ភ្នំពេញ៖ ផ្សារទំនើបលក់បន្លែ និងត្រីសាច់សុវត្ថិភាពមួយចំនួននៅទីក្រុងភ្នំពេញបានប្តេជ្ញាចិត្តរក្សាតម្លៃដើម ដើម្បីចូលរួមចំណែកជាមួយរដ្ឋាភិបាលក្នុងការសម្រួលជីវភាពប្រជាជនក្នុងអំឡុងពេលបិទខ្ទប់ក្នុងរាជធានីភ្នំពេញ និងក្រុងតាខ្មៅ។
លោក កាន់ បញ្ញារិទ្ធ ប្រធានគ្រប់គ្រងការផលិតនៅក្រុមហ៊ុន ដាវ៉ាន់ (Davane Plc) ដែលជំនាញខាងខ្សែចង្វាក់តម្លៃកសិកម្ម និងទីផ្សារសម្រាប់អាហារសុវត្ថិភាពប្រាប់ ភ្នំពេញ ប៉ុស្ដិ៍ថា ផ្សារដាវ៉ាន់នៅតែរក្សាថ្លៃដើមស្ទើរគ្រប់មុខទំនិញ លើកលែងផលិតផលត្រី និងបន្លែ ៣ ទៅ ៤ មុខត្រូវបានឡើងថ្លៃបន្តិចដែលអាចទទួលយកបាន។
លោកថ្លែងថា៖ «ចំពោះតម្លៃយើងរក្សានៅដដែលទៅតាមលទ្ធភាពដែលយើងអាចធ្វើទៅបាន ដូចជា សាច់ (ជ្រូក គោ) អ្នកផ្គត់ផ្គង់របស់យើងគាត់ព្យាយាមមិនដំឡើងថ្លៃនោះទេ។ ប៉ុន្តែត្រី និងបន្លែចំនួនពីរបីមុខក្នុងចំណោមបន្លែរាប់មុខបានឡើងថ្លៃបន្តិច ហើយការឡើងថ្លៃនេះ គឺមិនឡើងកប់ពពកនោះទេ ឡើងក្នុងលក្ខខណ្ឌមួយដែលប្រជាជនអាចទទួល»។
លោក បញ្ញារិទ្ធ បានឲ្យដឹងថា ផ្សារដាវ៉ាន់នឹងព្យាយាមរក្សាតម្លៃសមរម្យមួយដល់អតិថិជនរបស់ខ្លួនក្នុងការទទួលបានអាហារដែលអាចរក្សាសេដ្ឋកិច្ចរបស់ពួកគាត់បានក្នុងអំឡុងពេលបិទខ្ទប់នេះ។
ជាមួយគ្នានេះ ផ្សារបន្លែសុវត្ថិភាពខ្មែរ (ប.ស.ខ) ដែលគាំទ្រពីធនាគារអភិវឌ្ឍន៍ជនបទ និងកសិកម្មក៏ប្រកាសមិនឡើងថ្លៃទំនិញរបស់ខ្លួនដែរ។ នេះបើតាមទំព័រហ្វេសប៊ុកផ្លូវការផ្សារនេះបានផ្សាយកាលពីថ្ងៃអាទិត្យ។ ប.ស.ខ បានឲ្យដឹងថា រាល់ផលិតផលបន្លែ ផ្លែឈើ និងគ្រឿងទេសរបស់ ប.ស.ខ ពុំមានការលក់ឡើងថ្លៃនោះទេ ដោយរក្សាតម្លៃនៅដដែលដូចមុនពេលមិនទាន់អនុវត្តវិធានការបិទខ្ទប់រាជធានីភ្នំពេញ និងក្រុងតាខ្មៅ។
ប.ស.ខ បញ្ជាក់ថា៖ «បងប្អូនអតិថិជនអាចមកជាវនូវផលិតផលបន្លែ ផ្លែឈើ និងគ្រឿងទេស របស់បន្លែសុវត្ថិភាពខ្មែរ ដោយផ្ទាល់នៅទីតាំង តាមបណ្តោយផ្លូវជាតិលេខ ១ ភូមិវាលស្បូវ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ឬអាចទំនាក់ទំនងតាមលេខទូរស័ព្ទ ០៩២ ១១១ ៤៥៦ និង ០៩៦ ៧២៣ ៤៥៦៦»។
ទោះបីយ៉ាងណា លោក បញ្ញារិទ្ធ បានឲ្យដឹងថា ការដឹកជញ្ជូនទំនិញជួបការលំបាកខ្លាំងក្នុងអំឡុងពេលនេះ ដោយសង្ឃឹមថា អាជ្ញាធរមានសមត្ថកិច្ចនឹងប្រញាប់ផ្តល់លិខិតអនុញ្ញាតធ្វើដំណើរឲ្យបានឆាប់ ដើម្បីសម្រួលដល់ការដឹកជញ្ជូន។
លោកបញ្ជាក់ថា៖ «ការដឹកជញ្ជូនមានការលំបាកខ្លាំង យើងខ្ញុំទទួលការដឹកជញ្ជូនតែក្នុងតំបន់ជុំវិញហាង និងឃ្លាំងស្តុបប៉ុណ្ណោះ (ខណ្ឌសែនសុខ)។ ឥឡូវយើងកំពុងទៅធ្វើលិខិតពីគណៈកម្មការបិទខ្ទប់ថ្នាក់ខណ្ឌ ដើម្បីសុំការអនុញ្ញាតដល់ក្រុមការងាររបស់យើង និងមុខរបររបស់យើងដំណើរការបានវិសាលភាពធំជាងមុន»៕