិតមន្ទីរពេទ្យកុមារអង្គរ បាននិយាយថា សៀមរាបស្ងាត់ភ្ញៀវណាស់នៅពេលនេះ។ លោកបន្តថា៖ «ខ្ញុំអាចនិយាយថា ឥឡូវនេះការរកស៊ី ស្ងាត់ស្ទើរតែគ្រប់កន្លែងក្នុងក្រុងសៀមរាប»។ លោកបន្តថាពីមុនមានអតិថិជនលើសពី ៥០ នាក់ក្នុង ១ ថ្ងៃ តែបច្ចុប្បន្នមានមិនដល់ ១០ នាក់ផង។
ទោះយ៉ាងនេះក្តី ម្ចាស់ហាងស្ប៉ាមួយកន្លែងស្ថិតនៅក្រោយសារមន្ទីរអង្គរឲ្យដឹងថា អាជីវកម្មរបស់លោកមិនសូវមានផលប៉ះពាល់ ព្រោះហាងរបស់លោកមានអតិថិជនភាគច្រើនជាអ្នករស់នៅក្នុងស្រុក។ លោកថ្លែងថា៖ «ហាងរបស់ខ្ញុំមានផលប៉ះពាល់តិចតួចប៉ុណ្ណោះ ព្រោះហាងនេះមិនសូវមានភ្ញៀវបរទេសឡើយ»។
ទោះយ៉ាងណាម្ចាស់ហាងខាងលើបានទទួលស្គាល់ថា អ្វីដែលកំពុងកើតឡើងក្នុងខេត្តសៀមរាបនៅពេលនេះពិតជាបង្កក្តីបារម្ភជាច្រើនសម្រាប់ម្ចាស់អាជីវកម្ម៕
វីដេអូ៖
