ក្រុងប៊្រុចសែលៈ គណៈកម្មការប្រឆាំងការធ្វើអាជីវកម្មផ្ដាច់មុខដ៏មានឥទ្ធិពលរបស់សហភាពអឺរ៉ុប (EU) កាលពីថ្ងៃពុធ បានចាប់ផ្ដើមដំណើរការស៊ើបអង្កេតស៊ីជម្រៅលើក្រុមហ៊ុន Amazon ក្នុងគ្រាដែលមានភាពសង្ស័យថា ក្រុមហ៊ុនអ៊ីនធឺណិតឈានមុខគេនេះប្រើប្រាស់មិនត្រឹមត្រូវនូវទិន្នន័យពាណិជ្ជករដែលបានផ្ដល់នៅលើគេហទំព័ររបស់ខ្លួន។
ការស៊ើបអង្កេតជាផ្លូវការនេះ បើកទំព័រថ្មីមួយក្នុងយុទ្ធនាការរបស់សហភាពអឺរ៉ុប ដើម្បីដោះស្រាយការគ្របដណ្តប់លើសលប់របស់ក្រុមហ៊ុនបច្ចេកវិទ្យារបស់អាមេរិក ដោយក្រុមហ៊ុន Google ក្រុមហ៊ុន Facebook និងក្រុមហ៊ុន Apple ក៏ជាកំណត់ទិសដៅប្រចាំរបស់ក្រុមនិយតករនៅទីក្រុងប៊្រុចសែលផងដែរ។
ជាមួយការស៊ើបអង្កេតថ្មីនេះ អង្គភាពឃ្លាំមើលការប្រកួតប្រជែងនេះ កំពុងព្យាយាមពង្រីកអំណាចត្រួតពិនិត្យរបស់ខ្លួនទៅលើទិន្នន័យ ដែលជាទ្រព្យដ៏មានតម្លៃបំផុតសម្រាប់ក្រុមហ៊ុនធំៗឈានមុខគេទាំងនេះ ដែលនៅពេលនេះគ្របដណ្ដប់លើការប្រើប្រាស់គេហទំព័រទូទាំងពិភពលោក។
លោកស្រី Margrethe Vestager គណៈកម្មការប្រឆាំងការធ្វើអាជីវកម្មផ្ដាច់មុខរបស់ EU បានឲ្យដឹងនៅក្នុងសេចក្ដីប្រកាសព័ត៌មានមួយថា៖ «ខ្ញុំបានសម្រេចចិត្តក្នុងការត្រួតពិនិត្យយ៉ាងយកចិត្តទុកដាក់ទៅលើការអនុវត្តអាជីវកម្មរបស់ក្រុមហ៊ុន Amazon និងតួនាទីទ្វេរបស់ក្រុមហ៊ុននេះជាទីផ្សារ និងជាក្រុមហ៊ុនលក់រាយ (និង) ដើម្បីវាយតម្លៃលើអនុលោមភាពទៅនឹងវិធានប្រកួតប្រជែង EU»។
ក្នុងចំណុចសំខាន់នៃករណីនេះ គឺសេវារបស់ក្រុមហ៊ុន Amazon ដែលផ្តល់ទៅឲ្យពាណិជ្ជករភាគីទី៣ ដែលប្រើប្រាស់ក្រុមហ៊ុនលក់រាយអនឡាញធំជាងគេរបស់ពិភពលោកមួយនេះ ដើម្បីទទួលបានអតិថិជន និងពង្រីកខ្លួនរបស់ភាគីទី៣ ទាំងនោះដើម្បីចាប់យកអតិថិជន។
គណៈកម្មការនេះឲ្យដឹងថា ក្នុងការផ្ដល់សេវានេះ ក្រុមហ៊ុន Amazon «បន្តប្រមូលទិន្នន័យ អំពីសកម្មភាពនៅលើគេហទំព័ររបស់ខ្លួន»។
យោងតាមសេចក្ដីថ្លែងការណ៍នេះ លទ្ធផលរកឃើញបឋមបង្ហាញថា Amazon «ហាក់ដូចជាប្រើប្រាស់ព័ត៌មានដ៏រសើបអំពីការប្រកួតប្រជែង ពោលគឺជាព័ត៌មានរបស់ក្រុមហ៊ុនលក់នៅលើទីផ្សារអនឡាញ ផលិតផលរបស់ពួកគេ និងប្រតិបត្តិការនៅលើទីផ្សារនេះ»។
ទិន្នន័យដែលគណៈកម្មការនេះ សង្ស័យអាចផ្ដល់ឲ្យ Amazon នូវអត្ថប្រយោជន៍មិនស្មើភាព ដែលជួយឲ្យក្រុមហ៊ុននេះដាក់លក់ទំនិញស្រដៀងគ្នាដែលរារាំងការកើនឡើងការលក់របស់ដៃគូប្រកួតប្រជែង៕ AFP/LA