ភ្នំពេញៈ ប្រទេស ថៃ បានដាក់ការរឹតបន្តឹងលើការនាំចូលផលិតផលកសិកម្មពីប្រទេសជិតខាង ដែលអាចធ្វើឲ្យប៉ះពាល់ដល់ការនាំចេញដំឡូងមីរបស់កម្ពុជា ដែលពឹងផ្អែកលើទីផ្សារថៃ។
យោងតាមសេចក្តីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទកម្ពុជា បានជូនដំណឹងពីការរឹតបន្តឹងនេះទៅដល់ក្រុមហ៊ុននាំចេញផលិតផលកសិកម្មនៅក្នុងស្រុករបស់កម្ពុជាឲ្យអនុវត្តតាមលក្ខខណ្ឌថ្មីរបស់អាជ្ញាធរថៃដើម្បីអាចបន្តលទ្ធភាពនាំចេញទៅទីផ្សារថៃបន្ត។
ខណៈការប្រមូលផលដំឡូងមីរដូវកាលឆ្នាំ ២០១៨-២០១៩ នឹងត្រូវបញ្ចប់នាដំណាច់ខែមេសានេះ អគ្គនាយកដ្ឋានកសិកម្ម នៃក្រសួងកសិកម្ម បានជូនដំណឹងដល់បណ្តាក្រុមហ៊ុននាំចេញនាំចូលផលិតផលដំឡូងមី ឲ្យបង្កើនការរៀបចំឯកសារបែបបទនាំចេញ និងបញ្ហាអនាម័យឲ្យបានល្អមុននាំចេញទៅកាន់ប្រទេស ថៃ។
នាយកដ្ឋានកសិកម្មប្រទេស ថៃ ថ្មីៗនេះបានជូនដំណឹង ស្តីពីការនាំចូល និងការដឹកជញ្ជូនដំឡូងមីឆ្លងកាត់ព្រំដែនពីកម្ពុជាទៅប្រទេស ថៃ ត្រូវគោរពតាមលក្ខខណ្ឌដូចជា ត្រូវតែសុំលិខិតអនុញ្ញាតការនាំចូលពីប្រទេស ថៃ គ្រប់ទំនិញទាំងអស់ត្រូវតែគ្មានជាប់នូវសត្វល្អិតចង្រៃរស់ ឬសារពាង្គកាយផ្សេងៗ ត្រូវមានវិញ្ញាបនបត្រភូតគាមអនាម័យច្បាប់ដើមពេលដឹកជញ្ជូន។ សេចក្តីជូនដំណឹងបន្តថា នៅពេលនាំទៅដល់ច្រកទ្វារព្រំដែន នៅក្នុងករណីមន្ត្រីថៃពិនិត្យឃើញមានបញ្ហា គេអាចបញ្ជូនត្រឡប់មកវិញ ឬកម្ទេចចោលតែម្តង។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង ដែលជាខេត្តមានការដាំដុះដំឡូងមីច្រើនជាងគេនៅជាប់ព្រំដែនថៃ កាលពីមិ្សលមិញ បាននិយាយថា ដោយសារទិន្នផលដំឡូងមីនៅតាមបណ្តាខេត្តភាគពាយព្យរបស់កម្ពុជាស្ទើរទាំងអស់តែងត្រូវបានគេនាំចេញទៅប្រទេស ថៃ នោះ ដូច្នេះផលប៉ះពាល់នឹងមានចៀសមិនផុតឡើយ។
ទោះបីយ៉ាងនេះក្តី លោកបញ្ជាក់ថា៖ «ដោយសារការប្រមូលផលដំឡូងមីពេលនេះជិតចប់ ដូច្នេះវានឹងមិនប៉ះពាល់ច្រើនដល់ប្រជាកសិករ និងឈ្មួញនាំចេញ តែនឹងអាចមានផលប៉ះពាល់ច្រើនសម្រាប់រដូវកាលក្រោយ»។
លោកបន្តថា បើគិតមកដល់ពេលនេះ ការប្រមូលផលដំឡូងមីសម្រាប់រដូវកាលឆ្នាំ ២០១៨-២០១៩ នៅក្នុងខេត្តបាត់ដំបង សម្រេចបានជាង ៩០ ភាគរយហើយ។
តាមលោក គឹម ហួត សម្រាប់ខេត្តបាត់ដំបងទិន្នផលដំឡូងមីប្រមាណ ៩០ ភាគរយត្រូវបាននាំចេញទៅកាន់ប្រទេស ថៃ ក្រៅពីនោះត្រូវនាំទៅកាន់ប្រទេស វៀតណាម។
លោកបន្តថា ទិន្នផលដំឡូងមីក្នុងឆ្នាំនេះមានការធ្លាក់ចុះបើធៀបនឹងរដូវកាលមុន ដោយសារប្រជាជនជាច្រើនបាននាំគ្នាផ្លាស់ប្តូរពីការដាំដំឡូងមី ទៅដាំពោតក្រហម។
លោក លឹម ហេង អនុប្រធានសភាពាណិជ្ជកម្មកម្ពុជា បាននិយាយថា ការរឹតបន្តឹងការត្រួតពិនិត្យទៅលើបែបបទរដ្ឋបាល ច្បាប់ និងភូតគាមអនាម័យរបស់អាជ្ញាធរថៃ ចំពោះការនាំចេញដំឡូងមី វាអាចនឹងធ្វើឲ្យមានផលប៉ះពាល់រយៈពេលខ្លីសម្រាប់កម្ពុជា តែវានឹងផ្តល់នូវអត្ថប្រយោជន៍យ៉ាងច្រើនសម្រាប់ការនាំចេញទំនិញ និងផលិតផលកសិកម្មនៅពេលអនាគត។
លោកថ្លែងថា៖ «ការកំណត់ពីការនាំចូល និងដឹកជញ្ជូនរបស់ថៃនាពេលនេះ ខ្ញុំគិតថាគឺជាការបង្រៀនមួយសម្រាប់កម្ពុជាក្នុងការខិតខំអភិវឌ្ឍគុណភាព និងភូតគាមអនាម័យផលិតផលរបស់ខ្លួនឲ្យបានកាន់តែល្អសម្រាប់ការនាំចេញទៅកាន់ទីផ្សារអន្តរជាតិ»។
តួលេខរបស់ក្រសួងកសិកម្ម រុក្ខាប្រមាញ់ និងនេសាទ បង្ហាញថា ការដាំដុះដំឡូងមីនៅកម្ពុជាបានកើនឡើងដល់ ៦១៤ ០០០ ហិកតា ដោយផ្ដល់ទិន្នផលប្រមាណ ១៣ ៨១៧ ០០០ តោន កាលពីឆ្នាំ ២០១៧៕ LA