The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរឲ្យ​ក្រុមហ៊ុន​បញ្ឈប់ការ​ចែក​ស៊ីមកាត

អាជ្ញាធរឲ្យ​ក្រុមហ៊ុន​បញ្ឈប់ការ​ចែក​ស៊ីមកាត

កម្មករ​ចំណាក​ស្រុក​ដែល​ត្រូវ​បាន​បញ្ជូន​ពី​ថៃ​វិញ​នា​ពេល​កន្លង​មក​នៅ​តាម​ច្រក​ព្រំដែន​អន្តរជាតិ​ប៉ោយប៉ែត។
កម្មករ​ចំណាក​ស្រុក​ដែល​ត្រូវ​បាន​បញ្ជូន​ពី​ថៃ​វិញ​នា​ពេល​កន្លង​មក​នៅ​តាម​ច្រក​ព្រំដែន​អន្តរជាតិ​ប៉ោយប៉ែត។ ម៉ៃ វីរៈ

អាជ្ញាធរឲ្យ​ក្រុមហ៊ុន​បញ្ឈប់ការ​ចែក​ស៊ីមកាត

ភ្នំពេញៈ មន្ដ្រី​រដ្ឋាភិបាល​កាល​ពី​ថ្ងៃ​ព្រហស្បតិ៍​បាន​កំណត់​រយៈ​ពេល ២ សប្ដាហ៍​ដល់​ប្រតិបត្តិករ​ទូរស័ព្ទ​ចល័ត​ឲ្យ​បញ្ឈប់​ការ​ចែក​ស៊ីមកាត​មិន​គិត​ប្រាក់​ដល់​អតិថិជន​ដោយ​គ្មាន​អត្តសញ្ញាណ។

ការ​អំពាវនាវ​ធ្វើ​ឡើង​បន្ទាប់​ពី​ពលករ​ខ្មែរ​រាប់​ម៉ឺន​នាក់​ត្រូវ​បាន​ថៃ​ចាប់​បញ្ជូន​មក​កម្ពុជា​វិញ ហើយ​ប្រតិបត្តិករ​ទូរស័ព្ទ​ចល័ត​បាន​ផ្ដល់​ស៊ីម​ដោយ​មិន​គិត​ប្រាក់​ក្នុង​អំឡុង​ពេល​នោះ។

លោក ឆៃ ស៊ីណារិទ្ធិ អគ្គ​ស្នងការ​រង​នគរបាល​ជាតិ​បាន​ប្រាប់ ភ្នំពេញ ប៉ុស្ដិ៍ កាល​ពី​ថ្ងៃ​ព្រហស្បតិ៍​ថា ប្រតិបត្តិករ​ទូរស័ព្ទ​មួយ​ចំនួន​មាន​ឱកាស​ចែក​ចាយ​ស៊ីម​កាត​ដោយ​មិន​គិត​ប្រាក់​ជា​អំណោយ​ដើម្បី​អនុញ្ញាត​ឲ្យ​កម្មករ​ទាំង​នេះ​អាច​ទំនាក់​ទំនង​ក្រុម​គ្រួសារ​របស់​ពួក​គេ ខណៈ​ពួក​គេ​ត្រឡប់​មក​ពី ប្រទេស​ថៃ វិញ។

លោក​បន្ត​ថា៖ «យើង​រក​ឃើញ​ថា មាន​ស៊ីម​កាត​ជាច្រើន​បាន​លក់​ឬ​ផ្ដល់​ឲ្យ​ដោយ​មិន​គិត​ប្រាក់​ដោយ​មិន​មាន​អត្ត​សញ្ញាណ​របស់​អ្នក​ទិញ​នោះ​ទេ។ ពិត​ហើយ​យើង​ទទួល​ស្គាល់​ថា ពួក​គេ​មាន​ចិត្ត​សម្បុរស ប៉ុន្តែ​ពួក​គេ​ត្រូវ​តែ​ធានា​ឲ្យ​ប្រាកដ​ថា អ្នក​ដែល​ទទួល​ស៊ីម​កាត​ទាំង​នោះ​ត្រូវ​តែ​មាន​អត្ត​សញ្ញាណ ព្រោះ​វា​នឹង​បង្ក​ឲ្យ​មាន​បញ្ហា​ដល់​សង្គម ដោយ​សារ​ពួក​គេ​អាច​ប្រើ​ប្រាស់​ស៊ីមកាត​គ្មាន​អត្ត​សញ្ញាណ​ទាំង​នេះ​ដើម្បី​បង្កើត​ជា​ឧបករណ៍​ផ្ទុះ​បាន»។

លោក​លើក​ឡើង​ថា៖ «យើង​បាន​កំណត់​ឲ្យ​ពួក​គេ​ពីរ​សប្ដាហ៍​ដែល​ចាប់​ផ្ដើម​ពី​ដើម ខែ​កក្កដា ប្រើ​ប្រាស់​មធ្យោបាយ​ណា​ក៏​ដោយ [ផ្ញើ​សារ​ដល់​អ្នក​ប្រើ​ប្រាស់​ទាំង​នោះ​តាម​រយៈ​សារ​ជា​អក្សរ​សារ​ជា​សំឡេង។ល។] ដើម្បី​ទទួល​បាន​ឯកសារ​ពាក់ព័ន្ធ​បើ​មិន​បាន​ទេ​នោះ​នៅ​ពេល​កាល​កំណត់​ចូល​មក​ដល់​ពួកគេ​ត្រូវ​តែ​ផ្ដាច់​ប្រព័ន្ធ​ស៊ីមកាត​នេះ»។

លោក​បញ្ជាក់​ថា៖ «ចាប់​ពី​ពេល​នេះ​តទៅ​ពួក​គេ​ត្រូវ​តែ​បញ្ឈប់​ការ​ចែក​ចាយ​ស៊ីមកាត​ដោយ​មិន​គិត​ប្រាក់»។​លោក​ថ្លែង​ថា នៅ​ក្នុង​កិច្ច​ប្រជុំ​ជាមួយ​ប្រតិបត្តិករ​ទាំង​អស់​ពួក​គេ​បាន​ឯកភាព​ចំពោះ​វិធានការ​នេះ។

លោក​បន្ត​ថា ក្រុមហ៊ុន Vietell របស់ វៀតណាម ដែល​ប្រតិបត្តិការ​មិត្តហ្វូន បាន​ចែក​ស៊ីម​កាត​មិន​គិត​ប្រាក់​ប្រហែល ១២ ០០០ ស៊ីម​កាត Mobitels បាន​ចែក​ស៊ីម​កាត​ប្រហែល ៧ ០០០ ខណៈ ​ក្រុមហ៊ុន​ស្មាត ចែក​ប្រហែល ២ ០០០ ស៊ីម​កាត។

លោក​ថ្លែង​ថា គិត​មក​ត្រឹម​ពេល​នេះ​មាន​ស៊ីម​កាត​ពី ១៩ ទៅ ២០ លាន​ត្រូវ​បាន​លក់​និង​ប្រើ​ប្រាស់​៖ «យើង​រក​ឃើញ​ថា ចន្លោះ ២០០០ ទៅ ៣០០០ ស៊ីម​កាត​គ្មាន​ការ​បញ្ជាក់​អត្ត​សញ្ញាណ​អ្នក​ទិញ​ជា​រៀងរាល់​ឆ្នាំ។ ដូច្នេះ​យើង​តម្រូវ​ឲ្យ​ប្រតិបត្តិករ​ចាត់​វិធានការ​ជា​បន្ទាន់​ដើម្បី​ទទួល​យក​ព័ត៌មាន​ពី​អ្នក​ទិញ​ទាំង​នោះ​ឲ្យ​បាន»។

ម្សិលមិញ​មិន​អាច​ទាក់​ទង​ក្រុមហ៊ុន​ទូរស័ព្ទ​ចល័ត​ណា​មួយ​បាន​ទេ៕

អត្ថបទគួរចាប់អារម្មណ៍