ក្រុងប៊ុយណូស៊ែៈ សហរដ្ឋអាមេរិក និងសម្ព័ន្ធមិត្តសហភាពអឺរ៉ុប (EU) របស់ខ្លួនកាលពីថ្ងៃសៅរ៍ស្ថិតក្នុងការជាប់គាំងផ្នែកពាណិជ្ជកម្ម បន្ទាប់ពីលោក Steven Mnuchin រដ្ឋមន្ដ្រីក្រសួងហិរញ្ញវត្ថុបានបដិសេធមិនធ្វើតាមការទាមទារឲ្យមានការសម្បទាន។
ក្នុងសុន្ទរកថាបើកកិច្ចប្រជុំកំពូលរបស់ក្រុមប្រទេសមានសេដ្ឋកិច្ចរីកចម្រើនទាំង ២០ (G20) នៅទីក្រុងប៊ុយណូស៊ែ លោក Mnuchin បានជំរុញឲ្យប្រទេសចិន និង EU ត្រូវគោរព «ពាណិជ្ជកម្មសេរី ស្មើភាព និងទៅវិញទៅមក» ចំពេលដែលកំពុងមានការចរចាស្តីពីជម្លោះពាណិជ្ជកម្មពិភពលោកដែលកើនឡើងកាន់តែខ្លាំង ប៉ុន្តែសមភាគីបារាំងរបស់លោកបានរិះគន់តបវិញថា អាមេរិកត្រូវតែ «ត្រឡប់ទៅរកហេតុផលវិញ»។
លោក Mnuchin មិនអាចបត់បែនបាននៅក្នុងវិធីសាស្ដ្ររបស់លោកចំពោះ EU បន្ទាប់ពីមានវិធានការសងសឹកមួយចំនួនដែលបានចាប់ផ្ដើមដោយសារការសម្រេចចិត្តរបស់លោកប្រធានាធិបតីអាមេរិក ដូណាល់ ត្រាំ ក្នុងការដកហូតពន្ធនាំចូលលើការនាំចូលដែកថែប និងអាលុយមីញ៉ូម។
លោក Mnuchin មានប្រសាសន៍ថា៖ «សាររបស់ខ្ញុំគឺច្បាស់លាស់ វាជាសារតែមួយដែលលោកប្រធានាធិបតីបានថ្លែងនៅក្នុងកិច្ចប្រជុំ G7៖ ប្រសិនបើអឺរ៉ុបជឿជាក់លើពាណិជ្ជកម្មសេរី យើងត្រៀមខ្លួនជាស្រេចក្នុងការចុះកិច្ចព្រមព្រៀងពាណិជ្ជកម្មសេរីដោយមិនមានពន្ធនាំចូល មិនមានរបាំងមិនមែនពន្ធ និងមិនមានការឧបត្ថម្ភធន។ វាត្រូវតែមានទាំង ៣ នេះ»។
សារនោះបណ្ដាលឲ្យមានការឆ្លើយតបដ៏រឹងមាំពីលោក Bruno Le Maire រដ្ឋមន្ដ្រីក្រសួងហិរញ្ញវត្ថុ និងសេដ្ឋកិច្ចរបស់ប្រទេសបារាំងនៅក្នុងកិច្ចប្រជុំ G20 ដែលកិច្ចប្រជុំនេះជាជំនួបរបស់ក្រុមរដ្ឋមន្ដ្រីក្រសួងហិរញ្ញវត្ថុ និងប្រធានធនាគារកណ្តាលមកពីប្រទេសមានសេដ្ឋកិច្ចឈានមុខគេទាំង ២០ របស់ពិភពលោក។
លោកមានប្រសាសន៍ថា៖ «យើងបដិសេធចរចាដោយការយកអាវុធមកភ្ជង់នៅនឹងក្បាល»។
លោកថ្លែងថា៖ «វាត្រូវតែជាអាមេរិកដែលត្រូវចាត់វិធានការមុនដើម្បីបន្ធូរបន្ថយស្ថានការណ៍»។
លោកបន្តថាលោករំពឹងថា៖ «នឹងមានការផ្លាស់ប្តូរឥរិយាបថ» ពីលោក ត្រាំ បើមិនអ៊ីចឹងទេ «នឹងមិនមានជម្រើសក្រៅពីការសងសឹកនោះទេ»។
លោកស្រី Christine Lagarde ប្រធានមូលនិធិរូបិយវត្ថុអន្តរជាតិ (IMF) បានបើកកិច្ចប្រជុំកំពូលនេះជាមួយនឹងការបញ្ជាក់ជាថ្មីនូវក្តីបារម្ភរបស់លោកស្រីថា ការកើនឡើងការរឹតបន្តឹងពាណិជ្ជកម្មនឹងប៉ះពាល់ដល់ផលិតផលសរុបក្នុងស្រុក (GDP) ទូទាំងពិភពលោក។
លោកស្រី Lagarde ថ្លែងថាដោយពិចារណាលើ «វិធានការប្រកាសបច្ចុប្បន្ន និងកំពុងដំណើរការ» មូលនិធិ IMF បង្ហាញថាក្នុងសេណារីយោអាក្រក់បំផុត កំណើនសេដ្ឋកិច្ច ០,៥ ភាគរយនឹងត្រូវកាត់បន្ថយពី ផ.ស.ស ពិភពលោក ដែលមានទំហំប្រហែល ៤៣០ ពាន់លានដុល្លារ។
ប៉ុន្តែលោក Mnuchin មិនបានបង្ហាញថាគ្មានសញ្ញាណាមួយដែលបង្ហាញថា អាមេរិកមានឆន្ទៈដកថយនោះទេ។
ដោយសួរពីការគំរាមកំហែងរបស់លោកដូណាល់ ត្រាំ ក្នុងការវាយប្រហារប្រទេសចិនជាមួយនឹងពន្ធពិន័យលើទំនិញទាំងអស់ក្នុងតម្លៃ ៥០០ ពាន់លានដុល្លារដែលប្រទេសនេះនាំចេញទៅអាមេរិកនោះលោក Mnuchin ថ្លែងថា៖ «ច្បាស់ណាស់ វាអាចកើតមានឡើងពិតប្រាកដ ដូច្នេះខ្ញុំនឹងមិនកាត់បន្ថយភាពអាចកើតមាននេះទេ»។
ជម្លោះពាណិជ្ជកម្មពិភពលោកដែលកាន់តែកើនឡើងនេះ តែងតែត្រូវបានរំពឹងថានឹងគ្របដណ្ដប់លើកិច្ចពិភាក្សានៅក្នុងរដ្ឋធានីរបស់ប្រទេសអាហ្សង់ទីនមួយនេះហើយលោក Eduardo Guardia រដ្ឋមន្ដ្រីក្រសួងហិរញ្ញវត្ថុប្រេស៊ីលបានថ្លែងថា គណៈប្រតិភូជាច្រើនបាននិយាយអំពី «ការគំរាមកំហែងលើចក្ខុវិស័យសេដ្ឋកិច្ច» ដែល «ប៉ះពាល់លើបណ្ដាប្រទេសជាច្រើន ជាពិសេសបណ្ដាប្រទេសកំពុងអភិវឌ្ឍន៍»។
លោក Le Maire បានប្រាប់ទីភ្នាក់ងារព័ត៌មាន AFP ថា៖ «ពាណិជ្ជកម្មពិភពលោកមិនអាចត្រូវពឹងផ្អែកលើការរស់រានដោយសារការសម្របខ្លួននោះទេ»៕ LA