ក្រុងវ៉ាស៊ីនតោនៈ លោកប្រធានាធិបតីបារាំង Emmanuel Macron កាលពីថ្ងៃអាទិត្យបានលើកឡើងជាថ្មីពីការទាមទារដែលថា តំបន់អឺរ៉ុបពិតជាត្រូវបានលើកលែងចេញពីអត្រាពន្ធពិន័យថ្មីលើដែកថែប និងអាលុយមីញ៉ូមរបស់សហរដ្ឋអាមេរិក ដែលការលើកឡើងនេះធ្វើឡើងរយៈពេលប៉ុន្មានថ្ងៃប៉ុណ្ណោះ មុនការលើកលែងបណ្តោះអាសន្ននេះត្រូវផុតកំណត់។
លោក Macron បាននិយាយពីលោកប្រធានាធិបតីអាមេរិក ដូណាល់ ត្រាំ នៅលើសារព័ត៌មាន Fox News កាលពីថ្ងៃអាទិត្យថា៖ «ខ្ញុំសង្ឃឹមថា អ្នកនឹងសម្រេចចិត្តលើកលែងពន្ធឲ្យសហភាពអឺរ៉ុប»។ លោកបានបន្តថា៖ «អ្នកមិនធ្វើសង្គ្រាមពាណិជ្ជកម្មជាមួយនឹងសម្ព័ន្ធមិត្តរបស់លោកនោះទេ»។
លោក ដូណាល់ ត្រាំ បានប្រកាសកាលពីខែមុនថាសហរដ្ឋអាមេរិកនឹងហូតពន្ធ ២៥ ភាគរយលើដែកថែប និង ១០ ភាគរយលើអាលុយមីញ៉ូម ដោយបានអះអាងថាការនាំចូលពីបរទេសបានធ្វើឲ្យប៉ះពាល់ដល់សន្តិសុខជាតិអាមេរិកតាមរយៈការធ្វើឲ្យប៉ះពាល់ដល់ផលិតកម្មក្នុងស្រុកដែលជាកត្តាចាំបាច់មួយចំពោះការត្រៀមខ្លួនរបស់យោធា។
ទោះជាយ៉ាងនេះក្តី ការលើកលែងពន្ធជាបណ្តោះអាសន្នសម្រាប់ប្រទេសជាប្រភពនាំចូលដែកថែបពីបរទេសធំៗ ដូចជាប្រទេសកាណាដា ម៉ិកស៊ិក និងសហភាពអឺរ៉ុបនោះនឹងផុតកំណត់នៅថ្ងៃទី ១ ខែឧសភាខាងមុខនេះ។
ក្រុមមន្ត្រីពាណិជ្ជកម្មអាមេរិក និងអឺរ៉ុបកាលពីខែមុនបានប្រកាសថា រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងប្រ៊ុចសែលបានដាក់ដំណើរការកិច្ចពិភាក្សាមួយចំនួនដើម្បីដោះស្រាយជម្លោះនេះ តែពុំទាន់មានការវិវឌ្ឍណាមួយច្បាស់លាស់នៅឡើយទេ។
លោក Macron បានឲ្យដឹងកាលពីថ្ងៃអាទិត្យថា៖ «គាត់និយាយថា ការលើកលែងពន្ធនឹងមានសុពលភាពរហូតដល់ថ្ងៃទី ១ ខែឧសភា»។ លោកបានបន្តថា៖ «សូមរង់ចាំមើលអ្វីដែលគាត់នឹងសម្រេចចិត្តនៅថ្ងៃទី ១ ខែឧសភា។ ខ្ញុំគ្រាន់តែនិយាយ តើអាទិភាពរបស់គាត់នៅឯណា?»។
លោក Macron បានមានប្រសាសន៍ទៀតថា៖ «ប្រសិនបើអ្នកធ្វើសង្គ្រាមប្រឆាំងនឹងមនុស្សគ្រប់គ្នាអ្នកធ្វើសង្គ្រាមពាណិជ្ជកម្មជាមួយប្រទេសចិន សង្គ្រាមពាណិជ្ជកម្មប្រឆាំងនឹងអឺរ៉ុប សង្គ្រាមនៅប្រទេសស៊ីរី សង្គ្រាមប្រឆាំងប្រទេសអ៊ីរ៉ង់ សូមគិតឲ្យបានច្បាស់ វាមិនមានប្រសិទ្ធភាពនោះទេ»។
លោកមានប្រសាសន៍ទៀតថា៖ «យើងគឺជាសម្ព័ន្ធមិត្ត»៕ BP