ក្រុងវ៉ាស៊ីនតោនៈ សហរដ្ឋអាមេរិកកាលពីថ្ងៃច័ន្ទបានគំរាមដកហូតពន្ធគយរហូតដល់ ១០០ ភាគរយ លើទំនិញរបសប្រទេស បារាំង ដែលមានតម្លៃ ២,៤ ពាន់លានដុល្លារ ជាការតបតទៅនឹងពន្ធលើសេវាឌីជីថល ដែលអាមេរិកថាជាពន្ធដែលមានការរើសអើង។
ស្រា យ៉ាអួ និងឈីស Roquefort របស់ប្រទេស បារាំង ស្ថិតក្នុងបញ្ជីទំនិញដែលអាចជា ទិសដៅនៃការដកហូតពន្ធក្នុងពេលឆាប់នៅពាក់កណ្តាលខែមករា បន្ទាប់ពីរបាយការណ៍មួយដែលចេញផ្សាយដោយការិយាល័យអ្នកតំណាងពាណិជ្ជកម្មអាមេរិកបានរកឃើញថា ពន្ធឌីជីថលរបស់បារាំងដាក់ពិន័យលើក្រុមហ៊ុនបច្ចេកវិទ្យារបស់អាមេរិក ដូចជា ក្រុមហ៊ុន Google, Apple, Facebook និងក្រុមហ៊ុន Amazon។
លោក Robert Lighthizer អ្នកតំណាងពាណិជ្ជកម្មអាមេរិកបានឲ្យដឹងក្នុងសេចក្តីថ្លែងការណ៍មួយថា សេចក្តីសម្រេចនេះ «បញ្ជូនសញ្ញាច្បាស់លាស់មួយថា សហរដ្ឋអាមេរិកនឹងចាត់វិធានការប្រឆាំងនឹងរបបពន្ធឌីជីថលដែលរើសអើង ឬបើមិនដូច្នេះទេ ដាក់បន្ទុកដែលមិនសមស្របលើក្រុមហ៊ុនរបស់អាមេរិក»។
លោក Lighthizer ក៏ព្រមានផងដែរថា ទីក្រុងវ៉ាស៊ីនតោនកំពុងពិចារណាពង្រីកការស៊ើបអង្កេតទៅលើពន្ធប្រហាក់ប្រហែលនេះក្នុងប្រទេសអូទ្រីស អ៊ីតាលី និងតួកគី។
លោកមានប្រសាសន៍ថា៖ «ការិយាល័យអ្នកតំណាងពាណិជ្ជកម្មអាមេរិកផ្តោតការ យកចិត្តទុកដាក់លើការតបតទៅនឹងកិច្ចគាំពារនិយមដែលកំពុងកើនឡើងរបស់រដ្ឋសមាជិករបស់សហភាពអឺរ៉ុបដែលផ្តោតទិសដៅមិនស្មើភាពលើក្រុមហ៊ុនអាមេរិក មិនថា តាមរយៈពន្ធលើសេវាឌីជីថល ឬកិច្ចប្រឹងប្រែងផ្សេងៗដែលកំណត់ទិសដៅលើក្រុមហ៊ុនសេវាឌីជីថលអាមេរិកឈានមុខគេនោះទេ»។
ការប្រកាសនេះបានកើតមានឡើងត្រឹមតែប៉ុន្មានម៉ោងបន្ទាប់ពីលោកប្រធានាធិបតីអាមេរិក ដូណាល់ ត្រាំ គ្រោងនឹងជួបជាមួយលោកប្រធានាធិបតីបារាំង Emmanuel Macron នៅក្រៅជំនួបកិច្ចប្រជុំកំពូលរបស់អង្គការ NATO ក្នុងទីក្រុងឡុងដ៍នៅថ្ងៃអង្គារម្សិលមិញ។
ពន្ធឌីជីថលរបស់បារាំងដែលត្រូវបានអនុម័តនៅដើមឆ្នាំនេះដកហូតពន្ធ ៣ ភាគរយលើប្រាក់ចំណូលដែលរកបានដោយក្រុមហ៊ុនបច្ចេកវិទ្យានៅបារាំង ដែលជាញឹកញាប់ទទួលបានចំណូលពីការផ្សព្វផ្សាយពាណិជ្ជកម្ម និងសេវាឌីជីថលផ្សេងៗ៕ KC