The Phnom Penh Post Search

Search form




Logo of Phnom Penh Post newspaper Phnom Penh Post - អាជីវកម្ម​អាហារ​បួស​នៅ​ភ្នំពេញ​កំពុង​មាន​សន្ទុះ

អាជីវកម្ម​អាហារ​បួស​នៅ​ភ្នំពេញ​កំពុង​មាន​សន្ទុះ

អាជីវកម្ម​អាហារ​បួស​នៅ​ភ្នំពេញ​កំពុង​មាន​សន្ទុះ

131127_12
លោកស្រី ប៉ា ណារ៉េត អ្នកគ្រប់គ្រងភោជនីយដ្ឋាន The Vegetarian ហុង មិនា

ភ្នំពេញៈ នៅ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​អាជីវកម្ម​អាហារ​បួស​កំពុង​មាន​សន្ទុះ​គួរ​ឲ្យ​កត់​សម្គាល់​ទាំង​ភោជនីយដ្ឋាន​ក្នុង​ស្រុក​និង​បែប​បរទេស ខណៈ​កំណើន​ទេសចរ​មក​កម្ពុជា​ចេះ​តែ​កើន​ឡើង​ពី​មួយ​ឆ្នាំ​ទៅ​មួយ​ឆ្នាំ ដែល​ជា​កត្តា​មួយ​សំខាន់​ក្នុង​ការ​ជំរុញ​សេវា​ម្ហូប​អាហារ​នៅ​កម្ពុជា។

ហាង​អាហារ​បួស ក៏​ស្ថិត​ក្នុង​សេវាកម្ម​អាហារ​ដ៏​ទាក់​ទាញ​មួយ​សម្រាប់​ទេសចរ​បរទេស​ផង​ដែរ ហើយ​ដែល​គេ​ប្រទះ​ឃើញ​កំពុង​មាន​ការ​កើន​ឡើង។

ភោជនីយដ្ឋាន The Vegetarian ជា​ហាង​អាហារ​បួស​មួយ​ក្នុង​ចំណោម​ហាង​ជាច្រើន​នៅ ភ្នំពេញ។

បន្ទាប់​ពី​ដំណើរការ​បាន​រយៈ​ពេល​ជាង​បី​ឆ្នាំ​មក The Vegetarian បាន​និង​កំពុង​ទាក់​ទាញ​ភ្ញៀវ​ខ្មែរ និង​បរទេស​ដែល​និយម​ម្ហូប​បួស​កាន់​តែ​ច្រើន។

លោក​ស្រី ប៉ា ណារ៉េត អ្នក​គ្រប់​គ្រង​ភោជនីយដ្ឋាន The Vegetarian បាន​ឲ្យ​ដឹង​ថា សេវាកម្ម​ម្ហូប​បួស​កំពុង​ទទួល​បាន​ការ​ពេញ​និយម តែ​ថា​គុណភាព និង​រសជាតិ​ម្ហូប​អាហារ​គឺជា​កត្តា​សំខាន់​ដែល​ត្រូវ​ពង្រឹង​បន្ថែម។

ជា​អ្នក​នៅ​គ្រប់​គ្រង​ហាង​ជំនួស​ម្ចាស់​ហាង​ជា​ជនជាតិ ម៉ាឡេស៊ី ដែល​តែង​តែ​ឡើង​ចុះ​ប្រទេស កម្ពុជា លោក​ស្រី ប៉ា ណារ៉េត បាន​មាន​ប្រសាសន៍​ថា បញ្ហា​ប្រឈម​របស់​ភោជនីយដ្ឋាន​ម្ហូប​បួស​គឺ​ការ​បង្កើត​មុខ​ម្ហូប​ថ្មី ដើម្បី​តម្រូវ​ចំណង់​ចំណូល​ចិត្ត​របស់​អតិថិជន។

ការ​ចូល​ទីផ្សារ​ដំបូង ថវិកា​ជាច្រើន​ត្រូវ​បាន​ចំណាយ​ទៅ​លើ​ការ​ផ្សព្វ​ផ្សាយ​អំពី​ភោជនីយដ្ឋាន​ទៅ​កាន់​អតិថិជន។

លោក​ស្រី​ថ្លែង​ថា៖ «ពេល​ចាប់​បើក​ដំបូង មិន​មាន​អ្នក​ស្គាល់​ទេ។ យើង​ផ្សព្វ​ផ្សាយ​នៅ​លើ​កាសែត​ក្នុង​ស្រុក ទស្សនាវដ្តី​បរទេស និង​ដើរ​ចែក​ខិត្តប័ណ្ណ​នៅ​តាម​ស្តុប​នានា»។ ការ​ផ្សព្វ​ផ្សាយ​បាន​បន្ត​រយៈ​ពេល​ពីរ​ឆ្នាំ រហូត​អតិថិជន​កាន់​តែ​ច្រើន​បាន​ស្គាល់​អំពី​ភោជនីយដ្ឋាន​កាន់​តែ​ច្រើន។ លោក​ស្រី​បន្ត​ថា៖ «ពី​មុន គេ​ស្គាល់​យើង​ថា ជា​ហាង ១ ដុល្លារ ព្រោះ​ម្ហូប​យើង​ភាគ​ច្រើន​មាន​តម្លៃ ១ ដុល្លារ។ ដំបូង​យើង​សំដៅ​អតិថិជន​ខ្មែរ ប៉ុន្តែ​អ្នក​ដែល​មក​ហាង​យើង​គឺ​ភាគ​ច្រើន​បរទេស​មិន​មែន​ខ្មែរ។ យើង​ក៏​ចាប់​ផ្តើម​ផ្លាស់​ប្តូរ​ទិសដៅ»។

អតិថិជន​ភាគ​ច្រើន​ជា​ជនជាតិ​បរទេស​ដែល​រស់​នៅ និង​ធ្វើ​ការ​នៅ​ភ្នំពេញ ជា​អ្នក​ហូប​ម្ហូប​បួស ហើយ​ក៏​មាន​ជនជាតិ​ខ្មែរ​មួយ​ចំនួន​ដែរ។ ដោយ​សង្កេត​ឃើញ​មាន​ភ្ញៀវ​ទេសចរ​កាន់​តែ​ច្រើន​ចាប់​ផ្តើម​ស្គាល់​និង​មក​ទទួល​ទាន​នៅ​ហាង The Vegetarian លោក​ស្រី​បាន​បន្ថែម​មុខ​ម្ហូប ដោយ​មាន​ជម្រើស​រសជាតិ​ដើម​ពី​ប្រទេស​នានា។

បច្ចុប្បន្ន​មុខ​ម្ហូប​នៅ​ហាង​នេះ​មាន​ជិត ១០០ ប្រភេទ ដែល​មាន​ប្រភព​រសជាតិ​មក​ពី​ប្រទេស​ផ្សេងៗ​គ្នា ដូចជា ថៃ វៀតណាម ម៉ាឡេស៊ី ម៉ិកស៊ិក និង អ៊ីតាលី ជាដើម។ លោក​ស្រី​និយាយ​ថា៖ «ខ្ញុំ​និង​ប្រធាន​ខ្ញុំ​តែង​ពិភាក្សា​គ្នា ច្នៃ​មុខ​ម្ហូប​ថ្មីៗ គឺ​យើង​ច្នៃ​តាម​បទ​ពិសោធ​ទៅ​ញ៉ាំ​នៅ​កន្លែង​គេ​ខ្លះ និង​ការ​ស្រាវជ្រាវ​នៅ​លើ​អ៊ីនធឺណិត​ខ្លះ។ បើ​តាម​ខ្ញុំ​ដឹង​ភោជនីយដ្ឋាន​ម្ហូប​បួស​ភាគ​ច្រើន​ជា​ប្រភេទ​ម្ហូប​ចិន ខុស​ពី​យើង​ដែល​មាន​ច្រើន​មុខ»។

លោក​ស្រី​បន្ត​ថា ចំណុច​ខ្លាំង​របស់ The Vegetarian គឺ​ប្រភេទ​មុខ​ម្ហូប​ដែល​មិន​មាន​នៅ​ភោជនីយដ្ឋាន​ដទៃ​ទៀត។ លោក​ស្រី​បន្ត​ថា មុខ​ម្ហូប​ថ្មី​ត្រូវ​ឆ្លង​កាត់​ការ​ធ្វើ​តេស្ត​រសជាតិ​ជា​ច្រើន​ដង​មុន នឹង​ចេញ​នៅ​លើ​បញ្ជី​មុខ​ម្ហូប៖ «យើង​មិន​ខ្វល់​ពី​ការ​ប្រកួត​ប្រជែង​ទេ។ នៅ​ទីនេះ យើង​ផ្តោត​លើ​តែ​ការ​ពង្រឹង​រសជាតិ​អាហារ។ សម្រាប់​របរ​ភោជនីយដ្ឋាន រសជាតិ​គឺ​ជា​រឿង​សំខាន់»។

បច្ចុប្បន្ន ភោជនីយដ្ឋាន The Vegetarian បាន​ឈរ​ជើង​រឹង​មាំ​គួរសម នៅ​ក្នុង​វិស័យ​សេវាកម្ម​ភោជនីយដ្ឋាន​ម្ហូប​បួស​ដូច​គ្នា​នៅ​ក្នុង​ក្រុង ភ្នំពេញ។ ការ​ខិតខំ​ប្រឹង​ប្រែង ក្នុង​ការ​ផ្សព្វ​ផ្សាយ ពាណិជ្ជកម្ម ការ​បត់​បែន និង​ភាព​ច្នៃ​ប្រឌិត​បាន​ធ្វើ​ឲ្យ​ភោជនីយដ្ឋាន​មួយ​នេះ​មាន​ភាព​លេច​ធ្លោ ក្នុង​ទីផ្សារ​ខណៈ​អតិថិជន​ជា​អ្នក​ហូប​បួស​នៅ​កម្ពុជា​នៅ​មាន​កម្រិត​នៅ​ឡើយ។

ភោជនីយដ្ឋាន The Vegetarian នឹង​មាន​ពង្រីក​សាខា​មួយ​ទៀត​នៅ​ឆ្នាំ​ក្រោយ៕

អត្ថបទគួរចាប់អារម្មណ៍