ភ្នំពេញៈ ទោះបីអាជីវកម្មលក់ផ្កានិងកូនឈរសម្រាប់តាំងលម្អមើលទៅជាមុខរបរតូចមួយក្តីប៉ុន្តែអាជីវកម្មនេះកំពុងមានការរីកចម្រើនខណៈតម្រូវការកាន់តែមានច្រើននោះ។
ផ្កានិងរុក្ខជាតិតាំងលម្អមានតម្លៃភាគច្រើនមិនមែនផលិតនៅក្នុងស្រុកទេ ប៉ុន្តែត្រូវបាននាំចូលសម្រាប់មកផ្គត់ផ្គង់តម្រូវការក្នុងស្រុក។ ត្រង់ចំណុចនេះជាការខាតបង់មួយសម្រាប់ប្រជាជនកម្ពុជាខណៈដែលប្រទេសនៅក្នុងតំបន់មួយចំនួនបានដាំផ្កាសម្រាប់នាំចេញ។
លោក សរ បុត្រាម្ចាស់ សួនផ្កាធម្មជាតិដែលមានទីតាំងនៅម្តុំផ្សារបឹងត្របែកបានឲ្យដឹងថា តម្រូវការផ្កា និងរុក្ខជាតិតាំងលម្អកំពុងមានការកើនឡើងពិសេសបុណ្យធំៗ។
លោកបានបន្តទៀតថា៖ «ខ្ញុំបានបញ្ជាទិញដើម្បីស្តុកទុកដោយជឿជាក់ថានៅប៉ុន្មានថ្ងៃខាងមុខទៀតការលក់នឹងមានការកើនឡើងយ៉ាងខ្លាំងជាងពេលណាៗទាំងអស់»។
បុណ្យចូលឆ្នាំចិននឹងឈានចូលមកដល់ ហើយនេះគ្រាន់តែផ្នែកមួយនៃពិធីចូលឆ្នាំបរទេសនៅកម្ពុជាប៉ុណ្ណោះប៉ុន្តែវាស្ទើរតែធម្មតាទៅហើយសម្រាប់ពលរដ្ឋខ្មែរទូទៅភាគច្រើនដែលនាំគ្នាប្រារព្ធពិធីបុណ្យចូលឆ្នាំចិន។
លោក សុខ សំណាង ម្ចាស់សួនផ្កាធម្មជាតិម្នាក់ផ្សេងទៀតលើកឡើងស្រដៀងគ្នាដែរ។
លោកបានបន្តថា៖ «ការលក់ផ្កាស្រស់ដូចជា ដើមរាសី ដើមឈូករ័ត្ន ក្រូចសំណាង និង ដើមលុយ នឹងមានការកើនឡើងខ្លាំងនៅអំឡុងសប្តាហ៍នេះ»។
មិនមានទិន្នន័យផ្លូវការពីចំនួននៃការនំាចូលឬការផលិតផ្កាទាំងនេះនៅក្នុងស្រុកឡើយ ហើយក៏មិនមានការស្រាវជ្រាវបង្ហាញថានឹងមានផ្កាស្រស់ប៉ុន្មានត្រូវលក់សរុបក្នុងទីក្រុងភ្នំពេញក្នុងអំឡុងពិធីបុណ្យធំដែរដូចករណីជាក់ស្តែងក្នុងអំឡុងពេលនៃព្រះរាជពិធីគោរពវិញ្ញាណក្ខន្ធព្រះបរមសពព្រះបរមរតនកោដ្ឋនៅពេលនេះជាដើម។
ទោះបីយ៉ាងនេះក្តីអាជីវករលក់ផ្កាយីហោ លីលី នៅភ្នំពេញបានឲ្យដឹងថា គ្រាន់តែការត្រៀមសម្រាប់ពិធីបុណ្យចូលឆ្នាំចិននៅកម្ពុជា ហាងនេះមានគម្រោងលក់ផ្កាឲ្យបាន៣០ ០០០ដុំ។
ផ្កាមានតម្លៃខុសគ្នាទៅតាមប្រភេទនិងអាស្រ័យទៅតាមទំហំរបស់ផ្កា ឬ ប្រភេទដើមរុក្ខជាតិនីមួយៗ។ ទោះយ៉ាងណាក៏ដោយជាទូទៅតម្លៃជាមធ្យមក្នុងមួយឯកត្តាសម្រាប់ផ្កាស្រស់ដែលកំពុងលក់នៅអំឡុងសប្តាហ៍នេះគឺនៅចន្លោះ ពី ១,៥ ដុល្លារ ទៅ ២ ដុល្លារក្នុងមួយដើម ឬមួយបាច់ខណៈដែលប្រភេទដើមរុក្ខាជាតិផ្សេងទៀតអាចមានតម្លៃរហូត១០០ ដុល្លារ ទៅ២០០ ដុល្លារក្នុង១ដើម។អាជីវករដដែលបានឲ្យដឹងថា៖ «ការលក់ផ្កាស្រស់នឹងមានការកើនឡើងខ្លាំងជាពិសេសនៅក្នុងអំឡុងសប្តាហ៍នេះដោយសារខ្ញុំកំពុងទទួលបានការកុម្ម៉ង់ពីម៉ូយលក់រាយជាច្រើននៅក្នុងទីក្រុងភ្នំពេញ»៕
