ក្រុងវ៉ាស៊ីនតោនៈ រដ្ឋមន្ដ្រីក្រសួងហិរញ្ញវត្ថុអាមេរិកបានឲ្យដឹងកាលពីថ្ងៃពុធថា ទីក្រុង ប៉េកាំង មិនមែនជាអ្នកកេង ចំណេញលើរូបិយប័ណ្ណទេ ប៉ុន្តែការអនុវត្តអត្រាប្តូរប្រាក់របស់ប្រទេស ចិន និងការធ្លាក់ចុះតម្លៃប្រាក់យន់នាពេលថ្មីៗនេះ មាន «ក្តីបារម្ភជាពិសេស»។
ដោយប្រាប់ទីក្រុង ប៉េកាំង និងដៃគូពាណិជ្ជកម្ម ៥ ផ្សេងទៀតរបស់ខ្លួន ក្រសួងហិរញ្ញវត្ថុជាថ្មីម្ដងទៀត បានព្យាយាមរាំងខ្ទប់មិនឲ្យបញ្ឆេះឲ្យមានជម្លោះណាមួយជុំវិញរូបិយប័ណ្ណរបស់ចិន ខណៈលោក ដូណាល់ ត្រាំ ធ្លាប់បានសន្យាថានឹងធ្វើយុទ្ធនាការតាមដាន។
លោក Steven Mnuchin បានឲ្យដឹងក្នុងរបាយការណ៍ដែលចេញផ្សាយ ២ ដងក្នុង ១ ឆ្នាំរបស់ក្រសួងស្ដីពីរបៀបគ្រប់គ្រងអត្រាការប្រាក់ និងពាណិជ្ជកម្មរបស់ប្រទេសនេះថា៖ «ក្តីបារម្ភជាពិសេសរបស់យើង គឺកង្វះតម្លាភាពរូបិយប័ណ្ណរបស់ប្រទេស ចិន និងការធ្លាក់ថ្លៃរូបិយប័ណ្ណនៅពេលថ្មីៗរបស់ប្រទេសនេះ»។
លោកថ្លែងថា៖ «ទាំងនេះបង្កជាបញ្ហាធំដល់ការសម្រេចបានពាណិជ្ជកម្មកាន់តែស្មើភាព និងកាន់តែមានតុល្យភាព ហើយយើងនឹងបន្តត្រួតពិនិត្យ និងពិនិត្យឡើងវិញលើការអនុវត្តរូបិយប័ណ្ណរបស់ប្រទេស ចិន ដែលរួមមានតាមរយៈការពិភាក្សាដែលកំពុងធ្វើឡើងជា មួយធនាគារកណ្ដាលចិន»។
ក្រុង វ៉ាស៊ីនតោន បានបញ្ជាក់ជាយូរមកហើយថា ចិនរក្សាតម្លៃទាបបែបសិប្បនិម្មិតនៃរូបិយប័ណ្ណរបស់ខ្លួន ដើម្បីធ្វើឲ្យការនាំចេញរបស់ប្រទេសនេះកាន់តែមានសមត្ថភាពប្រកួតប្រជែង ប៉ុន្តែក្នុងពេលជាច្រើនឆ្នាំថ្មីៗនេះ ប្រាក់យន់បានឡើងថ្លៃ ហើយត្រូវបានមើលឃើញដោយក្រុមសេដ្ឋវិទូថាមានភាព ស្របគ្នាច្រើនជាមួយមូលដ្ឋានគ្រឹះសេដ្ឋកិច្ច។
ប៉ុន្តែខណៈអត្រាការប្រាក់អាមេរិកកើនឡើង ប្រាក់ដុល្លារបានឡើងថ្លៃថែមទៀត ដែលធ្វើឲ្យការនាំចេញអាមេរិកកាន់តែមានតម្លៃខ្ពស់៕ AFP/LA