ក្រុងញូវយ៉កៈ ក្រសួងយុត្តិធម៌របស់អាមេរិកបានបានប្រកាសកាលពីថ្ងៃអង្គារថា ធនាគារ Royal Bank of Scotland (RBS) របស់ចក្រភពអង់គ្លេស នឹងត្រូវបង់ប្រាក់ពិន័យចំនួន ៤,៩ ពាន់លានដុល្លារដើម្បីដោះស្រាយការចោទប្រកាន់ថា ធនាគារនេះបានធ្វើឱ្យវិនិយោគិនយល់ខុសក្នុងការវិនិយោគលើមូលបត្រកម្ចីទិញផ្ទះនៅមុនពេលកើតមានវិបត្តិហិរញ្ញវត្ថុ។
មន្ត្រីសហរដ្ឋអាមេរិកបានឲ្យដឹងថា ធនាគារ RBS ដែលមានមូលដ្ឋាននៅទីក្រុង អេឌីនប៊ឺក បានប្រព្រឹត្តកំហុសមួយចំនួនពាក់ព័ន្ធនឹងការធានាទិញ និងការរៀបចំកម្ចីប្រភេទទី២ (subprime loans) ទៅជាមូលបត្រដែលបានក្លាយជាថ្នាំពុលដែលបណ្តាលឲ្យដួលរលំទីផ្សារលំនៅឋាននៅសហរដ្ឋអាមេរិក។
លោក Jesse Panuccio អគ្គមេធាវីស្តីទីក្រសួងយុត្តិធម៌បានថ្លែងថា៖ «ពលរដ្ឋអាមេរិកជាច្រើននាក់បានទទួលរងផលប៉ះពាល់ផ្នែកសេដ្ឋកិច្ចដ៏យូរអង្វែងដោយសាតែវិបត្តិហិរញ្ញវត្ថុឆ្នាំ២០០៨»។
លោកបន្ថែមថា៖ «ដំណោះស្រាយនេះឲ្យធនាគារ RBS ទទួលខុសត្រូវលើការប្រព្រឹត្តិដ៏ខុសឆ្គងធ្ងន់ធ្ងរ ដែលបានរួមចំណែកឲ្យមានវិបត្តិហិរញ្ញវត្ថុ ហើយវាក៏បញ្ជូនសារដ៏សំខាន់មួយផងដែរដែលថា ក្រសួងយុត្តិធម៌នឹងតាមដានស្ថាប័នហិរញ្ញវត្ថុនានាដែលធ្វើឲ្យប៉ះពាល់ធ្ងន់ធ្ងរដល់សេដ្ឋកិច្ចអាមេរិក និងអតិថិជនរបស់យើង»។
ដំណោះស្រាយចុងក្រោយមួយត្រូវបានរំពឹងថានឹងធ្វើឡើងបន្ទាប់ពីធនាគារ RBS កាលពីខែឧសភាបានចុះកិច្ចព្រមព្រៀងបឋមមួយជាមួយក្រសួងយុត្តិធម៌។
កាលពីឆ្នាំមុន នៅក្នុងការដោះស្រាយមួយជាមួយអាជ្ញាធរហិរញ្ញវត្ថុសហព័ន្ធលើបញ្ហាស្រដៀងគ្នានេះ ធនាគារ RBS បានយល់ព្រមបង់ប្រាក់ពិន័យចំនួន ៥,៥ ពាន់លានដុល្លារ។
ការផាកពិន័យថ្មីៗនេះ ជាពិន័យចុងក្រោយបំផុតបន្ទាប់ពីការផាកពិន័យដែលមានទឹកប្រាប់រាប់ពាន់លានដុល្លារទៅលើធនាគារធំៗ ជុំវិញការប្រព្រឹត្ដខុសឆ្គងនៅមុនពេលមានវិបត្តិហិរញ្ញវត្ថុ៕ AFP/NS