ក្រុងវ៉ាស៊ីនតោនៈ អាជ្ញាធរអាមេរិក បានចាប់ផ្ដើមកិច្ចខិតខំប្រឹងប្រែងមួយក្នុងការហាមឃាត់នូវគ្រប់ទម្រង់ទាំងអស់នៃការលេងល្បែងតាមប្រព័ន្ធអនឡាញ ដែលផ្ទុយនឹងសេចក្ដីសម្រេចកាលពីឆ្នាំ ២០១១ ដោយវាអាចធ្វើឲ្យមានផលប៉ះពាល់ដល់វិស័យល្បែងអនឡាញនៅក្នុងរដ្ឋមួយចំនួនរបស់សហរដ្ឋអាមេរិក។
កាលពីដើមខែនេះ ក្រសួងយុត្តិធម៌អាមេរិក បានធ្វើការផ្សព្វផ្សាយការយល់ឃើញបែបផ្លូវច្បាប់មួយថា រាល់ទម្រង់នៃការភ្នាល់ល្បែងអនឡាញដែលមិនត្រឹមតែជាការភ្នាល់កីឡា គឺអាចជាការរំលោភទៅលើច្បាប់នៃការភ្នាល់ល្បែងរបស់សហព័ន្ធ។
ការរំលោភច្បាប់នោះ អាចនឹងឈានទៅដល់ការបិទកាស៊ីណូ និងការលេងឆ្នោតអនឡាញ ដែលកំពុងដំណើរការក្នុងរដ្ឋមួយចំនួនចាប់តាំងពីសេចក្ដីសម្រេចកាលពីឆ្នាំ ២០១១ ដោយរដ្ឋការរបស់លោក អូបាម៉ា ដើម្បីទប់ស្កាត់ការបន្តភ្នាល់តាមអនឡាញដែលមិនជាប់ទាក់ទងនឹងកីឡា។
លោកស្រី Jennifer Roberts នាយកមជ្ឈមណ្ឌលអន្តរជាតិទទួលបន្ទុកបទប្បញ្ញត្តិល្បែងនៅសាកលវិទ្យាល័យ Nevada-Las Vegas បានថ្លែងថា៖ «វាអាចមានផលប៉ះពាល់ខ្លាំង ប៉ុន្តែវានឹងអាស្រ័យថា តើក្រសួងយុត្តិធម៌អនុវត្តបានតឹងរ៉ឹងតាមការបកស្រាយច្បាប់ថ្មីរបស់ខ្លួនយ៉ាងណា»។
លោកស្រី បានឲ្យដឹងទៀតថា ការបកស្រាយច្បាប់ដ៏តឹងរ៉ឹងបំផុតមួយអាចបិទការប្រកួតកីឡាក្នុងក្ដីស្រមៃ ដែលបានរីកចម្រើនក្នុងរយៈពេលប៉ុន្មានឆ្នាំថ្មីៗនេះ។
លោកស្រី Jennife Roberts បានប្រាប់ទីភ្នាក់ងារ AFP ថា៖ «ទោះបីជាការភ្នាល់ធ្វើឡើងនៅក្នុងដែនសមត្ថកិច្ចស្របច្បាប់ក៏ដោយ ប្រសិនបើទំនាក់ទំនងត្រូវបានបញ្ជូនទៅរដ្ឋផ្សេងទៀតនោះ ក៏អាចអនុវត្តច្បាប់ ការភ្នាល់ល្បែងនេះបានដែរ»។
ច្បាប់ភ្នាល់ល្បែងឆ្នាំ ១៩៦១ ដែលហាមឃាត់ការប្រើប្រាស់ទំនាក់ទំនងសម្រាប់ការលេងល្បែង គឺជាផ្នែកមួយនៃកិច្ចខិតខំប្រឹងប្រែងរបស់អាជ្ញាធរនៅក្នុងការបង្ក្រាបលើឧក្រិដ្ឋកម្មដែលមានអង្គការចាត់តាំង។
ចាប់តាំងពីការបកស្រាយកាលពីឆ្នាំ ២០១១ មកទម្រង់ផ្សេងៗនៃការលេងល្បែងអនឡាញបានចាប់ផ្ដើមកើតមានក្នុងរដ្ឋ Nevada, Delaware, New Jersey និងរដ្ឋ Pennsylvania ជាមួយនឹងរដ្ឋមួយចំនួនទៀតដែលកំពុងពិចារណាធ្វើឲ្យវាមានភាពស្របច្បាប់។
ខណៈមិនមានការបង្រ្កាបលក្ខណៈទ្រង់ទ្រាយធំ ប្រាក់ចំណូលពីការភ្នាល់ល្បែងអនឡាញនៅអាមេរិក បានកើនឡើងជិត ២២ ភាគរយ ដល់ចំនួន ២៩៨ លានដុល្លារកាលពីឆ្នាំមុននៅក្នុងរដ្ឋ New Jersey ដែលជាកន្លែងមានវិស័យអ៊ីនធឺណិតឈានមុខគេ។
ក្នុងការបកស្រាយច្បាប់ចុងក្រោយបំផុត ក្រសួងយុត្តិធម៌បានបញ្ឈប់ការចង្អុលបង្ហាញរយៈពេលដែលច្បាប់នេះនឹងត្រូវអនុវត្ត។ ប៉ុន្តែនៅក្នុងអត្ថបទមួយកាលពីថ្ងៃទី ១៥ ខែមករា លោក Rod Rosenstein អគ្គមេធាវីរងបានឲ្យដឹងថា ការអនុវត្តអាចចាប់ផ្តើមនៅ ៩០ ថ្ងៃបន្ទាប់។
លោក Rosenstein បានថ្លែងថា៖ «ឱកាសរយៈពេល ៩០ ថ្ងៃ នឹងផ្ដល់ឲ្យក្រុមហ៊ុនដែលពឹងផ្អែកទៅលើការ បកស្រាយច្បាប់កាលពីឆ្នាំ ២០១១ នូវពេលវេលាក្នុងការនាំយកការប្រតិបត្តិការរបស់ពួកគេអនុលោមតាមច្បាប់របស់សហព័ន្ធ»។
លោកលើកឡើងថា៖ «នេះគឺជាការអនុវត្តផ្ទៃក្នុងនៃឆន្ទានុសិទ្ធិរបស់ព្រះរាជអាជ្ញា វាមិនមែនជាការរំលោភលើច្បាប់ភ្នាល់នោះទេ»។
នៅក្នុងរយៈពេលជាច្រើនឆ្នាំកន្លងមក ការលេងល្បែងអនឡាញត្រូវបានជំទាស់ដោយឧស្សាហកម្មកាស៊ីណូអាមេរិក ប៉ុន្តែថ្មីៗនេះប្រតិបត្តិករលេងល្បែងមួយចំនួនបាននាំគ្នាចូលរួមក្នុងការផ្លាស់ប្តូរទៅជាការភ្នាល់តាមប្រព័ន្ធអ៊ីនធឺណិតផងដែរ។
ប្រតិបត្តិករកាស៊ីណូ រួមមាន Caesars Entertainment និង Golden Nugget នៅពេលនេះទទួលយកការភ្នាល់តាមអនឡាញ ដែលត្រូវបានអនុញ្ញាតដោយស្របច្បាប់ ដោយធ្វើឲ្យមានភាពងាយស្រួលដល់អ្នកភ្នាល់តាមរយៈការប្រើប្រាស់ទូរស័ព្ទដៃ។
គោលនយោបាយថ្មីរបស់ក្រសួងយុត្តិធម៌ គឺអនុវត្តតាមយុទ្ធនាការបញ្ចុះបញ្ចូលដោយក្រុមចម្រុះ ដើម្បីបញ្ឈប់ការលេងល្បែងអនឡាញដែលជាក្រុមគាំទ្រដោយលោក Sheldon Adelson ម្ចាស់កាស៊ីណូ Las Vegas និងជាអ្នកគាំទ្រលោកប្រធានាធិបតី ដូណាល់ ត្រាំ។
ក្រុមនេះបានសរសើរគោលការណ៍ណែនាំថ្មី ដែលបញ្ជាក់ម្ដងហើយម្ដងទៀតពីការបារម្ភរបស់ខ្លួនថា ការភ្នាល់អនឡាញអាចទទួលបានអតិថិជនដែលរួមទាំងអនីតិជនដែលញៀនលើការលេងល្បែងទៀតផង។
លោក Sheldon Adelso លើកឡើងថា៖ «នៅចក្រភពអង់គ្លេសដែលជាចំណុចកណ្ដាលនៃការរីករាលដាលនេះ គឺជាងពាក់កណ្ដាលនៃអ្នកមានវ័យ ១៦ ឆ្នាំមានកម្មវិធីលេងល្បែងនៅលើទូរស័ព្ទស្មាតហ្វូនរបស់ពួកគេ។ លើសពីនេះ ឧស្សាហកម្មល្បែងភ្នាក់តាមអ៊ីនធឺណិត ទទួលបានជាងពាក់កណ្ដាលនៃប្រាក់ចំណេញរបស់ខ្លួនពីអ្នកលេងល្បែងដែលមានបញ្ហា»។
លោក Lindsey Graham សមាជិកព្រឹទ្ធសភា និងជាប្រធាននៃគណៈកម្មាធិការតុលាការ បានស្វាគមន៍សេចក្ដីសម្រេចនេះ។
លោកបានសរសេរនៅក្នុងសេចក្ដីប្រកាសព័ត៌មានថា៖ «ការបកស្រាយច្បាប់ដើមនៃច្បាប់ភ្នាល់ល្បែងនេះ បានធ្វើឲ្យមានការរីកចម្រើនយ៉ាងខ្លាំងក្នុងការការពារក្មេងៗ និងអ្នកងាយរងគ្រោះបំផុតរបស់សង្គម»។
ប៉ុន្តែ លោកស្រី Michelle Minton មន្ដ្រីជាន់ខ្ពស់នៅវិទ្យាស្ថាន Competitive Enterprise Institute បានឲ្យដឹងថា ការផ្លាស់ប្តូរនេះ នឹងបង្ខំឲ្យអ្នកលេងល្បែងត្រូវទៅរកទីកន្លែងខុសច្បាប់។
លោកស្រីថ្លែងថា៖ «ការហាមឃាត់ មិនដែលដំណើរការទេ»។ លោកស្រីបានបន្តថា៖ «វាគ្រាន់តែប្រែក្លាយពលរដ្ឋដែលគោរពច្បាប់ឲ្យទៅជាអ្នករំលោភច្បាប់ និងកាត់បន្ថយកម្រិតនៃទំនុកចិត្តលើរដ្ឋាភិបាលតែប៉ុណ្ណោះ»។
លោកស្រី Minton បានឲ្យដឹងទៀតថា ការបកស្រាយច្បាប់ថ្មីនេះ ទំនងជានឹងបង្កឲ្យមានការយល់ច្រឡំបន្ថែមទៀត និងអាចរារាំងរដ្ឋជាច្រើនក្នុងការទទួលបានសិទ្ធិប្រតិបត្តិការល្បែងតាមអ៊ីនធឺណិត។ លោកស្រីបន្ថែមថា វាទំនងជានឹងបណ្ដាលឲ្យមានការកើតឡើងបញ្ហាប្រឈមផ្លូវច្បាប់លើការភ្នាល់អនឡាញនៅក្នុងរដ្ឋផ្សេងៗទៀត៕ AFP/LA