ក្រុងវ៉ាស៊ីនតោនៈ លោកស្រី Elaine Chao រដ្ឋមន្រ្ដីក្រសួងដឹកជញ្ជូនអាមេរិក កាលពីថ្ងៃអង្គារ បានណែនាំជាផ្លូវឲ្យការិយាល័យឃ្លាំមើលផ្ទៃក្នុងរបស់ក្រសួងធ្វើសវនកម្មលើដំណើរការផ្តល់វិញ្ញាបនបត្រសម្រាប់យន្តហោះ 737 MAX 8 របស់ក្រុមហ៊ុនផលិតយន្តហោះ Boeing បន្ទាប់ពីការធ្លាក់យន្តហោះដែលបណ្ដាលឲ្យមនុស្សស្លាប់នៅពេលថ្មីៗ។
សំណើរបស់លោកស្រី Chao ធ្វើឡើងក្នុងគ្រាដែលមានសេចក្ដីរាយការណ៍ថា អាជ្ញាធរអាមេរិកក៏បានចាប់ផ្តើមដំណើរការស៊ើបអង្កេតបទឧក្រិដ្ឋទៅលើការផ្តល់វិញ្ញាបនបត្ររបស់យន្តហោះដែលលក់ដាច់បំផុតនេះផងដែរ ដែលត្រូវបានហាមឃាត់ហោះហើរជុំវិញពិភពលោក។
មនុស្សជិត ៣៥០ នាក់បានស្លាប់នៅលើយន្តហោះ 737 MAX 8 ក្នុងការធ្លាក់ចំនួន ២ លើកដោយឡែកពីគ្នាក្នុងរយៈពេលមិនដល់ ៥ ខែផងក្នុងប្រទេស ឥណ្ឌូនេស៊ី កាលពីឆ្នាំមុន និងនៅប្រទេស អេត្យូពី កាលពីថ្ងៃទី ១០ ខែ មីនា ឆ្នាំនេះនៅក្រៅទីក្រុងអាឌីសអាបេបា ប្រទេស អេត្យូពី។
សេចក្ដីរាយការណ៍បឋមបានរកឃើញភាពស្រដៀងគ្នាចំពោះការធ្លាក់យន្តហោះទាំង ២ ករណីនេះ ដែលយន្តហោះទាំងនេះបានធ្លាក់ក្រោយពេលបានហោះឡើងបន្តិច។
ក្នុងមេម៉ូមួយកាលពីថ្ងៃអង្គារផ្ញើទៅកាន់លោក Calvin Scovel អគ្គអធិការកិច្ចដឹកជញ្ជូន លោកស្រី Chao បានឲ្យដឹងថា ក្រុមហ៊ុន Boeing បានស្នើសុំ «វិញ្ញាបនបត្រប្រភេទកែសម្រួល» មួយសម្រាប់យន្តហោះ 737 MAX 8 កាលពីខែ មករា ឆ្នាំ២០១២ ហើយក្រុមហ៊ុននេះទទួលបានវិញ្ញាបនបត្រនេះកាលពីខែ មីនា ឆ្នាំ ២០១៧។
លោកស្រី Chao បានឲ្យដឹងថា លោកស្រីកំពុងស្នើឲ្យធ្វើសវនកម្មនេះ ដើម្បីបង្កើជា ប្រវត្តិសាស្រ្តជាក់ស្តែងលម្អិតមួយនៃដំណើរការផ្តល់វិញ្ញាបនបត្រយន្តហោះ។
មេម៉ូនេះបានបញ្ជាក់ថាជាការពិតអំពីសេចក្ដីរាយការណ៍ប្រព័ន្ធព័ត៌មានកន្លងមកថា ការស៊ើបអង្កេតបែបនោះកំពុងដំណើរការ។
ការិយាល័យអគ្គអធិការកិច្ច គឺជាស្ថាប័នត្រួតពិនិត្យឯករាជ្យមួយនៅក្នុងទីភ្នាក់ងារសហព័ន្ធអាមេរិកដែលដឹកនាំការធ្វើសវនកម្ម ប៉ុន្តែការិយាល័យនេះក៏អាចបញ្ជូនបញ្ហានានា ដែលខ្លួនរកឃើញទៅអាជ្ញាធរអនុវត្តច្បាប់បានដែរ។
ក្រុមអ្នកស៊ើបអង្កេតរហូតមកដល់ពេលនេះ តាមការរាយការណ៍ថាកំពុងផ្ដោតការយកចិត្តទុកដាក់លើប្រព័ន្ធប្រឆាំងការរលត់ម៉ាស៊ីន MCAS ដែលជាប់ពាក់ព័ន្ធនឹងការធ្លាក់យន្តហោះនៅប្រទេស ឥណ្ឌូនេស៊ីកាលពីខែតុលា។
អាជ្ញាធររបស់ប្រទេស អេត្យូពី និងការិយាល័យស៊ើបអង្កេត និងការវិភាគ BEA របស់ប្រទេស បារាំង ដែលបានពិនិត្យទិន្នន័យដែលទទួលបានពីការធ្លាក់យន្តហោះនៅពេលថ្មីបំផុតនេះបានឲ្យដឹងថា ពួកគេបានរកឃើញ «ភាពស្រដៀងគ្នាច្បាស់លាស់» រវាងការធ្លាក់យន្តហោះរបស់ក្រុមហ៊ុនអាកាសចរណ៍ Ethiopian និងក្រុមហ៊ុន Lion Air។
ក្រុមហ៊ុន Boeing បានឲ្យដឹងកាលពីថ្ងៃអាទិត្យសប្តាហ៍មុនថា ខ្លួនកំពុងបញ្ចប់ការធ្វើបច្ចុប្បន្នភាពសូហ្វវែរ និងការបណ្ដុះបណ្ដាលអ្នកបើកបរយន្តហោះ ដែលជាប់ទាក់ទងនឹងប្រព័ន្ធ MCAS៕ AFP/LA