ភ្នំពេញ៖ រដ្ឋាភិបាលបានចេញអនុក្រឹត្យស្តីពីការអនុវត្តអាករលើពន្ធតម្លៃបន្ថែម (VAT) ចំពោះសកម្មភាពពាណិជ្ជកម្មអេឡិចត្រូនិកនៅកម្ពុជា។ នេះបើតាមអនុក្រឹត្យរបស់រដ្ឋាភិបាលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ៨ មេសា។
អនុក្រឹត្យនេះ ធ្វើឡើងក្នុងគោលបំណង និងទិសដៅកំណតអំពីលក្ខខណ្ឌពិសេស និងដាក់ចេញនូវយន្តការអនុវត្តអាករលើតម្លៃបន្ថែមលើទំនិញឌីជីថល និងសេវាកម្មឌីជីថលដែលធ្វើពាណិជ្ជកម្មតាមប្រព័ន្ធអេឡិចត្រូនិកសម្រាប់ប្រើប្រាស់នៅកម្ពុជា និងការផ្គត់ផ្គង់ដោយអ្នកជាប់ពន្ធអនិវាសនជនដែលមិនមានគ្រឹះស្ថានអចិន្ត្រៃយ៍នៅកម្ពុជា ដើម្បីធានាប្រសិទ្ធភាពនៃការអនុវត្តស្របតាមមាត្រា ៧៥ នៃច្បាប់ស្តីពីសារពើពន្ធ។
អនុក្រឹត្យនេះមានវិសាលភាពអនុវត្តចំពោះការផ្គត់ផ្គង់ទំនិញឌីជីថល ឬសេវាកម្មឌីជីថលតាមប្រព័ន្ធអេឡិចត្រូនិក ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិកដែលធ្វើឡើងដោយអ្នកផ្គត់ផ្គង់អនិសវានជននៅក្រៅប្រទេសកម្ពុជា មកកម្ពុជា។
ដោយឡែកចំពោះសកម្មភាពពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាត្រូវអនុវត្តតាមបទប្បញ្ញត្តិស្តីពីអាករលើតម្លៃបន្ថែមជាធរមាន។
អនុក្រឹត្យនេះ ឲ្យដឹងទៀតថា កាចុះបញ្ញីពន្ធដារសម្រាប់អ្នកជាប់ពន្ធអនិវាសនជនដែលមិនមានគ្រឹះស្ថានអចិន្ត្រៃយ៍នៅកម្ពុជាដែលធ្វើពាណិជ្ជកម្មតាមប្រព័ន្ធអេឡិចត្រូនិកត្រូវមានកតាព្វកិច្ចចុះបញ្ជីពន្ធដារដោយផ្អែកតាមចំណាត់ថ្នាក់អ្នកជាប់ពន្ធតាមរបបស្វ័យប្រកាសដែលកំណត ដោយប្រកាសរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ ការចុះបញ្ជីនេះត្រូវបានអនុវត្តសម្រាប់គោលដៅអាករលើតម្លៃបន្ថែមប៉ុណ្ណោះ។
អនុក្រឹត្យនេះបន្ថែមថា អ្នកជាប់ពន្ធអនិវាសនជនដែលទទួលការផ្គត់ផ្គង់ទំនិញឌីជីថល ឬសេវាឌីជីថល ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិកមកអ្នកប្រើប្រាស់នៅកម្ពុជាត្រូវមានកាតព្វកិច្ចតាមដាក់លិខិតប្រកាស និងបង់ប្រាក់អាករលើតម្លៃបន្ថែមមករដ្ឋបាលសារពើពន្ធយ៉ាងយឺតបំផុតត្រឹមថ្ងៃទី ២០ នៃខែបន្ទាប់ពីខែដែលបានទូទាត់។
អនុក្រឹត្យបន្តថា អ្នកជាប់ពន្ធអនិវាសនជនដែលទទួលការផ្គត់ផ្គង់ទំនិញឌីជីថល ឬសេវាឌីជីថល ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិកពីអ្នកជាប់ពន្ធអនិវាសនជនត្រូវប្រមូលអាករតាមវិធីគិតជំនួស (Reverse Charge) ហើយធ្វើការប្រកាស និងបង់អាករលើតម្លៃបន្ថែមមករដ្ឋបាលសារពើពន្ធតាមច្បាប់ និងបទប្បញ្ញត្តិស្តីពីពន្ធដារជាធរមាន។
អ្នកជាប់ពន្ធនិវាសនជន និងអនិវាសនជនដែលមិនបានបំពេញកាតព្វកិច្ចតាមស្មារតីនៃអនុក្រឹត្យនេះត្រូវទទួលរងទោសទណ្ឌស្របតាមច្បាប់ និងបទប្បញ្ញត្តិស្តីពីពន្ធដារជាធរមាននៃកម្ពុជា៕