.jpg)
ដែកថែបបំពង់នៅរោងចក្រមួយក្នុងប្រទេសចិន។ ថៃទទួលបានការលើកលែងពន្ធក្នុងអត្រា ២៥% ដែលអនុម័តដោយលោក ត្រាំ នាពេលថ្មីៗនេះ។ រូបថត AFP
ក្រុងបាងកកៈ ក្រសួងពាណិជ្ជកម្មថៃបានឲ្យដឹងថា ដែកថែបបំពង់របស់ថៃទទួលបានការលើកលែងពន្ធនាំចូលដែលមានអត្រា ២៥ ភាគរយរបស់អាមេរិក។
លោក Wanchai Varavithya អគ្គនាយករងនៃនាយកដ្ឋានពាណិជ្ជកម្មបរទេសរបស់ក្រសួងពាណិជ្ជកម្មថៃ មានប្រសាសន៍ថា ក្រសួងពាណិជ្ជកម្មអាមេរិកបានផ្តល់ការលើកលែងពន្ធចំពោះក្រុមហ៊ុននាំចេញដែកថែបបំពង់របស់ថៃ តែផ្អែកលើមូលដ្ឋាននាំចេញនីមួយៗប៉ុណ្ណោះ។
លោក Wanchai មានប្រសាសន៍បន្តថា៖ «បើទោះបីជាក្រសួងពាណិជ្ជកម្មអាមេរិក មិនទាន់ផ្តល់នូវការលើកលែងពន្ធនាំចូលសម្រាប់ការនាំចេញទាំងអស់ពីប្រទេសថៃក្តី ក៏ក្រុមហ៊ុនអាចស្នើសុំការលើកលែងពន្ធសម្រាប់ការនាំចេញមួយលើកៗបាន។
លោកបានឲ្យដឹងទៀតថា៖ «យើងសង្ឃឹមថា ទីក្រុងវ៉ាស៊ីនតោនឆាប់ៗនេះនឹងប្រកាសពីការលើកលែងពន្ធលើការនាំចូលជាអចិន្ត្រៃយ៍លើដែកថែប និងអាលុយមីញ៉ូមពីប្រទេសថៃ»។
កាលពីថ្ងៃទី២៣ ខែមីនា ប្រធានាធិបតីអាមេរិក ដូណាល់ ត្រាំ បានហូតពន្ធ ២៥ ភាគរយលើការនាំចូលដែកថែប និង ១០ ភាគរយលើអាលុយមីញ៉ូម តែបានលើកលែងពន្ធជាបណ្តោះអាសន្នឲ្យប្រទេសកាណាដា ម៉ិកស៊ិក ប្រេស៊ីល សហភាពអឺរ៉ុប អូស្រ្តាលី និងអាហ្សង់ទីន។
ប្រធានាធិបតីអាមេរិករូបនេះក៏បានផ្តល់ការលើកលែងពន្ធលើដែកថែបជាបណ្តោះអាសន្នឲ្យប្រទេសកូរ៉េខាងត្បូងផងដែរ ដោយចាត់ទុកជាផ្នែកមួយនៃការវាយតម្លៃឡើងវិញនូវកិច្ចព្រមព្រៀងពាណិជ្ជកម្មសេរី ដែលលោកបានរិះគន់យ៉ាងខ្លាំងនោះ៕ Bangkok Post/BP
