.jpg)
ចំការដាំតាសក់មួយកន្លែងក្នុងខណ្ឌជ្រោយចង្វារ។ ហុង មិនា
ភ្នំពេញៈ រដ្ឋាភិបាលអាមេរិកតាមរយៈទីភ្នាក់ងារជំនួយអាមេរិក ( USAID) បានផ្តល់ទឹកប្រាក់ ៣,៥ លានដុល្លារ ដល់វិស័យឯកជនដើម្បីរៀបចំបង្កើតការប្រកួតប្រជែងថ្មីមួយក្នុងផ្នែកកសិកម្មនៅកម្ពុជាទាក់ទងនឹងបញ្ហាប្រឈមសំខាន់ៗ ដូចជាការប្រើប្រាស់ប្រព័ន្ធរក្សាភាពត្រជាក់លទ្ធភាពក្នុងការទុកដាក់ក្នុងឃ្លាំង និងផ្នែកភ័ស្ដុភារ។
វិស័យឯកជនស្វាគមន៍គំនិតផ្ដួចផ្ដើមនេះដែលនឹងរួមចំណែកដល់ការកែលម្អចង្វាក់តម្លៃនៅក្នុងវិស័យកសិកម្ម ជាពិសេសផ្នែកបន្លែ ដែលបានលេចធ្លាយនូវទឹកប្រាក់រាប់រយលានដុល្លារអាមេរិកទៅក្រៅប្រទេស។
ទីភ្នាក់ងារនេះបានកត់សម្គាល់ថា ការប្រកួតប្រជែងដែលបានបើកដំណើរការកាលពីថ្ងៃទី ២៤ ខែ កុម្ភៈ ឆ្នាំ ២០២១ នឹងអាចរកបានជំនួយឥតសំណង ៣,៥ លានដុល្លារដល់ក្រុមហ៊ុនឯកជន។
ទីភ្នាក់ងារនេះបន្តថា ក្រុមហ៊ុននានាក៏តម្រូវឱ្យផ្ដល់នូវដៃគូហិរញ្ញប្បទានមួយទល់នឹងមួយ ហើយធ្វើការជាមួយវិស័យឯកជន ដើម្បីឆ្លើយតបនឹងតម្រូវការបន្ទាន់បំផុតក្នុងការទាក់ទងនឹងប្រព័ន្ធរក្សាភាពត្រជាក់ លទ្ធភាពក្នុងការទុកដាក់ឃ្លាំង និងផ្នែកភ័ស្ដុភារនៅក្នុងវិស័យកសិកម្ម។
សេចក្តីប្រកាសព័ត៌មានរបស់ស្ថានទូតអាមេរិកបានឱ្យដឹងថា ការប្រកួតប្រជែងនេះមានបំណងជួយក្រសួងកសិកម្ម រុក្ខាប្រមាញ់ និងនេសាទរបស់កម្ពុជាឱ្យសម្រេចបានជោគជ័យលើអាទិភាពជាយុទ្ធសាស្ដ្រក្នុងផែនការអភិវឌ្ឍន៍ក្នុងវិស័យកសិកម្មឆ្នាំ ២០១៩-២០២៣ របស់ខ្លួនជាមួយនឹងដំណោះស្រាយផ្អែកតាមទីផ្សារ។
លោកឯកអគ្គរដ្ឋទូត អាមេរិក W. Patrick Murphy បានឱ្យដឹងនៅក្នុងសេចក្ដីប្រកាសព័ត៌មាននេះថា អាមេរិកគឺជាដៃគូយូរអង្វែងរបស់ប្រទេសកម្ពុជា និងវិស័យកសិកម្មក្នុងប្រទេសនេះ។
លោក Murphy ថ្លែងថា៖ «ការប្រកួតប្រជែងនេះមានបំណងជំរុញឱ្យក្រុមហ៊ុនក្នុងស្រុក និងក្រុមហ៊ុនអន្តរជាតិរកដំណោះស្រាយថ្មីៗ ដើម្បីបង្កើនសមត្ថភាពប្រកួតប្រជែងផ្នែកសេដ្ឋកិច្ចរបស់កម្ពុជាដោយពង្រីកទីផ្សារ កែលម្អហេដ្ឋារចនាសម្ព័ន្ធ និងភ័ស្ដុភារ ហើយនិងជំរុញការវិនិយោគ និងការចូលរួមរបស់វិស័យឯកជននៅក្នុងខ្សែចង្វាក់ផលិតកម្មទាំងមូលក្នុងវិស័យកសិកម្ម»។
លោក កាន់ បញ្ញារិទ្ធ ប្រធានគ្រប់គ្រងការផលិតនៅក្រុមហ៊ុន ដាវ៉ាន់ ដែលជំនាញខាងខ្សែចង្វាក់តម្លៃកសិកម្ម និងទីផ្សារសម្រាប់អាហារសុវត្ថិភាពបានប្រាប់ភ្នំពេញប៉ុស្ដិ៍ថា ដាវ៉ាន់ គាំទ្រ USAID ក្នុងការបង្កើតកម្មវិធីប្រកួតប្រជែងនេះ។
លោក បញ្ញារិទ្ធ បញ្ជាក់ថា៖ «គោលបំណងជារួមរបស់គម្រោងនេះស្របគ្នាជាមួយការគិតរបស់យើង។ ជាក់ស្ដែង វាជាសសរស្ដម្ភមួយក្នុងចំណោមសសរស្ដម្ភទាំង ៤ នៃផែនការជំនួយឥតសំណងរបស់យើង ដើម្បីអភិវឌ្ឍប្រព័ន្ធទីផ្សារ សម្រាប់ផលិតផលកសិកម្មក្នុងស្រុក»។
លោកក៏បានបញ្ជាក់ថា ដាវ៉ាន់ មានឧបសគ្គធំក្នុងការនាំយកផលិតផលសុវត្ថិភាពមានគុណភាពទៅទីផ្សារ ហើយបច្ចុប្បន្នកំពុងស្វែងរកគំរូទាំងស្រុងចាប់ពីការផលិតដល់ក្រោយពេលប្រមូលផល ព្រមទាំងប្រព័ន្ធចែកចាយ និងទីផ្សារសម្រាប់ផលិតផលក្នុងស្រុក។
លោកបន្តថា៖ «យើងជឿជាក់ថា ការគាំទ្ររបស់ហិរញ្ញប្បទាននេះគឺជារឿងដ៏ត្រឹមត្រូវមួយក្នុងការផ្ដោតការយកចិត្តទុកដាក់ដែលធ្វើឡើងនៅក្នុងពេលវេលាដ៏ត្រឹមត្រូវ»។
លោក Pakk Yourng អគ្គនាយកក្រុមហ៊ុន AGRIBEE (CAMBODIA) PLC ដែលជាកម្មវិធីគ្រប់គ្រងចង្វាក់តម្លៃមួយដែលជួយសម្រួលភាគីពាក់ព័ន្ធទាំងអស់នៅក្នុងវិស័យកសិកម្មបានប្រាប់ភ្នំពេញប៉ុស្ដិ៍ថា មូលនិធិនេះនឹងរួមចំណែកក្នុងការកែលម្អខ្សែចង្វាក់ តម្លៃកសិកម្មរបស់កម្ពុជា។
លោកលើកឡើងថា៖ «ដោយសារតែ វិស័យកសិកម្មនេះតម្រូវឱ្យមានស្ដុក និងមជ្ឈមណ្ឌលរក្សាភាពត្រជាក់ មូលនិធិនេះនឹងជួយឱ្យមានស្ដុក មជ្ឈមណ្ឌលរក្សាភាពត្រជាក់កាន់តែច្រើននៅខេត្តដាំដុះបន្លែទាំង ៦ របស់យើង»។
ការប្រកួតប្រជែងនេះនឹងបញ្ចប់នៅថ្ងៃទី ១៦ ខែមេសាឆ្នាំ ២០២១។ ភាគីពាក់ព័ន្ធមានចំណាប់អារម្មណ៍អាចចូលទៅកាន់គេហទំព័រ https://www.mspgrants.com/cambodia
ក្រសួងកសិកម្មអះអាងថា កម្ពុជាដាំដុះបន្លែលើផ្ទៃដី ៥៧ ២០៨ ហិកតា កាលពីចុងឆ្នាំ ២០១៩ ដែលផ្ដល់ទិន្នផល ៦៨១, ០៩៩ តោន កាលពីឆ្នាំមុន៕ LA
