ក្រុងវ៉ាស៊ីនតោនៈ និយតករសហរដ្ឋអាមេរិកកាលពីចុងសប្តាហ៍មុនបានសម្រេចជាឯកច្ឆនក្នុងការកំណត់ក្រុមហ៊ុនទូរគមនាគមន៍ចិន ZTE និង Huawei ថាជាការគំរាមកំហែងដល់សន្តិសុខជាតិ និងបានប្លុកក្រុមហ៊ុននេះមិនឲ្យចូលទៅក្នុងការផ្តល់សេវា និងឧបករណ៍ដែលផ្តល់មូលនិធិដោយមូលនិធិសហព័ន្ធតម្លៃ ៨,៥ ពាន់លានដុល្លារ។
គណៈកម្មការទូរគមនាគមន៍សហព័ន្ធ (FCC) ក៏បានស្នើផងដែរថា ក្រុមហ៊ុនផ្តល់សេវាផ្សេងទៀតត្រូវបានតម្រូវឲ្យលុបចោល ឬឈប់ប្រើសេវា និងឧបករណ៍ដែលមានស្រាប់ពីក្រុមហ៊ុនទាំង ២ នេះ។
ដោយដកស្រង់សុន្ទរកថាពីអគ្គមេធាវីលោក Bill Barr និងលោក Chris Wray ប្រធានការិយាល័យស៊ើបអង្កេតសហព័ន្ធ (FBI) លោក Ajit Pai ប្រធាន FCC ឲ្យដឹងក្នុងសេចក្តីថ្លែងការណ៍មួយថា៖ «ក្រុមហ៊ុនទាំង ២ មានទំនាក់ទំនងជិតស្និទ្ធជាមួយរដ្ឋាភិបាលកុម្មុយនីស្តចិន និងប្រព័ន្ធយោធាចិន។
លោកមានប្រសាសន៍ថា៖ «ក្រុមហ៊ុនទាំង ២ គឺជាកម្មវត្ថុចំពោះច្បាប់ចិនដែលតម្រូវឲ្យក្រុមហ៊ុនទាំងពីរមានកាតព្វកិច្ចយ៉ាងទូលំទូលាយក្នុងការសហប្រតិបត្តិការជាមួយនឹងសំណើណាមួយពីសេវាស៊ើបអង្កេតរបស់ចិន និងរក្សាសំណើទាំងនោះជាការសម្ងាត់»។
លោកបន្ថែមថា៖ «ក្រុមហ៊ុនទាំង ២ បានចូលរួមក្នុងការអនុវត្តនានាដូចជាការលួចកម្មសិទិ្ធបញ្ញា ផ្តល់សំណូក និងពុករលួយ»។
ក្នុងសេចក្តីថ្លែងការណ៍មួយក្រុមហ៊ុន Huawei បានឲ្យដឹងថា ទីក្រុងវ៉ាស៊ីនតោនកំពុងរារាំងដោយឥតប្រយោជន៍ដល់អត្ថប្រយោជន៍ផ្ទាល់របស់ខ្លួន «ដោយផ្អែកលើព័ត៌មានជ្រើសរើសមួយចំនួន ព័ត៌មានមិនច្បាស់ និងការសន្មតដែលខុស»៕ KC