.jpg)
រូបរបស់ព្រះមហាក្សត្រ Salman និងរាជទាយាទ។ រូបថត AFP
ក្រុងរីយ៉ាដៈ ប្រទេសអារ៉ាប៊ីសាអ៊ូឌីត កាលពីថ្ងៃចន្ទបានអនុម័តច្បាប់ថវិកាប្រចាំឆ្នាំ ២០២០ របស់ខ្លួន ដោយព្យាករថានឹងមានការកើនឡើងឱនភាពថវិកាក្នុងគ្រាដែលតម្លៃប្រេងធ្លាក់ចុះ និងកាត់បន្ថយផលិតកម្មដែលបានប៉ះពាល់ដល់ប្រាក់ចំណូលរបស់ប្រទេសផលិតប្រេងឆៅធំបំផុតមួយនេះ។
ព្រះរាជាណាចក្រនេះបានព្យាករថានឹងមានឱនភាពថវិកាចំនួន ៥០ ពាន់លានដុល្លារ នៅឆ្នាំ ២០២០ ដែលកើនឡើង ១៥ ពាន់លានដុល្លារ ពីថវិកាឆ្នាំ ២០១៩ របស់ខ្លួន។ នេះបើយោងតាមសេចក្តីប្រកាសផ្លូវការមួយដែលចេញផ្សាយតាមទូរទស្សន៍រដ្ឋ។
សេចក្តីប្រកាសនេះបានឲ្យដឹងថា អារ៉ាប៊ី សាអ៊ូឌីត បានព្យាករថា ឱនភាពថវិកាក្នុងឆ្នាំ ២០២០ នឹងកើនឡើងដល់ ៦,៤ ភាគរយ នៃផលិតផលក្នុងស្រុកសរុប (ផ.ស.ស) កើនពី ៤,៧ ភាគរយ ក្នុងឆ្នាំ ២០១៩។
សេចក្តីប្រកាសនេះបានចេញផ្សាយបន្ទាប់ពីមានកិច្ចប្រជុំគណៈរដ្ឋមន្ត្រីមួយដែលដឹកនាំដោយព្រះមហាក្សត្រ Salman ដែលព្រះអង្គបានមានព្រះបន្ទូលថា ទីក្រុងរីយ៉ាដក៏នឹងកាត់បន្ថយការចំណាយសម្រាប់ឆ្នាំក្រោយផងដែរក្នុងវិធានការរឹតបន្តឹងដ៏កម្រមួយ។
ផែនការចំណាយនឹងមានចំនួន ២៧២ ពាន់លានដុល្លារ ធ្លាក់ចុះ ៧,៨ ភាគរយ ធៀបនឹងឆ្នាំ ២០១៩ ខណៈដែលប្រាក់ចំណូលត្រូវបានប៉ាន់ប្រមាណថា មានចំនួន ២២២ ពាន់លានដុល្លារ ដែលធ្លាក់ចុះ ១៤,៦ ភាគរយផងដែរ។
ក្រសួងហិរញ្ញវត្ថុអារ៉ាប៊ី សាអ៊ូឌីត ឲ្យដឹងថា ប្រាក់ចំណូលពីប្រេងត្រូវបានព្យាករថាមានចំនួន ១៣៦,៨ ពាន់លានដុល្លារ ធ្លាក់ចុះពី ១៦០,៥ ពាន់លានដុល្លារ ក្នុងឆ្នាំ ២០១៩។
តម្លៃប្រេងនៅតែមានកម្រិតទាបដោយការជួញដូរក្នុងតម្លៃប្រហែល ៦៤ ដុល្លារ ក្នុង ១ បារ៉ែល បើទោះជាមានការកាត់បន្ថយផលិតកម្មបន្ថែមដែលត្រូវបានព្រមព្រៀងដោយអង្គការ OPEC និងក្រុមប្រទេសផលិតប្រេងដែលជាសម្ព័ន្ធមិត្តរបស់ខ្លួននៅសប្តាហ៍មុនក្តី។
ប្រាក់ចំណូលពីប្រេងមានចំណែកប្រហែល ២ ភាគ ៣ នៃប្រាក់ចំណូលសរុបរបស់ប្រទេស អារ៉ាប៊ី សាអ៊ូឌីត។
ព្រះមហាក្សត្រ Salman បានមានព្រះបន្ទូលថា រដ្ឋាភិបាលរបស់ព្រះអង្គបានប្តេជ្ញាចិត្តបន្តធ្វើពិពិធកម្មប្រភពប្រាក់ចំណូលរបស់ខ្លួន និងផ្លាស់ប្តូរព្រះរាជាណាចក្ររបស់ព្រះអង្គចេញពីការពឹងផ្អែកលើប្រេង។
ក្រសួងហិរញ្ញវត្ថុឲ្យដឹងថា ប្រទេសនេះបានចំណាយ ២៧៩,៥ ពាន់លានដុល្លារ និងមានប្រាក់ចំណូលចំនួន ២៤៤,៥ ពាន់លានដុល្លារ នៅក្នុងឆ្នាំ ២០១៩ ដែលជាហេតុធ្វើឲ្យមានឱនភាពថវិកាចំនួន ៣៥ ពាន់លានដុល្លារ៕ KC
