ក្រុងវ៉ាស៊ីនតោនៈ ក្រសួងហិរញ្ញវត្ថុអាមេរិកបានឲ្យដឹងកាលពីថ្ងៃចន្ទថា ខ្លួនអាចលុបចោលទណ្ឌកម្មលើក្រុមហ៊ុន Rusal ដែលជាក្រុមហ៊ុនផលិតអាលុយមីញ៉ូមដ៏ធំរបស់រុស្ស៊ី បើលោក Oleg Deripaska បោះបង់ចោលការគ្រប់គ្រងក្រុមហ៊ុននេះ។
ការប្រកាសនេះបានធ្វើឲ្យតម្លៃអាលុយមីញ៉ូមធ្លាក់ចុះ ៧,២ ភាគរយនៅផ្សារលក់លោហៈទីក្រុងឡុងដ៍ ទន្ទឹមនឹងលោហៈផ្សេងទៀត ដូចជា មាស នីកែល និងប៉ាឡាញ៉ូម ក៏បានធ្លាក់ថ្លៃខ្លាំងផងដែរ។
ក្រសួងហិរញ្ញវត្ថុអាមេរិកបានឲ្យដឹងក្នុងសេចក្តីប្រកាសមួយថា ខ្លួននឹងផ្តល់ពេលវេលាឲ្យក្រុមហ៊ុនមួយចំនួនបន្ថែមទៀត ដើម្បីអនុលោមតាមទណ្ឌកម្ម ដែលរដ្ឋាភិបាលក្រុងវ៉ាស៊ីនតោនបានប្រកាសកាលពីថ្ងៃទី ៦ ខែមេសា ប្រឆាំងនឹងក្រុមមន្ត្រីរុស្ស៊ី ដើម្បីឆ្លើយតបនឹងការប៉ុនប៉ងឃាតកម្មតាមរយៈការដាក់ថ្នាំបំពុលអតីតអ្នកស៊ើបការណ៍សម្ងាត់ Sergei Skripal ដែលអង់គ្លេស និងអាមេរិក បានបន្ទោសទៅលើរដ្ឋាភិបាលរុស្ស៊ី។
សេចក្តីប្រកាសនេះក៏បានឲ្យដឹងផងដែរថា ការបន្ធូរបន្ថយទណ្ឌកម្មអាចធ្វើឡើងតាមរយៈ «ការដកការវិនិយោគ និងការបោះបង់ចោលការគ្រប់គ្រងក្រុមហ៊ុន RUSAL ដោយលោក Oleg Deripaska »។
ទណ្ឌកម្មទាំងនេះបានគំរាមអាជីវកម្មរបស់ក្រុមហ៊ុន Rusal ដែលមានទំហំ ៧ ភាគរយនៃផលិតកម្មអាលុយមីញ៉ូមរបស់ពិភពលោក។
ទណ្ឌកម្មនានាតាមរយៈការគំរាមកំហែងចាត់វិធានការប្រឆាំងនឹងក្រុមហ៊ុននានាដែលកំពុងធ្វើពាណិជ្ជកម្មជាមួយនឹងក្រុមហ៊ុន Rusal នោះក៏បានជំរុញឲ្យមានក្តីបារម្ភពីការផ្គត់ផ្គង់អាលុយមីញ៉ូមកាន់តែតិចផងដែរនៅលើទីផ្សារពិភពលោកដោយបានធ្វើឲ្យតម្លៃអាលុយមីញ៉ូមកើនឡើងខ្លាំង។
លោក Oligarch Deripaska ត្រូវបានចាត់ទុកថាជាមិត្តជិតស្និទ្ធនឹងលោកប្រធានាធិបតីរុស្ស៊ី Vladimir Putin ហើយក៏ជាប់ទាក់ទងនឹងលោក Paul Manafort អតីតប្រធានយុទ្ធនាការបោះឆ្នោតរបស់លោកប្រធានាធិបតី ដូណាល់ ត្រាំ ផងដែរ៕ BP