ភ្នំពេញៈ សហរដ្ឋអាមេរិកបានផ្តល់ហិរញ្ញប្បទានឥតសំណងបន្ថែមចំនួន ៧,៥ លានដុល្លារដល់រដ្ឋាភិបាលកម្ពុជាសម្រាប់ដោះស្រាយផលប៉ះពាល់ទៅលើផ្នែកសេដ្ឋកិច្ច និងសុខាភិបាលដោយសារជំងឺកូវីដ១៩។
ឯកអគ្គរដ្ឋទូតអាមេរិកប្រចាំកម្ពុជាលោក Patrick Murphy បានថ្លែងក្នុងសន្និសីទសារព័ត៌មានកាលពីថ្ងៃព្រហស្បតិ៍នៅទីស្តីការក្រសួងសេដ្ឋកិច្ច និងហិរញ្ញវត្ថុថា ក្នុងចំណោមជំនួយសរុបនេះ ៥ លានដុល្លារគឺជាជំនួយសម្រាប់ការស្តារសម្បទាសេដ្ឋកិច្ចឡើងវិញ និង ២,៥ លានដុល្លារជាជំនួយបន្ថែមសម្រាប់ផ្នែកសុខាភិបាលកម្ពុជាក្នុងអំឡុងពេលជំងឺកូវីដ១៩ ដែលជំនួយនេះត្រូវបានផ្តល់តាមរយៈទីភ្នាក់ងារអាមេរិក USAID។
លោកថ្លែងថា៖ «ខ្ញុំមានសេចក្តីរីករាយសូមប្រកាសនៅថ្ងៃនេះ (ថ្ងៃ ២១) នូវការផ្តល់ជំនួយបន្ថែម ៧,៥ លានដុល្លារដល់រដ្ឋាភិបាលកម្ពុជាក្នុងការឆ្លើយតបទៅនឹងបញ្ហាសុខភាពសាធារណៈ ការធ្វើតេស្តនៃវីរុសកូរ៉ូណា និងការលើកកម្ពស់ចំណេះដឹងសុខភាពដល់សាធារណជនជាដើម»។
លោកបន្តថា៖ «ខ្ញុំសូមបញ្ជាក់ថា ក្នុងនោះថវិកាចំនួន ៥ លានដុល្លារគឺផ្តោតទៅលើការស្តារសម្បទាសេដ្ឋកិច្ចឡើងវិញនៃវិបត្តិកូវីដ១៩ ហើយជំនួយនេះជួយលើកកម្ពស់សេដ្ឋកិច្ចដល់អ្នកងាយរងគ្រោះ»។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងថា ចំពោះការប្រើប្រាស់ហិរញ្ញប្បទានឥតសំណងនេះក្នុងរយៈពេលខ្លីនឹងត្រូវប្រើសម្រាប់ជួយលើកកម្ពស់ជីវភាពប្រចាំថ្ងៃរបស់ប្រជាជនដែលរងផលប៉ះពាល់ខ្លាំងពីកូវីដ១៩។ ដោយឡែកសម្រាប់រយៈពេលមធ្យម ថវិកានេះនឹងជួយរៀបចំកម្មវិធីបណ្តុះបណ្តាលជំនាញការងារឡើងវិញដល់ប្រជាជនដែលរងគ្រោះក្នុងវិស័យឯកជន។
លោកថ្លែងថា៖ «ក្នុងនាមរដ្ឋាភិបាល និងប្រជាជនកម្ពុជាសូមថ្លែងអំណរគុណចំពោះរដ្ឋាភិបាល និងប្រជាជនអាមេរិកដែលបានផ្តល់ជំនួយអន្តរាគមន៍ចំគោលដៅ និងទាន់ពេលវេលាដែលជាកាយវិការប្រកបដោយអត្ថន័យសម្រាប់ប្រជាជនកម្ពុជា»។
លោកបន្តថា ទន្ទឹមនឹងនេះរដ្ឋាភិបាលក៏គ្រោងនឹងដាក់ចេញនូវកម្មវិធីជំនួយសង្គម ដើម្បីសម្រាលការលំបាក និងរក្សាលំនឹងជីវភាពប្រជាជនតាមរយៈការអនុវត្តកម្មវិធីផ្ទេរសាច់ប្រាក់សម្រាប់ក្រុមគ្រួសារប្រជាជនក្រីក្រខ្វះខាត ព្រមទាំងដាក់ចេញនូវកម្មវិធីសាច់ប្រាក់ពលកម្ម (cash for work) ការបណ្តុះបណ្តាលជំនាញខ្លី ដើម្បីបង្កើនលទ្ធភាពបង្កើតអាជីវកម្មផ្ទាល់ខ្លួន និងឈានទៅចាប់យកការងារក្នុងវិស័យថ្មី។
លោកបន្តថា៖ «ជំងឺកូវីដ១៩ មិនត្រឹមតែបង្កផលប៉ះពាល់ធ្ងន់ធ្ងរដល់សុខភាពសាធារណៈប៉ុណ្ណោះទេ ប៉ុន្តែថែមទាំងគំរាមកំហែងដល់ការអភិវឌ្ឍសង្គម និងសេដ្ឋកិច្ចនៅទូទាំងពិភពលោក រួមទាំងកម្ពុជាផងដែរ»។
យោងតាមលោក Murphy សហរដ្ឋអាមេរិកបានផ្តល់ជំនួយជាង ១១ លានដុល្លារដល់រដ្ឋាភិបាលកម្ពុជាចាប់តាំងពីមានការរាតត្បាតជំងឺកូវីដ១៩ ជាសកលលោក។
កាលពីថ្ងៃទី ១០ ខែមេសា សមាគមរោងចក្រកាត់ដេរនៅកម្ពុជា (GMAC) ឲ្យដឹងថា រោងចក្រជាង ១៨០ នៅក្នុងប្រទេសកម្ពុជា បានផ្អាកប្រតិបត្តិការ ខណៈរោងចក្រ ៦០ ផ្សេងទៀតកំពុងស្ថិតនៅក្នុងគ្រោះថ្នាក់នៃការបិទទ្វារ។ កម្មកររោងចក្រកាត់ដេរ ២០០ ០០០ នាក់ រងផលប៉ះពាល់ផ្ទាល់ និង ២ លាននាក់ប៉ះពាល់ប្រយោល។
គិតត្រឹមថ្ងៃទី ២៩ ខែមេសា អាជីវកម្មក្នុងវិស័យទេសចរណ៍ប្រហែល ២ ៨៦៥ ឬ ២៩,៥៧ ភាគរយក្នុងចំណោម ៩ ៦៨៩ បានបិទទ្វារដែលបណ្តាលឲ្យកម្មករ ៤៦ ៣៦៩ នាក់គ្មានការងារធ្វើ និងមគ្គុទ្ទេសក៍ប្រហែល ៩៦ បានព្យួរការងារ តំណាងឲ្យ ១,៥ ភាគរយនៃចំនួនសរុប ៦ ៤១៦៕ LA