មណ្ឌលគិរីៈ គម្រោងវិនិយោគព្រលានយន្តហោះថ្មីខ្នាតតំបន់នៅខេត្តមណ្ឌលគិរីមានតម្លៃ ៨០ លានដុល្លារ កំពុងឆ្ពោះទៅរកការអភិវឌ្ឍអេកូទេសចរណ៍។
លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកាលពីថ្ងៃទី ៣០ មីនា បានដឹកនាំកិច្ចប្រជុំជាមួយតំណាងក្រុមហ៊ុន Powerchina International Group(PIG) ដើម្បីផ្តល់ធាតុចូលបន្ថែមលើរបាយការណ៍សង្ខេបស្តីពីការសិក្សាសមិទ្ធិលទ្ធភាពពេញលេញសម្រាប់ការអភិវឌ្ឍអាកាសយានដ្ឋានមណ្ឌលគិរីថ្មី និងតំបន់ឧស្សាហកម្មរណបអាកាសយានដ្ឋាន។
ក្នុងឱកាសនោះលោក ហាវណ្ណាល់ បានផ្តល់អនុសាសន៍ ២ ចំណុចដល់ក្រុមហ៊ុន គឺត្រូវយកចិត្តទុកដាក់លើការដាក់បញ្ចូលបន្ថែមនូវសកម្មភាពអភិវឌ្ឍន៍ទេសចរណ៍ និងសេដ្ឋកិច្ចតំបន់ដើម្បីឱ្យស្របតាមគោលនយោបាយរបស់ក្រសួងទេសចរណ៍ និងត្រូវរកវិធីសាស្ត្រថ្មីៗដើម្បីទាក់ទាញក្រុមហ៊ុនអាកាសចរណ៍ឱ្យធ្វើការហោះហើរទៅតំបន់នោះបានច្រើន។
លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល ប្រាប់ភ្នំពេញប៉ុស្តិ៍ កាលពីថ្ងៃពុធថា នេះជាកិច្ចប្រជុំដើម្បីពិនិត្យ និងផ្តល់ធាតុចូលបន្ថែមទៅលើរបាយការណ៍សិក្សាចុងក្រោយនៃសមិទ្ធិលទ្ធភាពពេញលេញនៅតំបន់ក្រុងរណបឱ្យអាកាសយានដ្ឋាន។
លោកថ្លែងថា៖ «យើងបានផ្តល់អនុសាសន៍ដល់អ្នកពិគ្រោះយោបល់ឯករាជ្យឱ្យគាត់ពិចារណាដាក់បញ្ចូលបន្ថែមទៀតទៅលើការអភិវឌ្ឍរួមតាមប្លង់គោលនៃផែនការមេស្តីពីការអភិវឌ្ឍវិស័យទេសចរណ៍នៅក្នុងខេត្តមណ្ឌលគិរីរបស់ក្រសួងទេសចរណ៍»។
លោកបានឱ្យដឹងថា រដ្ឋាភិបាលចង់អភិវឌ្ឍតំបន់នេះដោយយកគំរូតាមការអភិវឌ្ឍក្នុងខេត្តព្រះសីហនុដែលមានសកម្មភាពទេសចរណ៍ ពាណិជ្ជកម្ម វិនិយោគ និងដឹកជញ្ជូនខ្លាំងក្លា។ កំណើនចរាចរណ៍ហោះហើរនៅព្រលានយន្តអន្តរជាតិខេត្តព្រះសីហនុបានហក់ឡើង ៣០០ ភាគរយចាប់ពីឆ្នាំ ២០១៧ ដល់ឆ្នាំ ២០១៩។
លោកបន្ថែមថា៖ «យើងគិតថា នៅពេលអាកាសយានដ្ឋាននេះសាងសង់រួចស្របតាមស្តង់ដាអន្តរជាតិហើយ គឺត្រូវធ្វើយ៉ាងណាឱ្យមានការហោះហើរជាប្រក្រតីចេញចូលច្រើន ដូច្នេះដើម្បីមានភាពទាក់ទាញបានទាល់តែតំបន់នោះមានផលិតផលទេសចរណ៍ថ្មីៗដែលគេអាចដើរកម្សាន្ត ហើយថា តើតំបន់នេះ មានសកម្មភាពសេដ្ឋកិច្ចអ្វីខ្លះដែលធ្វើឱ្យមនុស្សចង់ទៅបង្កើតអាជីវកម្ម ហើយផលិតផលកសិឧស្សាហកម្មអ្វីខ្លះនឹងត្រូវដឹកជញ្ជូនតាមផ្លូវអាកាស?»។
លោកជឿថា៖ «បើតំបន់នោះពុំមានសកម្មភាពទេសចរណ៍ សេដ្ឋកិច្ច ពាណិជ្ជកម្ម និងការវិនិយោគ ការស្រូបទាញការហោះហើរអ្នកដំណើរ និងការដឹកជញ្ជូនទំនិញរវាងខេត្តនេះ និងតំបន់ផ្សេងមិនមានសកម្មភាពដែរ ដូច្នេះអាកាសយានដ្ឋាននេះរីកចម្រើនទៅបានទាល់តែសកម្មភាពទេសចរណ៍ ពាណិជ្ជកម្ម វិនិយោគ និងកសិកម្មអាចដំណើរការទាន់ពេលតែមួយ»។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីបានកត់សម្គាល់ថា រយៈពេលចុងក្រោយនេះមានគម្រោងអភិវឌ្ឍន៍តំបន់អេកូទេសចរណ៍ជាច្រើនកន្លែងនៅខេត្តមណ្ឌលគិរី។ ជាក់ស្តែងកាលពីថ្មីៗនេះក្រុមហ៊ុន ១ បានបង្ហាញគម្រោងមកវិនិយោគជាតំបន់អេកូទេសចរណ៍លើផ្ទៃដីទំហំ ១០ ហិកតា ប៉ុន្តែលោកមិនទាន់ដឹងថាមានការវិវត្តដល់ណានោះទេ៕ LA