អាមេរិកៈ ក្នុងជំនួបរវាងនាយករដ្ឋមន្ដ្រីជប៉ុន ស៊ីនហ្សូ អាបេ និងប្រធានាធិបតីអាមេរិក ដូណាល់ ត្រាំ នៅសប្តាហ៍នេះ មេដឹកនាំកំពូលទាំងពីរហាក់បង្ហាញបំណងផ្ទុយគ្នាររៀងកិច្ចព្រមព្រៀងពាណិជ្ជកម្ម។
ខណៈលោកនាយករដ្ឋមន្ដ្រីជប៉ុន ស៊ីនហ្សូ អាបេ បានថ្លែងថា ទីក្រុងតូក្យូបានត្រៀមខ្លួនជាស្រេចក្នុងការចាប់ផ្ដើមការចរចា «កិច្ចព្រមព្រៀងពាណិជ្ជកម្ម» ជាមួយអាមេរិក ប៉ុន្តែប្រយ័ត្នប្រយែងមិនសន្យាលើកិច្ចព្រមព្រៀងទ្វេភាគី។ លោកត្រាំវិញ និយាយថា កិច្ចព្រមព្រៀងទ្វេភាគីគឺជាដំណោះស្រាយល្អបំផុត។
លោក អាបេ បានលើកឡើងក្នុងសន្និសីទនៃជំនួបជាមួយលោក ត្រាំ ថា៖ «យើងបានយល់ព្រមចាប់ផ្ដើមការចរចាកិច្ចព្រមព្រៀងពាណិជ្ជកម្ម សេរី ស្មើភាព និងទៅវិញទៅមក»។
លោកអាបេ ថ្លែងដោយរំពឹងថា នឹងអាចទាញលោក ដូណាល់ ត្រាំ មករកតុចរចាឡើងវិញលើអ្វីដែលគេហៅថា ភាពជាដៃគូអន្តរប៉ាស៊ីហ្វិក (TPP) ជាកិច្ចព្រមព្រៀងក្នុងតំបន់មួយ ដែលបានចុះហត្ថលេខាដោយលោក បារ៉ាក់ អូបាម៉ា។
សម្រាប់លោក ត្រាំ វិញ គឺចង់មើលឃើញកិច្ចព្រមព្រៀងទ្វេភាគីជាជាងកិច្ចព្រមព្រៀងតំបន់ ដែលទំនងជាកំណត់ទិសដៅខ្លាំងបំផុតលើបញ្ហានយោបាយដ៏រសើបសម្រាប់ទីក្រុង តូក្យូ ដែលរួមមានលទ្ធភាពចូលទីផ្សារកសិកម្ម និងរថយន្ត។ ហើយលោក ត្រាំ មិនបានលើកលែងប្រទេសជប៉ុនចេញពីពន្ធនាំចូលលើ ដែកថែប និង អាលុយមីញ៉ូម ដូចដែលលោកបានធ្វើសម្រាប់សម្ព័ន្ធមិត្ត និងដៃគូផ្សេងទៀតរបស់ទីក្រុងវ៉ាស៊ីនតោននោះទេ។
លើបញ្ហាអាលុយមីញ៉ូមនេះ លោក អាបេ បានបញ្ជាក់ថា៖ «ឧស្សាហកម្មដែកថែប និងអាលុយមីញ៉ូមរបស់ប្រទេសជប៉ុន កំពុងរួមចំណែកយ៉ាងច្រើនដល់ឧស្សាហកម្ម និងការងាររបស់អាមេរិក ដោយមិនមានការគំរាមកំហែងដល់សន្ដិសុខរបស់អាមេរិកនោះទេ»។
លោក ត្រាំ ថ្លែងថា៖ «ខ្ញុំមិនចង់ត្រឡប់ចូលទៅក្នុង TPP នោះទេ ប៉ុន្តែបើពួកគេបានផ្ដល់ដល់ពួកយើងនូវកិច្ចព្រមព្រៀងមួយដែលខ្ញុំមិនអាចបដិសេធ តាងនាមឲ្យអាមេរិកនោះ ខ្ញុំនឹងធ្វើវា»។
លោកបន្តថា៖ «ប៉ុន្តែខ្ញុំចង់បានទ្វេភាគីជាង។ ខ្ញុំគិតថា វាកាន់តែប្រសើរ សម្រាប់ប្រទេសរបស់យើង។ ខ្ញុំគិតថា វាប្រសើរសម្រាប់កម្មកររបស់យើង ហើយខ្ញុំពេញចិត្តយ៉ាងខ្លាំងនូវកិច្ចព្រមព្រៀទ្វេភាគី»។
ទោះបីយ៉ាងនេះក្តី លោក អាបេ ថ្លែងថា៖ «យើងគិតថា TPP ល្អបំផុតសម្រាប់ប្រទេសជប៉ុននិងអាមេរិក ហើយយើងនឹងមានការចរចាជាមួយនឹងការចងចាំគំនិតនេះក្នុងចិត្ត»៕LA