.jpg)
រោងចក្រផលិតប្រេងមួយកន្លែងក្នុងប្រទេស អារ៉ាប៊ីសាអ៊ូឌីត។ AFP
ក្រុងឌូបៃៈ ក្រុមហ៊ុន S&P Platts បានឲ្យដឹងកាលពីថ្ងៃអង្គារថា ផលិតកម្មប្រេងឆៅប្រហែល ៣ លានបារ៉ែល ក្នុងមួយថ្ងៃរបស់ប្រទេស អារ៉ាប៊ីសាអ៊ូឌីត នឹងនៅតែមិនអាចងាកមករកផលិតកម្មជាធម្មតាវិញបាននោះទេក្នុងរយៈពេលមួយខែ បន្ទាប់ពីរងការវាយប្រហារពីក្រុមឧទ្ទាមទៅលើទីតាំងផលិតប្រេងឆៅចំនួន ២ កន្លែង របស់ប្រទេសនេះ។
របាយការណ៍របស់ក្រុមហ៊ុននេះបានធ្វើឡើង ខណៈដែលតម្លៃប្រេងបានធ្លាក់ចុះបន្តិច បន្ទាប់ពីបានកើនឡើងខ្ពស់បំផុតកាលពីថ្ងៃចន្ទ ដោយសារតែភាពមិនច្បាស់លាស់បានគ្រប់គ្រងលើទីផ្សារពិភពលោក នៅពេលដែលប្រទេសផលិតប្រេងច្រើនជាងគេរបស់អង្គការប្រទេសនាំចេញប្រេង (OPEC) នឹងអាចស្ដារផលិតកម្មដែលបាត់បង់ឡើងវិញ។
ការវាយប្រហារលើរោងចក្រផលិតប្រេង Abqaiq និងរោងចក្រ Khurais ដែលអាមេរិកបានស្ដីបន្ទោសទៅលើប្រទេសអ៊ីរ៉ង់រួមគ្នាមានសមត្ថភាពអាចផលិតប្រេងបានចំនួន ៥,៧ លានបារ៉ែលក្នុងមួយថ្ងៃ (bpd) ឬ ៦ ភាគរយនៃការផលិតពិភពលោក។
ក្រុមហ៊ុន S&P Global Platts បានឲ្យដឹងនៅក្នុងរបាយការណ៍មួយថា៖ «នៅក្នុងចំណុចនេះ វាមើលទៅទំនងជាថា ប្រេងប្រហែល ៣ លានបារ៉ែលក្នុងមួយថ្ងៃនៃការផ្គត់ផ្គង់ប្រេងឆៅរបស់ប្រទេស អារ៉ាប៊ីសាអ៊ូឌីត នឹងនៅតែមិនអាចងាកមករកផលិតកម្មវិញបានទេក្នុងរយៈពេលយ៉ាងហោចណាស់មួយខែ»។
ព្រះអង្គម្ចាស់ Abdulaziz bin Salman រដ្ឋមន្ដ្រីក្រសួងថាមពលរបស់ប្រទេស អារ៉ាប៊ីសាអ៊ីឌីត នៅល្ងាចថ្ងៃអង្គារបានធ្វើសន្និសីទព័ត៌មានលើកដំបូងរបស់ព្រះអង្គចាប់តាំងពីការវាយប្រហារដោយព្រះអង្គបានផ្ដល់បច្ចុប្បន្នភាពស្ដីពីការខិតខំប្រឹងប្រែងក្នុងការស្ដារផលិតកម្មដែលបាត់បង់ឡើងវិញ។
ទីក្រុងរីយ៉ាដបូមប្រេងបានប្រហែល ៩,៩ លានបារ៉ែល ក្នុងមួយថ្ងៃ ដែលក្នុងចំណោមចំនួននោះ ប្រេងឆៅចំនួនប្រហែល ៧ លានបារ៉ែល ក្នុងមួយថ្ងៃត្រូវបាននាំចេញដែលភាគច្រើនទៅទីផ្សារអាស៊ី៕ LA
