The Phnom Penh Post Search

Search form




Logo of Phnom Penh Post newspaper Phnom Penh Post - អាជីវកម្ម​សេវា​​​​​​​​​​​​ទេសចរណ៍​កើន​ឡើង

អាជីវកម្ម​សេវា​​​​​​​​​​​​ទេសចរណ៍​កើន​ឡើង

អាជីវកម្ម​សេវា​​​​​​​​​​​​ទេសចរណ៍​កើន​ឡើង

ភ្នំពេញៈ ចំនួន​អាជីវកម្ម​សេវាកម្ម​ទេសចរណ៍​នៅ​ឆ្នាំ ២០១៣ បាន​កើន​ឡើង​តិចតួច​បើ​ទោះ​បី​ជា​ចំនួន​ភ្ញៀវ​ទេសចរ​ជាតិ និង​អន្តរជាតិ​កើន​ឡើង​ក្តី។ នេះ​បើ​តាម​របាយ​ការណ៍​ប្រចាំ​ឆ្នាំ​របស់​ក្រសួង ទេសចរណ៍។

សេវាកម្ម​ជា​មូលដ្ឋាន​នៃ​វិស័យ​ទេសចរណ៍​ទាំង​នោះ​រួម​មាន​ដូចជា​សណ្ឋាគារ ផ្ទះ​សំណាក់ និង​ភោជនីយដ្ឋាន។

តាម​តួលេខ​ទូទាំង​ប្រទេស​ចំនួន​សណ្ឋាគារ​សរុប​មាន​ចំនួន ៤៧៩ កើន ០,៦៣ ភាគរយ ឯ​ផ្ទះ​សំណាក់​វិញ មាន​ចំនួន ១ ៣២៨ កើន ៣,៣៥ ភាគរយ និង​ភោជនីយដ្ឋាន​សរុប​មាន ១១៥៦ កើន ៦,៦៤ ភាគរយ។

លោក ថោង ខុន រដ្ឋ​មន្ត្រី​ក្រសួង ទេសចរណ៍ ថ្លែង​ថា តួលេខ​កើន​តិច​ដោយ​សារ​តែ​សេវាកម្ម​នេះ​បច្ចុប្បន្ន​បាន​ឆ្លើយ​តប​ទៅ​នឹង​តម្រូវ​ការ​របស់​ភ្ញៀវ​ទេសចរ​រួច​ហើយ។ លោក​ថ្លែង​ថា៖ «ឥឡូវ​នេះ​វា​មាន​គ្រប់​ហើយ​តែ​នៅ​ឆ្នាំ​ទៀត​មិន​គ្រប់​ទេ យើង​ត្រូវ​ការ​សង់​បន្ថែម​ទៀត​អ៊ីចឹង​ហើយ​បាន​ជា​អំពាវនាវ​ឲ្យ​មាន​អ្នក​វិនិយោគ​មក​បង្កើត​សណ្ឋាគារ និង​ភោជនីយដ្ឋាន​ល្អៗ​ធំៗ​បែប​ប្រណីត​ទៅ​ទើប​ទាក់​ទាញ​ភ្ញៀវ»។

តាម​របាយ​ការណ៍ កម្ពុជា រំពឹង​ថា នឹង​ទទួល​បាន​ភ្ញៀវ​ទេសចរ ៥ លាន​នាក់​ក្នុង​ឆ្នាំ ២០១៥ និង​ដល់ ៨ លាន​នាក់​ក្នុង​ឆ្នាំ ២០២០។ របាយ​ការណ៍​សរសេរ​ថា ចំនួន​សណ្ឋាគារ ផ្ទះ​សំណាក់ និង​ភោជនីយដ្ឋាន​នៅ​ខេត្ត សៀមរាប ជា​គោលដៅ​ទេសចរណ៍​ធំ​របស់ កម្ពុជា ក្នុង​ឆ្នាំ ២០១៣ ស្ថិត​នៅ​ថេរ។ ក្នុង​នោះ​សណ្ឋាគារ​មាន ១៣៨ ផ្ទះ​សំណាក់​មាន ២៣០ និង​ភោជនីយដ្ឋាន​មាន​ចំនួន ១៥៩។

ប៉ុន្តែ​ចំនួន​សណ្ឋាគារ និង​ភោជនីយដ្ឋាន​នៅ ភ្នំពេញ មាន​ការ​កើន​ឡើង​ខណៈ​ចំនួន​ផ្ទះ​សំណាក់​សរុប ៤២២ ជា​តួលេខ​ថេរ។ ចំនួន​សណ្ឋាគារ​នៅ ភ្នំពេញ ក្នុង​ឆ្នាំ ២០១៣ កើន​ដល់ ២០៣ ធៀប​នឹង​ឆ្នាំ ២០១២ ដែល​មាន​ចំនួន ១៦៤។ ភោជនីយដ្ឋាន​កើន​ឡើង​ពី​ចំនួន ៧៥ ក្នុង​ឆ្នាំ ២០១២ ដល់ ១១២ ក្នុង​ឆ្នាំ ២០១៣។

របាយ​ការណ៍​បន្ត​ថា នៅ​តាម​តំបន់​ឆ្នេរ​ចំនួន​សណ្ឋាគារ​កើន​ពី ៦៩ ដល់ ៧០ ផ្ទះ​សំណាក់​កើន​ពី ២៦៣ ដល់ ២៨៥ និង​ភោជនីយដ្ឋាន​កើន​ពី ១៨៥ ដល់ ២១០។

លោក លូ ម៉េង ប្រធាន​សមាគម​សណ្ឋាគារ​កម្ពុជា​ថ្លែង​ថា ការ​កើន​ឡើង​នៃ​សណ្ឋាគារ និង​ផ្ទះ​សំណាក់​ក្នុង​រាជធានី​ភ្នំពេញ ព្រោះ​ទីក្រុង ភ្នំពេញ កំពុង​ទាក់​ទាញ​ភ្ញៀវ​ទេសចរ​ដែល​ជា​អ្នក​វិនិយោគ និង​ជា​អ្នក​រក​ស៊ី​ច្រើន។

លោក​បន្ត​ថា៖ «កើន​គឺ​ដោយ​សារ​មួយ​រយៈ​ក្រោយ​នេះ​មាន​ភ្ញៀវ​ទេសចរ​ជា​អ្នក​រក​ស៊ី​ចេញ ចូល​មក កម្ពុជា ច្រើន​ហើយ​ម្ចាស់​សណ្ឋាគារ [ដែល​មាន​ស្រាប់] គាត់​ចេះ​តែ​សង់​បន្ថែម។ នៅ សៀមរាប គឺ​មាន​គ្រប់​គ្រាន់​ហើយ»។ លោក​រំពឹង​ថា ផ្នែក​សេវាកម្ម​ស្នាក់នៅ​នេះ​នឹង​បន្ត​កើន​ពី ៨ ទៅ ១០ ភាគរយ​ជា​រៀងរាល់​ឆ្នាំ។

បច្ចុប្បន្ន​សមាគម​សណ្ឋាគារ​កម្ពុជា​មាន​សមាជិក​ចំនួន ៥២ ជា​ម្ចាស់​សណ្ឋាគារ និង​ផ្ទះ​សំណាក់​លំដាប់​ថ្នាក់​ទាំង​លំដាប់​ផ្កាយ និង​ស្តង់ដារ​ធម្មតា។

លោក​បន្ថែម​ថា សមាគម​កំពុង​សិក្សា​ជាមួយ​ក្រសួង ទេសចរណ៍ លើ​ស្តង់ដារ​ចំណាត់​ថ្នាក់​សណ្ឋាគារ និង​ផ្ទះ​សំណាក់​តាម​ស្តង់ដារ​អាស៊ាន​ដើម្បី​ត្រៀម​សម្រាប់​ទទួល​ភ្ញៀវ​ទេសចរ​នៅ​ក្នុង​ឆ្នាំ ២០១៥។

លោក ហូ វណ្ឌី ជា​សហ​ប្រធាន​ក្រុម​ការងារ​អភិវឌ្ឍន៍​វិស័យ​ទេសចរណ៍​ឲ្យ​ដឹង​ថា ការ​កើន​ឡើង​នៃ​ភោជនីយដ្ឋាន​ក្នុង​ទីក្រុង ភ្នំពេញ និង​តំបន់​ឆ្នេរ​គឺជា​ការ​ឆ្លុះ​បញ្ចាំង​នៃ​ជីវភាព​រស់​របស់​ប្រជាជន។

លោក​បន្ត​ថា៖ «ឥឡូវ​អ្នក ភ្នំពេញ គាត់​ចំណាយ​ច្រើន​ជាង​មុន​ហើយ​និយម​បរិភោគ​អាហារ​នៅ​ខាង​ក្រៅ​ផ្ទះ ហើយ​ភ្ញៀវ​ទេសចរ​ក្នុង​ស្រុក​ដែល​ទៅ​លេង​នៅ​តាម​តំបន់​ឆ្នេរ​ក៏​កើន​ដែរ»។

ភ្ញៀវ​ទេសចរ​មក​ទស្សនា​នៅ កម្ពុជា សរុប​នៅ​ឆ្នាំ ២០១៣ មាន ៣ ៥៨០ ០០០ នាក់​កើន ១៧,៨ ភាគរយ​ធៀប​ឆ្នាំ ២០១២។

កម្ពុជា ទទួល​បាន​ចំណូល​ពី​វិស័យ​ទេសចរណ៍​នេះ​សរុប​ក្នុង​ឆ្នាំ ២០១៣ ចំនួន ២ ៥៤៧ លាន​ដុល្លារ៕

អត្ថបទគួរចាប់អារម្មណ៍